麥文記麵家

營業中

休息中

今日下午要陪細妹出佐敦買野。中午少不了要找一個食午餐的地方，又不想吃太飽，諗住食個麵，便在麥文記食。午飯時間到達, 門外有人在等位。但好快就有人離座, 可以立即進內。對上一次幫襯, 已經係兩年前。 每次都叫碗細蓉加油菜。今次亦唔例外⋯⋯雲吞大小剛好，內裡充滿了蝦，而且蝦肉彈牙。皮薄及滑！ 湯頭也很清。至於麵條，麵餅放在頂部。以免被湯浸淋！麵條真係好彈牙，是有嚼勁的那種，絕對好吃。湯有大地魚香而沒有梘水味，只係真係好少份量！菜心鮮綠，菜心葉算是好吃，莖則較硬！依間麵店雖然環境一般, 也坐得比較迫, 但食物相當有水準, 可以一試

今日中午食得唔太飽，未食晚飯就肚餓，結果落樓下食碗麵，選擇左麥文記，今次試下牛腩麵。牛腩麵感覺上比雲吞麵大碗，佢係柱候牛腩，仲要有2舊牛根，唔係清湯腩，已經好多地方都無得食。牛腩入晒味又夠淋，牛根有少少爽，都好入味，麵就唔洗講啦，夠晒爽彈，連湯都正😋👍🏼👍🏼

久仰大名嘅麥文記 ，終於今日食到。來到佐敦，咁啱覆診都撞到個朋友，佢又想食雲吞面🤪就一於來試一試 。 google 話開12點，但11:45 去到已見8-9成滿座。試了水餃面，細細碗，有三大粒水餃。面條做得好出色，好幼好爽滑。至於水餃，啲肉唔係咁新鮮，有啲失望，但味道都唔算差。如果下次來 ，會試雲吞，因為見餐牌寫住「全蝦雲吞」....可能係招牌菜特別啲。

難得黎到佐敦上堂，一起身已經諗今日一定要回一回麥文記！今日終於試到，一口氣連食兩碗評一評佢！份量只要做過research ge都知道，麥文記ge麵一定係細細碗，基本上一個大男人要食兩碗先夠飽。呢個同預期中一樣，兩碗ge份量等於出面ge一碗半。湯底好明顯同外面ge好同！佢係好淡味，但係又完全唔似出面果D無味湯。當你嗒真D，就會發現佢有一種清甜清香係入面，而且完全唔涸喉，好飲。麵底小弟唔係咩金舌頭，老實講就唔太食到同外面ge麵的分別。不過，雖然食唔出，但睇得見，麵底明顯唔似出面果d咁黃咁白，而係近似雞蛋面咁ge顏色！戲肉雲吞麵雲吞好得，一碗有4粒。完全食得出係用新鮮蝦去整，而且調味方面亦係好高水準！牛腩麵呢個係我食過最好食ge牛腩麵！佢ge五香牛腩完全係用清甜黎易容，食落唔會過咸，唔會蓋過牛肉味，而且燜得好淋，完全唔起渣！牛筋簡直係正到不得之了，可惜得一舊。呢碗麵ge水準係超級高！

港式食物之中，雲吞麵係我其一個最愛，每當去左外地回港，都一定會掛住港式雲吞麵。由於今日早左食飯，故此到下午茶時間就出去搵食，麥文記雲吞麵勝在唔係好大碗，食完仲有位置返屋企食晚飯⋯⋯過左農歷年加左$2蚊，但好在無減少份量。最愛佢啲湯仲有韭黃係啲麵底，加少少醋，更加好食，啲雲吞入面蝦又大隻又爽口，雖然湯底有時濃有時淡，似乎人多會比較淡，但勝在雲吞比佢隔離嗰間大粒，麵又比佢隔離間大碗，所以我多數會食麥文，除非星期六、日要排長龍啦。

今日午餐時段唔覺得肚餓，遲咗出去食。行到去麥文記先記得原來無攞銀包。咁我見門口有貼微信支付，但我都係無，問收銀員有冇支付寶，佢話有。正，叫我坐低。由於唔係好肚餓關係叫咗個細蓉。味道：✮✮✮✮雲吞大大粒，蝦肉爽口。麵質彈牙，水準keep到！環境：✮✮✮✮典型茶餐廳格局，座位細細。服務：✮✮✮✮服務唔錯，重點係支付寶，估唔到傳統老舖有支付寶，有驚喜。抵食：✮✮✮✮味道好食嘅，但抵唔抵就見人見智 =P。

今日起身突然有個念頭想食久違既豬手撈，所以岀左去佐敦食。咁好彩去到竟然唔使等位👍🏻👍🏻一坐底唔使諗即叫豬手撈，此時已經門口排隊。有三隻大豬手，好重南乳味好夠味，一條毛都無清理得好乾淨，但唯獨係我覺得可以再淋啲就完美。另外幼面好爽口彈牙，加埋南乳汁無得彈。成碟碟頭都唔細，一個大男人食一碟都已經夠飽。

星期六要去佐敦買野，所以放工同男友去左佐敦搵食。佐敦最出名莫過於澳牛同麥文記，但就算落住雨，澳牛條人龍排到去街尾，反而麥文記短好多，所以lunch 去左食佢。入到去有卡位坐，但兩位要坐埋一邊搭枱，都幾迫。啲侍應算客氣，比我地坐低慢慢諗食咩。最後我地叫左雲吞撈粗，同南乳豬手撈麵。雲吞有五粒，唔算好大粒，但啲蝦好爽，味道都唔錯，粗麵有咬口，夠彈牙又無鹼水味，抵讚 ! 南乳豬手舖滿碟，隻隻都大大舊，個南乳汁好香濃，配撈麵一絕，豬手夠入味亦唔算好硬，但如果可以炆得再林啲會仲好。正常撈麵都會配碗湯，但佢碗湯一啲都唔好飲，我試左一啖就放棄左佢。

今日一連踩兩場。。午餐食完yamm buffet。。。下午茶就走黎麥文記。。可能大雨嘅關係所以都唔算多人仲有個卡位坐😅一坐低望下幅牆嘅餐牌。。。直接叫兩碗雲吞麵。。上枱時覺得兩碗面嘅面都淥得剛好。。吾會漲晒。。色仲好黃。麵還好脆口。湯底就普普通通啦吾算濃。。吾覺大地魚味雲吞size 適中。。蝦肉夠爽。少少肥肉。。配搭味道剛好👍仍可一食再食。。。值得幫襯😍

話說前排韓國綜藝節目Running Man黎左香港，佢地去左呢間位於佐敦的雲吞麵店，見到佢地食，就諗起自己好耐冇食過同埋未食過呢間名店，於是就同友人黎試下。麵店是舊式裝潢，但好乾淨！坐低後點了一碗雲吞麵試試！發現原來真係好多外國人慕名而來，成間麵店麵係韓文同日文！雲吞麵($36)，價錢雖然並唔算好平，麵都唔算大碗，但係雲吞入面的蝦好彈牙，皮薄餡靚！雲吞麵爽口，湯底亦很清甜！其實從小就唔太中意食雲吞麵，但食過呢度既雲吞麵之後，我改觀了！價錢唔算平，但可以再試！

麥文記是佐敦老字號，現在很好生意，可能因為改進一大步：雲吞餡用了鮮蝦，以前就是大量豬肉，和滿滿的油浮面雲吞麵36$ 一碗可以說貨真價實：因為面比較講究，雲吞也鮮巧點隔離麥奀記都不只這個價錢。深仔記平只要29$但一分錢 一分貨⋯⋯這裡有韮菜花，也是取鮮嫩部位，24$知音客大有人在，可能不易食到韮菜一年到頭，😊🌱好的貨別的面店未必有供貨生意其門如市都是熟客如果嗜吃雲吞可以一碗淨雲吞一個水餃面不然不夠飽

成粒雲吞真係冇豬肉咁濟唔洗怕有肥豬肉食得好放心😚減肥嘅朋友們可以satisfy下想食雲吞餃子嘅craving一碗八粒啱啱好～補充下lean protein!🤤唯一美中不足就係調味有點多唔係好食到蝦本身嘅鮮味不過都已經好好了 一定會encore❤️

今日經過佐敦，原本想吃澳牛，但門外的長龍令人卻步。於是轉去了旁邊的麥文記麵家。門外張貼了雜誌的介紹，是間老字號麵店。最出名的是細蓉，即雲吞麵，不過雲吞麵只有普通飯碗一碗大小，怕不夠飽，於是點了雲吞撈麵，一碟撈麵有6粒雲吞，雲吞面灑了點蝦籽，配一碗清湯。雲吞是好吃的，內裡的蝦非常彈牙新鮮，雲吞皮也薄。麵也非分彈牙，沒有鹼水味，值得一讚。另外還點了一碟韭菜花，韭菜花比較少地方能吃到，輕輕灼過，淋上豉油和熟油，非常清香。不過可能因為主要做遊客生，以雲吞麵來說價格實在偏貴，而且份量不多。

有40多年歷史的麥文記，店舖細細，座位較迫，但仍是常常爆滿。中式既麵食 尤其是雲吞 係呢度得意之作。雲吞是全蝦去製造，冇豬肉做餡料，咬落非常彈牙、爽口！！！真心推薦！！！叫左碗淨雲吞，有8粒！豬手麵都係佢大推既，南乳豬手都好腍滑，但南乳味唔太重，唔係話食落會嘩一聲既。麵底鹼水味唔強，但煮得唔夠耐，有點硬，以至要咬得好辛苦先可以咬斷，如果胃唔太好或牙齒唔好既人，就會食得比較吃力！🤒🤒🤒炸醬撈粗，炸醬既味道調較得幾好，最欣賞係佢全是瘦肉，可以平衡返炸醬油膩既罪惡感！但份量唔多，男士一定唔夠飽！店員態度麵友善，但的確坐得唔太舒服。

窮遊香港-正宗香港傳統細蓉👍🏻即刻like @hkfunfoodrecord 同follow先啦.今日開始講下香港傳統野食簡單講講個名點黎d人叫佢做芙蓉麵 叫叫下細碗就叫細蓉啦「細蓉」為1個1両重的乾麵餅配以4顆餛飩.直講野食呢間既細蓉 可以話係好好食⭐️上湯雲吞麵$36👍🏻正宗既細蓉係麵放表面 防止麵質變軟👍🏻底下有4粒雲吞 雲吞係好大粒既👍🏻而特別之處係‼️每粒雲吞有2隻大蝦 夠鮮紅‼️爽口‼️彈牙👍🏻基本上冇其他野啦 （🤦🏻‍♀️掛住食冇影雲吞圖）👍🏻麵質彈牙 有鹼水香味 唔會太重鹼水味👍🏻湯底清甜 （傳統係落大豆芽、豬骨、蝦頭及蝦殼、烤大地魚乾去煮湯底）🤔但我就睇唔到啦👍🏻基本上完美 🤔但份量好小🤔男仔可能要食2個以上‼️唔算平民 但旅遊推介比朋友‼️或者得閒食下好野 都唔錯既.價錢值唔值就唔多評啦有人會覺得日本野食貴d冇問題點解傳統野唔得呢？支持香港傳統美食.#麥文記麵家地址：佐敦白加士街51號地下.⭐️評分：味道：5/5 完美好好食既細蓉環境：3.5/5 坐位好迫 有老店feel 但整體裝修勁新服務：3/5 係澳牛旁邊...服務係特色.....衛生：5/5 餐具白淨 勁乾淨！抵食：3/5