影片
在OpenRice平台上暫時未見到石門分店紀錄，所以先將食評寫在大埔分店名下。如有不妥，煩請告之，會將食評刪除，謝謝。好喇可以入正題喇，小編路過石門見到京瑞廣場二期（下稱「京二」）好似葵廣咁有好多小食店，所以就去探索一下喇。咁其實京二都有唔少賣雞蛋仔嘅舖頭，亦都差唔多每一間都有芝士豬柳蛋口味。但man姐呢款係叫做豬柳蛋芝士三文治，個做法會有啲唔同。首先倒入蛋漿，以豬柳同蛋做餡，再加入胡椒調味。等雞蛋仔成型後，加上大量芝士喺面，將雞蛋仔捲起夾住，用機器嘅熱力將芝士熔化，達到拉絲效果。最後嘅成品的確就會好似商品名一樣，變成一個雞蛋仔型嘅豬柳蛋芝士三文治。正如圖片所示，成個雞蛋仔層次都好分明。芝士都唔係超市嗰啲片裝芝士，食得出芝士味，拉起絲嚟亦都好過癮。但小編個人覺得胡椒味偏重咗少少，咁呢個係個人口味問題。蛋漿有蛋香味，同埋雞蛋仔每一格嘅內部都填到滿滿，好似蛋糕咁有彈性，唔會好乾得個殻咁。整體小編都覺得幾高分。分店仲有餐肉芝士、蛋撻同麻糬等口味。值得再嚟試一試。
繼續閱讀
試左豬柳芝士蛋三文治雞蛋仔同埋海苔杏仁雞蛋仔豬柳蛋雞蛋仔裡面好足料，好好食，有口感海苔杏仁配搭第一次試，都好好食同朋友食玩已經好飽，可以取代一餐，價錢合理👍👍
繼續閱讀
叫士多啤梨格仔餅，寫到明有士多啤梨醬煉奶同砂糖。食咗一半，成口都好甜嘅士多啤梨醬＇一打開，係完全冇煉奶同砂糖。我拎返過去同佢講，打開埋俾佢睇。佢死口唔認，話自己有加到。以後都唔會再幫襯。
繼續閱讀
$30 焦糖伯爵奶茶味 雞蛋仔之前都幫襯過，味道係唔差嘅而且外脆內軟，所以經過再幫襯，想試下其他味。有位長頭髮，手指有紋身嘅女店員，本來係負責整雞蛋仔，我排隊比錢佢就收錢。原本以為佢會抹下手或者戴返手套，點知乜都冇做轉頭就整雞蛋仔。 其實整都冇問題，問題係包裝雞蛋仔個部份，佢伸隻手入個包裝袋，整返漲個袋再放雞蛋仔。其實見到佢收完錢嘅時候都已經覺得污漕，之後仲見到佢用枱布抹台。🤮🤮見雞蛋仔整好左攞得嘅時候，都唔知食好定吾食好。完全係食埋細菌落肚，點知佢張紙幣有冇跌過落地下或者其他地方，張檯布係咪乾淨。我見其他職員都有帶手套，唯獨係呢位女職員沒有。唔知佢職員定老闆娘啦，再好食以後都唔會再幫襯！😡
繼續閱讀
其實呢間嘢真係冇乜特別，佢開喺大埔最著名嘅麵包舖隔離附近，不過最好就可能係因為佢同貢茶一齊搞，因此啲人順便買開嘢飲都會買嘢食。我發現佢嘅雞蛋仔同格仔餅雖然都號稱係即叫即整，不過其實質地都唔太香脆，很像是弄了很久的格仔餅一般，你看它的外皮完全沒有脆香的感覺，因此就似軟綿綿的格仔餅，咬落口感是沒有的。有一次突然間要試呢一間man姐雞蛋仔，是因為昌運嗰間突然間休息，定還是喺新年期間佢休息，呢間比較早開，於是要試一試呢間。雖然啲人成日話昌運嗰間都係麻麻，不過比起呢一間，其實都算係好少少。
繼續閱讀