小時候在前身新兜記食味道
在新斗記再次品嚐
食物水準不比以前差
值得一試菜色有:煎蓮藕餅川敕雞鼓油皇炒麵等等

男友在意想不到的情況下摘冠，比賽後由粉嶺駕車至新斗記吃個慶功late dinner。錯失了上次爐兄在這裡搞的局，我倆都感到十分遺憾，估不到相隔不久就有機會來，令人格外期待。爸爸在新兜記年代已幫襯過此店，今晚重來，摩登的裝修給他一種耳目一新的感覺。

參考了爐兄的菜單，我們點了以下菜式，整體上水準偏高，爸爸笑言食完膽固醇含量亦隨之激增。
- 即燒乳豬($58/例)，皮極脆，脂肪已被除去，口感輕盈
- 滷水鮮乳鴿($68)，滷水味濃，厚肉，充滿鴿香，推介
- 花尾躉炒球($188)，魚肉不夠厚身彈牙，鹽和胡椒粉蓋過了魚鮮味
- 豉油皇鵝腸($58)，豉油味剛好，鵝腸爸爸嫌不夠爽
- 泥孟粥($68/鍋)，鮮味非常，內含碎魚肉，陳皮多些會更好
- 魚湯北京白菜($56)，白菜夠嫩，爸爸喜歡再淋啲，我認為剛好

除已點菜式外，尚有數款特色小菜想試，價錢公道，服務亦唔錯，very likely有下次。最後，侍應本想送我們糖水，但剛好賣哂，於是我們決定轉戰男友地頭-土瓜灣，繼績覓食。下文待績…

以為係新兜記原班人馬, 所以特登原班人馬16人去食乳鴿同埋蝦子柚皮, 結果原來同以前好唔同.

鹵水乳鴿肉好淋, 味道都ok, 不過冇以前咁濃味同埋鮮味, 色澤都淺色咗好多.

豉汁鵝腸爽口味道適中, 不過印象中以前鵝腸大條d, 口感好d, 而家比較幼身, 好似食咗陣風咁.

燒乳豬第一次食, 好新鮮, 仲聞到炭燒既味道, 皮好脆, 但肉味略為鹹, 缺乏鮮味, 同埋等咗好耐, 有成個鐘.

蒸魚, 唔記得係咩魚, 都有兩斤幾, 幾大條, 初時食都覺得好好味好滑, 心諗:咁犀利?咁大條都蒸都咁滑, 點知原來入面唔熟, 個侍應仲話係特登咁蒸d肉先會滑. 大佬, 條魚有1/3係生唔食得, 我不如叫條細魚. 番蒸既結果梗係"鞋"好多啦.

菜方面唔錯, 豆苗鮮甜, 魚湯時疏湯味好鮮.

有叫琵琶豆腐, 羊排, 鹵水鵝掌翼, ok冇咩特別. 小食方面鴨胸唔錯, 都分唔出係中式定係西式煮法, 又似煙又似煮.

七點半叫餸, 唔知點解好多嘢都冇晒, 連最想食既蝦子柚皮同埋送既甜品都冇晒.

十六人包房, 最低消費2500, 結果2800賣單. 環境招呼尚算唔錯.

喜萬年之前兩日,一眾人佐敦長樂街新斗記開局.名正言順"二月五日我和某人在某地."席上連埋小弟,有五位將會列陣在兩天後的大局,稱之為"喜萬年打比預賽"亦不為過.

舊舖新兜記吃過一次,新店比舊店更加華麗堂皇.地下的魚缸,琳瑯滿目的珊蝴魚,真正魚樂無窮.搞手一早在二樓安排貴賓房,兼安排菜單,十多人吃得安心,有勞了是夜搞手V小姐.

十四人分十二味,打頭陣的鎮店鹵水乳鴿皇,未吃已經索到陣陣鹵水香氣,鹵得很入味,肉質亦佳.差點連骨頭也吞下.老火湯為馬蹄胡椒豬肚湯,湯呈奶白色.味道都幾咸.

原隻炭燒乳豬,皮燒得脆如薯片,味道很香,但沒甚多肉吃,因為一早已經"片"走,所以在新斗記吃乳豬,只能吃其皮,沒有其肉吃.同外間的有所不同.十多人分,吃得過癮.

花竹大蝦用豉油皇煮之,大大隻的花竹,肉質爽甜.豉油味亦完全滲進蝦內.窩貼小棠菜,香脆又彈牙,比三姐的更好.

如果同人講用幾百銀來一客粟米班塊,十居其九會比人話你黐線在茶記吃個都係廿幾銀乍嘛.)但無論新兜記,或新斗記,幾百銀一客的粟米班塊,一樣是長年鎮店之寶.

四舊水可吃到蘇眉或者老鼠班塊,是夜要將就眾人的預算,退求其次用石班,都係不用二百銀一客.外層粉漿不厚,吃落口感香脆,肉質亦嫩滑.粟米汁味如地捫罐頭湯開出來,沒有過人之處.

個人覺得算不俗,只是賣二百銀,覺得很貴,同英國佬用Dover Sole等上價魚,掉下油鑊炸一樣.同檯如大衛,Denny等人,食後評價亦一般,叫做試過便算.

辣酒花螺差點宰在她手上,嚐一口湯底,即刻麻辣攻上腦,差點窒息,不知何解.者者唐生菜煲,生菜碧綠爽脆.金牌炸子雞乙隻,肉質亦夠嫩,雞味亦夠.其特別部位,自然地落在S小姐身上.

燒寸骨用新疆做法,一支支豬寸骨排排坐,面頭耍上些椒粒,味道很重香料味,夠濃烈.豬肉亦夠鬆化.吃落感覺不下於羊肉.是否香料的濃味作崇?

兩味炒粉麵,豉油皇炒麵,炒得乾身,麵條柔韌彈牙,另外的蛋白蒜香蒸飯就略為失色,個飯太濕了,蟹味亦未能完全逼到入飯內.

大家吃得飽飽,又結識到志同道合新朋友,仲有貴賓房坐,每人消費$200,實在便宜.

再一次多謝搞手之安排.

PS:聽Panda兄講,新斗記已進軍西環,西環友有興趣的話可去一試.

引伸閱讀:
http://good-times.webshots.com/album/557541407RVQfSo

新兜記--- 一間屹立係佐敦十幾二十年嘅老鋪，自己有幸係佢執之前幫襯過...

一個字: "貴"...

老店重生，面目全非，但人龍依舊。就算訂咗位，依然要等成粒鐘...

跟舊學生聚會，一大班老娃娃，食到杯盤狼籍...

都唔使睇餐牌就先叫隻乳豬，再加滷水鵝翼及乳鴿...

滷水味唔夠濃，鵝翼太瘦，乳鴿肉頗嫩，但只要個滷水唔得，D料點靚都冇用...

退步了...

乳豬即燒，正式皮脆肉嫩，係近排食過最好嘅出品。老娃娃們個個食到啜晒手指，跟住就豎起隻手指...

所謂龍皇太子羹，查實就係海鮮豆腐羹。味道普通，豆腐算幾滑...

生炒骨就係失敗之作--- 皮不脆，肉太肥，並冇"掛醬"感覺...

芋頭油鴨煲--- 芋頭有D "生水"，過硬。淨係呢點已經唔合格...

自己食唔起粟米蘇眉班塊，就叫個亷價版石班塊。炸粉厚薄適中，魚肉頗鮮而唔鞋，合格之作...

豉油皇鵝腸--- 食得出係用靚頭抽嚟撈，鵝腸肥美。繼乳豬後另一出色之作...

埋單唔算貴(相比起以前)...但要排隊就真係食唔過...

今次遲了一個多月才與兩位朋友慶生，今次是壽星仔主動提議，真係好，唔駛我傷腦筋。初時有點擔心，因為好多劣評。
鹵水乳鴿-所謂招牌菜，覺得只是一般，有好多舖頭做得不會比他差。還是以前新兜記年代時做得好食D。
煎蝦餅-算唔錯，又熱又彈牙，但蝦味欠奉。
上湯浸蜆-上湯較鹹，但蜆肉唔夠入味。
子薑梅子蒸魚雲-甜甜酸酸，仲有少少辣，好醒胃。而魚雲亦吸晒D精華，又滑又好味。
蝦醬芥蘭煲-茶蘭好嫩又唔苦，蝦醬味就淡了少少。
生炒骨-非常之掂，舊舊脆口，肉地又鬆化，甜酸汁度又適中，算是近期食過的佳作。雖然寫明係生炒骨，但咬下去是啖啖肉的。
蠔仔粥-蠔仔唔多，比一般的蠔仔粥多飯少水。
唯有失望是沒有飯後甜品奉送。
幸好壽星仔食得好開心，勁讚好，佢好欣賞D白飯，仲連食兩大碗。

完全唔對路囉...都唔明點解佢要用新兜記做晃子!!!

入到去都覺得唔對路, 間舖黑麻麻。個菜牌只有好少以前的菜式, 但係就有好多古怪外省菜式, 又有火煱。例湯話係杏汁白肺, 來到只是好普通的菜乾煲豬肺, 白都唔白下喎。乳豬又落錯單, 等左好耐...不過都OK。打著舊店的鹵水乳鴿, 須然賣平左, 但係乳鴿質量麻麻, 鹵水又普通, 斬到好多尖骨, 勉強囉。咁情況都唔想再叫野啦。埋單又要茶錢, 又要小食, 又加一...唉!!! 好彩唔比佢叫新兜記, 簡直侮辱左呢間店名, 又沾污我們的回憶。

本人看了報紙介紹專門從上水到佐敦到新兜記食晚餐, 5點九去到, 開了半個門但不許入, 只好到附近走走, 但當我六點八再到新兜記時, 接待員說滿座了, 亦不能等位,其實當時一樓只有一半坐了人, 有幾張大桌遠是空的, 但接待員說那是大桌, 不能給2人座位, 態度泠冰冰, 一副拒人千里的樣子, 我覺得其實一間老食肆重開是好, 但不能以皇帝女心態去待客, 因為總有一天食肆亦有求客的一天.

當天我到九龍城吃的亦是潮州菜, 別人的態度好得多, 所以大家遇到此間黑店, 一定要講出來, 不要信報紙.

如果閣下真的要到此吃飯, 記得千其唔好walk-in, 不然會吃出一肚火.

同條女去食，剛巧今期忍食男女推介，人山人海。
碰見以前在新兜記做的其中一舊樓面，份外親切。
食物呢…可能早預左唔好，結果出來冇失望，反而比預期中好。
再此聲明，這裡同新兜記是兩回事，如果想籍此搵番以前新兜記果種口味，會失望的！
但作為一個獨立食肆，新斗記的水準並唔差。亦唔算難食，reasonable的！
這裡上一手是「倉浪亭」，唔知而家其實係咪同一班人呢？搵番新兜記原班人馬可能是宣傳手般已。
講番食左乜：
滷水鴿…OK。好食。
乳豬例牌…OK，老實講幾好食。但好似以前新兜記冇乜關係。
柚皮…冇貨。老伙記話大陸供應柚皮條友俾人拉左，所以冇得煮。
椒鹽骨…賣晒。冇得食。
豉油王大蝦碌例牌…一般。價格同以前新兜記一樣咁貴，要$200。但味道呢…我以前冇試過新兜記的，唔知點比。但作為獨立食肆來說，是唔值$200，兼有少少搵笨的。
炒飯…一般。但肯定以前新兜記好食。這裡的唔夠乾身，也唔夠鑊氣。
加埋啤酒，埋單$500幾，唔記得五百中定尾…OK la…
總括唔好諗住來呢度搵番新兜記果種情懷及口味，就不會失望。
而作為一個新開，獨立的食肆，這裡是合格的。除了我睇唔過眼以前班老伙記被迫脫下黑褲白恤衫黑bow呔，換上以前倉浪亭果套籃色店小二制服，活動小學家長參加學生無台劇演出。

懷訪舊心情，到訪新(兜)記，試了幾樣，有點失望。

子薑梅子蒸魚雲- 過甜但不夠酸

豉椒炒蜆- 不夠辣，放涼了(也許太耐未拿出來)

鹵水乳鴿- 本來叫舊時最喜歡的紅燒，但無，叫豉油王，老伙記說"鹵水更佳，唔得佢請"。食落差d，不是很差，但可以更入味些。

蝦醬通菜煲- ok, 但我不喜淨齋"逛"無葉。

另叫了白飯及仔肉碎粥- 白飯超硬，粥ok, 但無乜味。

敬送甜品西米露，夠熱但淡而無味。埋單370幾。不介意多少錢，但味道有待改進才有第次幫襯。

每年都會黎一次, 就係因為去大圍拜車公爺爺囉!!!
每次來都必叫係呢度既椒鹽中蝦, 用正海中蝦, 真是殼都食埋... 又咸香又鮮, 完全無第二度可以做到個種火侯。今日賣$18一兩。好似好多年都係呢個價錢。燒乳鴿, 真係唔同食法, 新鮮鴿... 骨軟肉嫩, 仲有一小副鴿珍, $78一隻。跟住仲有個鼎湖上素, 裏面有好幾種耳裏, 須然我唔肯定係唔係齊哂6耳, 不過三菇就及其他材料都十分足。其他的炒鴿鬆, 百花豆腐, 豉椒蟹... 味味都咁和味, 每次去到都想食多幾樣。可惜我家住九龍, 去大圍食飯就唔係咁方便。我覺得楓林小館的風味和新兜記相似, 可惜新兜記已經結業, 希望每年都可以到楓林小館吃到美味的一餐.... 拜得神多定有神秘祐。

呢個食評係比佐敦吳松街分店(位置係新兜記斜對面),因為無記低詳細地址,所以將食評寫係土瓜灣呢度。

星期六去六榕仙館買齋餅,行過見到呢個"台灣蝴蝶"招牌,了起我條台灣癮,係門口見到入面人唔多,望落都幾對眼,就呢度啦。

趟開玻璃門,店員已經同你講"歡迎光臨",good!

睇左下午茶同午餐餐牌,見到好耐無食既菜式--大腸麵線,又即時諗起台北西門町既阿宗麵線!! =p

百香果紅茶先到,味道就係一向百香果糖漿個種味道,甜度ok。

大腸麵線稍後至到,橢圓形碗仔唔係太大,下午茶份量都算ok。

面頭有大約十片大腸片,木魚碎+芫茜。湯頭有胡椒粉味,麵線唔係太淋,食落有d似食緊蝦子麵感覺=p 大腸切得太薄,無乜口感,味道一般鹵水味道;稍為失敗係個獻推得唔勻,因為我食到一舊粉團。

食完之後更加掛住阿宗麵線,唔係因為阿宗更好味,而係食到阿宗等於我身在台北!!

12/06/2005 星期日

同家人及男友0黎呢度食晚飯, 叫0左小炒王, 蒸頭腩兩味, 豉油皇煎蝦($68), 炒通菜, 仲好似有一兩樣唔係好記得.

最好味要數豉油皇煎蝦, 煎得好入味, 殼都"吝"埋. 當然, 質素同新兜記係有距離, 但係新兜記食一隻可以響呢度食碟幾(每碟都有7/8隻), 況且d蝦都算唔細(熟0左都有4/5吋), 我認為係好味同抵食.

蒸頭腩呢, 個炒球就真係令人失望d, 竟然用雪櫃野, 扣分; 但係個頭腩本身就好正, 因為食得出用0左新鮮野, 好味, 又可以加返d分.

其他, 都算中規中舉, 唔錯, 係碟頭較細, d飯亦比較細碗.

聽爸爸講早幾晚0黎食飯d老板好緊張落晒去睇住, 日後水準點樣就未知, 但係家下0黎講算係幾好, 但係就略嫌較多雜項收費.

爸爸找數, 好似食0左大約400幾蚊.

尋日又係佐敦漫無目的搵食，記得有食家講過新兜記D咕嚕肉唔錯，試過佢出名的乳鴿，都係不外如是，今次又試下佢的咕嚕肉係咪真係好。
一上枱有少少失望，一睇色水已覺得甜酸度唔夠，脆口程度就一般，仲係冇菠蘿添，唯一覺得好係獻汁唔太杰，學kc話齋唔會糊口。
上湯蘆筍鍾意佢味道清淡，蘆筍每舊size都差不多，爽口又清甜。
粟米燴魚肚即係粟米魚肚羹，料算十足，好多魚肚，不過唔係沙爆魚肚，而且細細窩收80蚊，唔係好抵。始終好懷念大澳的粟魚肚羹同咕嚕肉，好期待星期日可以食到啦!