家姐生日，因為限聚令不能一家人出外慶祝，三人組就搵咗呢間小店食餐便飯。呢度個地理位置非常方便，食完飯我哋又可以去吉之島shopping。講返呢間cafe，雖然空間細小，容納大約20人，但每張枱佢哋都會擺放紙巾同搓手液，而服務同食物水準都幾好，環境又舒服，價錢又親民，下次我會再去幫襯。🍴椒鹽雞軟骨 $48⭐️⭐️軟骨太細粒又硬咗dd，炸得又唔夠香脆，口感一般。🍴雜菜沙律+牛扒 $88⭐️⭐️⭐️牛扒有醃過，肉質鬆軟juicy，沙律菜新鮮，配醋汁非常開胃。🍴青醬煙三文魚意大利粉 $158⭐️⭐️⭐️⭐️⭐️近排都鍾意食羅勒醬，呢度個汁調較得恰到好處，香滑得嚟唔會太稀亦唔會太杰，食到淡淡羅勒香，意粉煙韌度又適中，什菌同煙三文魚又非常見食，推介！🍴黑松露白菌意大利飯 $148⭐️⭐️⭐️⭐️佢哋非常細心，落單時會問d飯要唔要煮腍身少少，因為有啲人會嫌正統意大利飯太有咬口，咁啱媽咪鍾意較腍身，佢哋真係煮到好啱我哋心水，黑松露配白菌一定無得輸，好好味！🍴紫蘇紅桑子蛋糕 $35 + 焦糖咖啡蛋糕 $35⭐️⭐️⭐️⭐️⭐️叫咗兩款小蛋糕當慶祝，前一日打去問當天蛋糕款式，佢哋不厭其煩講解，又主動問要唔要寫字响碟，當日主角見到都非常surprise。至於蛋糕，係佢哋當日即整唔係買返嚟，兩款都超靚超好味，紫蘇紅桑子豬仔造型非常可愛，紅桑子味道好香唔會酸，mousse非常滑，而焦糖咖啡雖然賣相一般，但焦糖流心效果同味道都好正，整體又唔會太甜，咖啡味香濃，我哋三個極力推介呢款蛋糕。三人共消費：$320 (網上平台訂座，主餐牌單點食物半價，飲品／甜品除外)…查看更多
