Name: B&S 西班牙小食坊
Address: 黃埔新邨民泰街41-47號地舖, HK
Price range: $101-200

良知圈外的黑豬白豬！

奧志雷等級4 2020-03-09

361 瀏覽

宿醉未醒好很眼訓呢！同事們誠意拳拳要請共膳，唯有犧牲我寶貴的休眠時間。見餐牌照片那不是煎蛋叉燒飯嗎？煎蛋不是包埋，要另外加錢？張相真係非常容易使人誤會囉﹗已經早一日訂位及食物，不是預先準備好？要我坐低再等足 45 分鐘！那我何解要訂定菜呢？醒目少少得唔得，要開壼茶順返條氣！伯爵茶，清香不嗆，滑滑不鞋，醒腦提神！熱熱灌入全身暖起來，有得加水真好。成餐飯兩個人連消耗兩三壼正常不過，諗起上水鳳鳴居叫壼茶不設添水，真過份。典型英國紅茶，茶味濃厚香醇不甘不澀。熱齋啡，香醇不酸不過熱，醇美濃厚有質素。花草茶，有少少辛味，香草味較出，清新靈神，太細杯唔夠喉。Baigorri Crianza，厚厚濃濃掛杯深紅，重口味而不澀。烤八爪魚鬚，香口微脆，先爽後彈，海水咸鮮好味道。深海八爪魚凍盤，只有欖油調味有點寡，幸好八爪魚爽爽嚥韌，每口都充滿鮮味及咸香，如果加點黑醋會開胃更多。西班牙特色腸拼盤，傳統風乾紅椒味香腸、牛肝菌肉腸、傳統乾紅椒腸，切片後才烤？不是應該烤完才切，以保持肉汁不會流失嗎？侍應不作任何介紹，對食客那麼有信心？必定懂得分辨？連名都唔知，如果好食想加碼都無辦法啦﹗傳統風乾紅椒味香腸，估計中間較深色的，咸度強似沙樂美。牛肝菌肉腸，估計左邊帶灰色的，食不到菌味，但有種獨特的香氣。傳統乾紅椒腸，應該係右邊偏白有紅點的，肉味濃帶椒甜味。傳統風乾紅椒味香腸、牛肝菌肉腸、傳統乾紅椒腸。我個人較喜歡白色兩款，肉甜肉香不咸。法式芥辣醬，賣相有點核突吧！不能撈撈掃平先給食客嗎？味道及質地都與別不同，不辣不辛不嗆喉，清淡香甜帶油香，給香腸點綴一下味道，而且可將腸咸味減低少少。海鮮多士拼盤，西班牙罐頭食品。茄汁青口？完全係地捫茄汁沙甸魚既茄汁味，罐頭番茄底，西人的食法？粉粉的青口，有微弱貝類味。沙甸魚牛油果醬，非常創新，幼滑牛油果清新淡淡，沙甸魚天生濃厚獨特魚味，嚥韌的魚肉。海蝸牛蛋黃醬，油油甜甜搭微咸海蝸牛，即海螺花螺翡翠螺類。室溫多士極脆，同沙律既多士方塊一樣。鬆脆麵包，淡茂茂乾爭爭，略硬極脆，咬開粉碎，送湯比較好。黑毛豬羅宋湯，比早前我讚口不絕的黑毛豬羅宋湯有著天淵之別﹗曾經飲過橙色的湯汁使人聯想到南瓜，我眼測估計由大量波椒打成的。淺嚐幾啖，果然不出我所料，清爽波椒甜味，還食得到波椒蓉，散發陣陣黑豚肉香，有創意幾特別。眼前依碗沒有濃濃豬肉香，沒有濃濃波椒甜清淡如水，辣椒仔汁要再次召喚您喇！因為食客數量突然颷升，所以粗製濫造加多一點水嗎？另見餐牌有玫塊蝦羅宋湯，能否轉的呢？太陽蛋香煎西冷扒 3 成熟配扁意粉，輕輕的海鹽黑椒調味，可以食到牛的原味，幸好牛肉甜味突出，不算淡茂茂，煮到 3 成熟剛好無過火。表面焦香有趙頭，內裡嫩紅清甜，筋位比較粗壯大條，要耐心地嘴嚼到最後，吸盡肉汁油脂剩下纖維都未能吞下，唯有放棄吐掉。意粉腍散碎黏口，不滑不彈不嚥韌，烚定翻炒討厭！加入橄欖油香草黑椒，雖有誠意但無補於事，撈埋甘甜濕潤蛋黃汁可加分少許。辣椒仔汁又係您打救我既時候喇，洒上大量酸辣汁，味道好好多了！煎西班牙有機雞蛋配烤有機走地雞雞扒飯，金黃焦香的蛋白配上醇厚甘甜的蛋黃撈飯，簡約只用鹽作調味，咸香突出，食得我如痴如醉！大半碗飯就這樣輕易的蒸發掉。乾乾厚實的烤雞扒，醃味豐富帶有雞油香，輕輕散發雞肉甜味。其貌不揚，萬料不到味道會如此出色。讓一小塊雞扒躺在香甜乾爽白飯上塞入口，竟然如此簡單沒有任何醬汁的煎蛋雞扒飯能夠令我稱心滿意，食得乾乾淨淨啊！煎蛋皇牌黑毛豬梅頭叉燒飯，索價 $110 蚊的西洋黯然銷魂飯，睇您有幾好食﹗本想食烤西班牙有機羊腿扒，黑仔賣晒，無食神﹗西班牙黑毛豬叉燒？眼測似乎真係連皮膚都黑黑地架喎。微暖焦香蛋白加甘甜流心蛋黃，還散發陣陣鹽香，撈飯無得頂，白飯不經意消失三份一咯。大大舊叉燒整件連白飯入口，豬肉甜味特濃，鬆軟綿滑極多汁，不乾不鞋亦不硬，蜜甜味搭焦香味。飯粒半乾濕不過份，眾味融和誘人陶醉。慢嘆一啖肉一啖飯，再一啖肉一啖飯，剛剛一齊消滅殆盡，拍手叫好無投訴，推介食得過！西班牙鹽焗黃油雞髀，鹽粒係西班牙空運到港？焗空運雪藏雞髀？根本只是茶餐廳的服務，不過同事覺得連茶餐廳都稱不上，大家食到有火！雞髀雪藏感強烈，雞皮嚥韌略咸，雞肉結實夠滑味淡。價值 $12 蚊的煎冇機雞蛋最好味！香烤西班牙黑毛豬夾心肉扁意粉，師傅對擺盤賣相沒怎樣的講究，堅係當連鎖快餐店地做。兩件黑毛豬既尊容真的好難使我有幻想，都放手一搏吧！竟然好掂好食好味，色香味俱全！新鮮出爐皮脆肉嫩，鋸開肉汁激射閃令令，豬甜味特濃食到舔舔脷。原來夾心肉即豬背肉，食得過喎。完全無進取心，依舊一成不變！預早著好的意粉隨便轉到碟上出貨，死掉沒有靈魂，沒生氣陰沉沉！快餐店？茶餐廳？如果願意翻炒一下都會好少少。意粉貫徹始終散碎淡茂茂，點解每次意粉都勁短？師傅是否扭斷一半去烚？滾水味扁意粉，黏黏粉口，不滑不彈，連茶餐廳都不如！最終都要辣椒仔汁浸住食，濕濕地入口舒服得多。西班牙黑椒牛柳絲炒扁意粉，西班牙黑椒是什麼味道的啊？意粉無味淡淡的，無鑊氣之餘只係落醬油染染顏色，牛柳絲鞋鞋有著原始牛肉味，試一次便夠。香烤西班牙洋蔥豬扒飯，可能太攰睇漏眼或者太想食而產生幻覺，原來唔係洋蔥焗豬扒飯嗎？只係普通街坊洋蔥汁豬扒飯，失望跌到谷底。刀功有水準，切得好很薄喎。原汁原味有點乾鞋韌，給多一點牙力還應付得到！輕醃黑椒海鹽，少少清爽肉汁，搭載厚稠洋蔥汁伴飯，快餐廳風格強烈，沒怎樣的驚喜。有機太陽蛋煙燻希靈魚柳藜麥飯，食客不算太多，不過等候食物時間較長，苦候廿幾分鐘送到！這個尊容這個賣相使我呆一呆，睇落真心覺得似成條大便放係眼前！教我情何以堪，您咁做係唔會令到我驚架﹗主角其實係隻有機太陽蛋！輕輕的暖意，滑溜黏黏的蛋黃漿，撈著嚥韌香噴噴藜麥飯粒釀入嘴仔，配搭無與倫比，食得開心滋味！希靈魚刺身就食得多，煙燻都係第一次。嘗試用匙羮界開，竟然膠感十足，要鋸才能將她分屍。不止外觀似鰻魚，就連調味及質地都極度相似，不是鬆軟的，是嚥韌結實的。香烤黑毛豬橡果級有骨豬扒，最初想訂西班牙乳豬的，但職員表示閒日通常都不做啊。硬係覺得依間餐應烤豬慣性過熟過晒火，乾爭爭。烤得兩面微脆香口有焦香，全熟極有嚼勁的肉質，略厭過熟有點乾。調味偏重，只食到微弱的豬肉甜味，就算平時的午餐豬都較多肉汁較為好食少少。香烤一字骨，我真的分不清 Ribs rack 到底跟扇骨排 Spare ribs 有什麼分別？首次遇上豬肋骨是如此演繹。外層香脆聽得到撕裂的聲音，鋸開再慢慢品嚐。我應該用手扯開，會更原汁原味，忘記了！瘦瘦的肉質，極度乾燥，沒怎調味，純天然豬味，單調悶悶的。我想要 A1 汁或茄汁，應該會更吸引。傳統西班牙海鮮飯，鋪上西班牙老虎蝦及西班牙大紅水晶蝦中等，兩款蝦都霉肉既？腍劈劈大感失望。蕃紅花染得炒飯微紅，乾爽而充滿蝦味及海鮮湯味，混得討人歡喜。烤西班牙大紅水晶蝦珍寶，兩隻都係珍寶？體形相當有距離，見到唔好睇啦！大隻既都係贈比朋友享用。新鮮出爐剛剛烤完，熱到只能免強拿起。極濃烤蝦香氣四處游走，索一索舒筋活絡。粗粗大大碌蝦肉結實爽彈，蝦味超卓鮮甜，肉多到連蝦頭都塞得滿滿。侍應專登提供隻茶匙品嚐蝦膏。大量熱烘烘黏稠甘香蝦膏如此食法，真的奢侈豪華。烤黑毛豬扇骨，我已分不開什麼一字骨或扇骨，看似都一樣。輕醃輕烤，清淡而食得到的豬香豬甜，肉質濕潤有咬口，損骨最高興。西班牙黑毛豬串燒爽梅片金菇卷，燶到乾乾黐牙喎！肉味香濃，焦香味重，撞上爆汁爽脆金菇尙算可口。西班牙黑毛豬串燒豬肋肉，骰仔一口極多肉汁，脂肪油潤甘甜好味道！香烤有機走地雞雞扒，感覺縮水一樣，細細兩小件像鵪鶉。結實乾硬的白肉，香口彈彈雞皮，夾埋一齊咬唔難食。雜果杯，師傅心情大好，全場萬歲飯後果，多謝多謝！非常新鮮的水果，奇異果、蜜桃、菠蘿、士多啤梨，我即時聯想到 Sangria 西班牙水果酒。繼續閱讀