大排檔小炒 (華發大廈)

尋日同班friend喺銅鑼灣行完街，個個都又攰又肚餓，諗緊食乜好。大家突然好想食啲夠鑊氣、可以大聲傾計嘅地方，唔想去啲靜英英嘅西餐廳。咁啱行過駱克道，見到呢間「大排檔小炒」，個名夠晒直接，門口又見到啲人飲住啤酒食得好開心，我哋就決定入去試下。入到去，唔係你想像中嗰種街邊鐵皮檔，而係有冷氣嘅舖頭，裝修簡單，但乾乾淨淨，坐得幾舒服。不過個氣氛就絕對係大排檔feel，全場都係傾計聲、碰杯聲，夠晒嘈吵熱鬧，啱晒我哋成班人「吹水」嘅氣氛。我哋人多，叫咗幾個小菜。首先要讚嘅係個啫啫雞煲。一開蓋啲煙同香味即刻湧晒出嚟，「喳喳」聲勁有feel！啲雞件好滑，索晒啲醬汁味，非常惹味，啲乾蔥同蒜頭都煮到好香，用嚟送飯真係一流。跟住個椒鹽鮮魷都好有驚喜。好多地方嘅椒鹽鮮魷一係炸得太油，一係個漿太厚。但呢度炸得夠乾身，唔會成口油，個炸漿又夠薄，食到魷魚本身嘅鮮甜味。加埋啲炸蒜同辣椒粒，真係會食唔停口，送啤酒簡直係絕配！我哋幾個男仔清咗兩碟。另外叫咗個豉椒炒蜆，啲蜆幾新鮮，冇乜沙，個豉椒汁調得啱啱好，唔會太鹹，又夠香口。仲有個蒜蓉炒菜心，夠鑊氣，條條都爽脆，唔會黃晒或者太老，食得出師傅有心機。服務方面，啲阿姐落單上菜都好快手，係典型大排-檔嗰種爽快，唔會同你慢慢傾，但有求必應，叫罐啤酒好快就送到。埋單計返，每人都係二百蚊鬆啲，喺銅鑼灣呢個地段食到咁嘅質素，我覺得算係幾抵食。總括嚟講，呢餐飯食得好滿足。如果你想喺銅鑼灣搵個地方同三五知己食餐飯、飲杯酒、大大聲傾計，又想食啲有鑊氣嘅小炒，呢間絕對可以擺入你嘅考慮名單。下次經過，我都會想再encore個椒鹽鮮魷！…查看更多

嗰日慶祝父親節，訂唔到位，早場六點鐘到達 Walk-in，見到現場已經有客喺度等緊，好彩等咗一陣就入到去。餐廳環境乾淨，枱與枱之間距離唔算太迫，但大枱唔多，整體感覺幾舒服。叫咗幾款菜式，包括豉汁帶子蒸豆腐、瑤柱蛋白海鮮炒飯、風沙雞同招牌拔絲咕嚕肉。出菜速度快，每款都係熱辣辣上枱，炒功足，食落感覺係偏熱氣，但整體味道都唔錯。咕嚕肉作為招牌菜，外層脆口，醬汁黏身，甜酸度適中，肉質唔鞋，處理得幾好。食物水準不錯，唔怪得咁旺場，適合一家人食餐飯，見有唔少2人枱，撐枱腳簡單食個小炒晚飯都合適。…查看更多

第一次食，坐位幾舒服。小炒食物來講，價錢略為小貴，不過每樣嘢食都好大份，所以其實好夠食。密糖薯仔牛柳粒，牛柳粒都味，係其中有一粒非常之生。個汁好好味好甜。金沙黃金四季豆，一開始驚有啲唔值呢個價錢，點知食落去都幾好食，而且佢份量好多，基本上食一半已經有啲滯。…查看更多

🍳 大排檔小炒 | 鑊氣十足嘅港式飯堂🌃📍 **邊度食**:大排檔小炒🏠 **地址**:銅鑼灣駱克道405-419號華發大廈地下A號舖⏰ **溫馨提示**:夜晚6點前到等半個鐘⏳,7點後隨時等1個鐘,但值🫶🏻—**🔥 必食推介****1. 蜜薯安格斯牛柳粒 ($198)**👉 **9/10** 🍯🐄個蜜糖薯仔脆到”咔嚓”聲💥,牛柳粒外脆內嫩,黑椒蜜糖平衡得啱啱好!鑊氣十足,食完成個人都開心晒😍 雖然貴啲,但真係值回票價🎫!**2. 醬爆砂鍋有機花菜 ($108)**👉 **8/10** 🥦🔥砂鍋上枱仲”滋滋”聲,花菜索晒醬汁,重口味人士最愛🌶️!加埋辣椒蔥段,送啤酒一流🍺**3. 杞子豬潤浸時蔬 ($108)**👉 **8/10** 🐖🌿豬潤大件厚切,嫩滑冇渣,杞子湯清甜,連湯帶菜飲晒!建議選小白菜,吸湯最正💦—### **🍽 高質之選****4. 椒鹽鮮魷 ($158)**👉 **7/10** 🌶️🦑炸衣薄到透光,鮮魷彈牙唔韌👌 炸蒜香到癲,附解膩沾汁好貼心💯**5. 拔絲咕嚕肉 ($138)**👉 **7.5/10** 🍍🍖外脆內軟,菠蘿+蜜糖雙重甜酸,開胃到震!三色椒洋蔥都炒到入味,撈飯無敵🍚**6. 薑蔥焗桶蠔煲 ($228)**👉 **7/10** 🦪🧅蠔肉肥美,薑蔥味濃,同魚雲煲味道相似,但蠔肉更滿足—### **⚠️ 普通之選****7. 薑蔥魚雲煲 ($178)**👉 **7/10** 🐟🧅骨膠原爆棚,薑蔥味濃,但冇乜肉食,純粹食風味，可能係我本人本身唔係特別好魚雲。**8. 沙嗲金菇牛肉煲 ($138)**👉 **7/10** 🥩🥜沙嗲味濃但冇驚喜,粉絲吸汁效果唔錯,同出邊差唔多，但係好食的❣️❣️—### **💣 伏位預警****9. 脆皮牛腩 ($158)**👉 **5.5/10** 🐄所謂｢脆皮｣有啲多餘,食落似普通炸牛腩｡崩沙腩質素OK但冇咩味｡$158得幾舊,性價比極低✖️無咩必要係呢度食呢個｡**10. 酸菜魚 ($268)**👉 **5/10** 🐟以為係招牌,但湯底唔酸唔辣,顏色呃人❌｡魚片有骨又唔入味,食到火滾｡$268夠食兩碟牛柳粒,絕對中伏💸—**環境**:典型大排檔格局,想坐得舒服建議早啲嚟⏰**一句講晒**:｢招牌菜真係無得輸,跟住必食list點就最穩陣!傻仔牛柳粒正🥹｣ #鑊氣小炒 #香港美食 #chill賞staycation #大排檔 #美食攝影 #香港探店 #香港宵夜 #香港吃貨 #相機食先 #平民美食 #香港餐廳 #美食推薦 #香港打卡 #chill賞同陽光玩遊戲 #UCreatorHK …查看更多

餐廳人氣真的挺旺的，如果是繁忙時間吃的話建議要預早訂座了。而食客基本上來到這裡都會吃這裡的海鮮，挺多特色口味，而且價錢不算貴，重要的是新鮮！海虎蝦（８８／隻）真的很大的一隻，跟手掌差不多了。味道選了豉油皇，有幫蝦開肚了，所以特別吸味，而且蝦殼都有經過煎香煎脆的，吃起來濃濃的豉油香，亦帶點蒜香，很惹味。而蝦亦非常新鮮，口感彈牙，肉非常飽滿，裹滿醬汁特別好吃。拔絲咕嚕肉（１３８元）這道菜直接在招牌寫出來了，可見餐廳是多有信心！而結果當然沒有令人失望了，醬汁非常香濃，酸酸甜甜的山渣香，而且是拉絲的狀態的。咕嚕肉炸得外脆內嫩，就算裹滿了醬汁仍然是非常香脆的，這個好評！鐵板乾鍋爆生腸（１４８元）這個是帶點麻麻辣辣的，有點像川菜的感覺，生腸吃起來非常脆嫩，沒有異味的，帶點鑊氣。…查看更多