We Time Cafe (光輝圍)

首先一入門口 個女仔就問你幾多位，差一個都唔得喎要齊人先比入，我話就到啦 佢問仲有幾耐呀？ 我話係附近，10分鐘到啦 佢先勉勉強強比入。當時有吉枱，但佢唔比你 照叫你搭枱啦。咁算啦照搭，一坐低 Menu都未打開佢就企係度望住你問要咩。大佬你唔係急成咁呀？？我叫左一個牛扒+帶子餐（$118）到後面我食緊 仲未食完（如圖），我已叉住一舊西蘭花食緊，仲有咁大舊粟米同西蘭花未食，佢就收走我碟野。我：我未食完喎。佢疾左一下照拎起要收，我再講一次我未食完喎，佢先擺番低 一句唔好意思都無。但其實我先食左35分鐘，完全係正常用餐時間，仲係算係食得快啦，咁都要趕我？！完全係離哂譜！野食一般啦唔係好食又唔係難食 位置細又逼 仲咁衰衰格 0分呀！👎🏽👎🏽👎🏽👎🏽…查看更多

都幫襯咗We Time Cafe好多年，一直睇住佢裝修，換餐牌，加價等等…..次次等半小時以上已經係等閒之事，都已經習以為常，唔當一回事。食物質素都還可以，有時啲新菜式都會 surprise 到我地，尤其佢既奶茶同咖啡，都一直保持到質素。可惜近年每況愈下，日式拉麵麵質笠口、鰻魚炒飯無鰻魚，軟殼蟹又無味，泡菜炒飯又鹹過海水，原本鎮店之寶最好味既凍咖啡，由唔知幾時開始已經變成極之難飲，呢杯壞左既咖啡又酸又稀，真係難以用筆墨來形容。最近佢又換左新餐牌，今日就試下佢既定食，香蒜牛油雞脾定食，絕對係本人呢一世人食過最難食既定食，食得雞脾就諗住啖啖肉，開開心心咁食，點知果隻咁既雞脾一上枱已經十分驚嚇！好似只係用清水來白烚一樣，上枱前再塗啲蒜蓉牛油上面，入面完全無味，又鞋口，啲珍珠米又硬又難食，果碗麵豉湯淡而無味，不知所謂，極之難食。真係伏到不得了！另外，果個阿伯服務態度極差，長期黑口黑面，又大大聲聲係度聽新聞，嘈住啲客人，有咩要求時，就答句：我地係咁架啦！串過 hello 文。幫襯咗咁多年，見住佢由一間都叫做高質既餐廳，變成一間只會一直加價但食物同服務質素越來差既餐廳，真係感到非常可惜。…查看更多

之前食過幾次，都係食鍋物，正正常常。今次第一次同男友喺度撐枱腳，相當滿意。一段時間冇嚟，啲枱櫈換晒，冇咗之前嘅迫狹感。見到扒餐好抵，分別點咗肉眼扒（+$5鐵板上）同豬鞍。肉眼同豬鞍都好大件，而且厚切。最驚喜係豬鞍幾好食，食落唔會乾柴。原本呢間平時lunch time經常要排隊，好多時連收工時間6點已經見有人排緊隊。本身都擔心店員做到黑面（理解嘅…咁忙…），服務態度都正正常常，侍應哥仔仲主動話幫我哋倒黑椒汁。現金埋單仲有95折，埋單$173非常抵食，男友仲想再去試其他。加油啦～保持質素…查看更多

下午茶時段不用排隊，下單後一會先上熱湯，然後熱飲，每人叫了一個六十幾元的下午茶套餐，一個卡邦尼意粉，本人覺得味道可以，想更濃味可以叫芝士粉後加，一個牛油果三文魚凱撒沙律，用的是煙三文魚，點沙律醬後更美味，下午茶時段正好可以舒舒服服不用逼人。結帳時有95折，因為現金付款?詳情請向店員查詢｡…查看更多

We Time Cafe光輝圍21號昌發樓地下6號舖平時收工時間。 葵興嘅餐廳都好靜，唯獨呢一間cafe午飯時間已經係排曬隊，晚餐嘅時間竟然都坐足89成。我望一望出面嘅餐牌，橫掂未食晚飯，於是就入咗去，好彩仲有一張枱（不過結果都要同人搭枱）。我自己一個叫咗一個豬鞍扒，配蘋果蓉。 好想試吓點解呢間餐廳咁吸引喺晚飯嘅時間，竟然可以坐到咁滿？ 當然，如果以呢一件優質豬扒嚟講， 價錢都尚算抵。 佢仲配有一個羅宋湯同埋一杯嘢飲。 我嗌咗薏米水， 都只係需要加兩蚊。豬扒唔係一般茶餐廳嘅豬扒， 厚身而有肉汁， 非常大塊。 配上蘋果蓉，非常合襯。 豬扒厚身嘅大大件隔離枱望見以為我仲食緊一嚿雞扒。埋單總共100蚊。 雖然係葵興呢個位置，但係佢嘅質素性價比算係相當高。…查看更多