1%$回贈
。其實，晌成條「白加士街」都有好多餐廳，競爭都幾激烈，留得低嘅就有番咁上下實力。小店唔大，一字長形直入，最吸晴就喺每幅牆上嘅彩繪，好韓風，整體環境整潔企理。而餐具、紙巾都放晒晌枱面，並有冚住，唔會食塵，感覺會比較衛:)。除咗一大堆散點菜式，仲提供好多款一人餐、二人餐、四人餐……等等，而且，定價親民，有啲計起嚟抵過去快餐店食。啲侍應服務好，又有禮，卻唔收加一添。用二維碼落單，唔使多講，大家都好熟用。但值得一提，喺我哋打算點個平平哋嘅二人套餐$228，包兩杯飲品、半隻炸雞、炒粉絲同紫菜包飯，入到點餐版面竟然只賣$178，真有驚喜
。
泡菜、大豆芽
食韓國菜其中一大特色，就喺餐前必奉送韓式前菜，今回有傳統嘅泡菜同大豆芽，講真，都好少見到啲韓國餐廳嘅前菜會做得差，作為食每道菜嘅過場就最好不過。凍蜂蜜檸檬茶 +$5餐飲方面，老友喜歡飲檸茶，就揀咗呢款加入蜂蜜嘅，自己飲落再清潤啲，佢話難得個茶底亦沖泡得唔失禮，啲檸檬又無澀味，清新解膩。芒果乳酸梳打 +$8小弟就想試試啲特飲，芒果口味喺我嘅「飛弗」。大大杯梳打，加入芒果糖漿同亂酸，入口寧舍酸爽，襯晒今晚啲濃味嘢。順帶一提，呢度啲飲品晌冰量同甜度都有得揀，具彈性。傳統雜錦紫菜包飯（套餐）韓國嘅紫菜包飯跟日式嘅壽司卷好唔同，雖然外觀類似，但唔會好似日式咁搞咁多花款，好似呢款咁傳統，就捲住青瓜、煎蛋、黃蘿蔔、甘筍、雞肉同牛蒡，口感清爽，味道清新帶少少麻油香，而且，感覺好健康。烤牛肉韓國炒粉絲（套餐）以往，會覺得嚟食炒粉絲，唔喺嘛！不過，自從睇過韓國綜藝「尹食堂2」，對韓國炒粉絲情有獨鍾。當然，佢哋嘅粉絲同我哋嘅粉絲好唔同，粗身好多，煙韌好多。加埋啲洋蔥、甘筍絲、牛肉一齊炒，又落咗唔少香油，牛肉入味又嫩口，粉絲煙煙韌韌索滿汁，好食。亞之媽炸雞（套餐）炸雞除原味，仲有甜辣、蜂蜜芥末、牛油蜜糖同芝士味，而蜂蜜芥末喺小弟最心水。標明半隻，真喺無呃秤，睇見咁大盤就知份量足，一身金黃，甚為吸引。趁上枱仲熱焫焫就先試為快，咬落外層脆卜卜，沾滿蜂蜜芥末，味道突出，加上無骨，啖啖肉，肉質都幾嫩滑，真喺一嚿接一嚿。伴菜仲有啲青瓜絲同醃白蘿蔔，作為間場就最啱喇。芝士海鮮煎蔥餅 $98整個套餐嘅菜式都好食，就追加多一份韓式煎餅，有芝士，有海鮮，呢款煎蔥餅就最得我心。不得不讚個煎餅煎得香口，裡面有好多海鮮餡料，加埋面頭大量芝士，食落去餅身軟糯，口感豐富，又帶少少蔥香，確喺做得有水準。今餐真喺好豐富，除咗套餐勁抵之外，其他菜式都唔貴，而且，整晚嘅招呼唔錯，上菜又快，值得再嚟。…查看更多
:)…查看更多
