香江大酒樓

營業中

休息中

9月29日晚，與家人慶祝中秋節，在香江大酒樓訂了2圍，一行24人，當晚上菜速度，一個菜要等30分鐘，酒樓經理都不停向我們致歉及協助跟進，我們都體諒及明白。家人在30/9早上，發現昨晚食飯時，遺留了一盒家人送禮的月餅在酒樓，於是嘗試致電酒樓查詢，酒樓接電話職員回覆：（有同事收工將月餅帶咗返屋企）安排我哋明天中午12:00到酒樓查詢，到時聯絡酒樓黃小姐到了1/10 13:00左右，我們到酒樓找黃小姐查詢，黃小姐即時回覆：（我哋同事冇將月餅拎返屋企，我們當晚執到月餅盒是空的，會唔會你哋屋企人聚餐時已食咗，我地見到月餅都驚，點會我哋食咗。）對於酒樓既回應，我們都表示不滿，一肚氣希望酒樓有關部門能夠協助處理我們的不滿

已經唔係第1次‼️‼️。母親節第一次黎飲下午茶當時無乜客，仲有好多空枱於是問阿姐可唔可以坐大張少少當時阿姐已經好大聲喝我：坐嗰張呀！我以為佢聽唔到，我就問多次又係好大聲喝我：呢張唔得呀！坐嗰張！。嗰次體驗已經十分差。今日再去，提早飲個父親節茶又係無乜客一開始叫左叉燒包，黎錯左雞仔包算啦，以為自己落錯單就照食。隔左陣加單要牛肉球同奶皇包點知又黎左蝦餃即時同位男經理講當時佢態度都係好差黑口黑面好似我地欠左佢咁。然後佢印張單出黎比我地對發現一開始叉燒包嗰度真係廚房出錯左然後第二次就係樓面落錯蝦餃咁我地就叫佢地加返牛肉球。於是，我地等呀等呀等左半個鐘就追佢地個牛肉球同奶皇包阿姐話做緊。好喇，到40分鐘我地問阿姐阿姐竟然大大聲話：廚房好忙咖！下？廚房忙？一來當時好多空枱二來你廚房忙關我咩事？我地等咁耐仲要比你喝狗咁喝？於是我地話要取消個阿姐又話：咁你直接去埋單啦！。聽完我同屋企人都好嬲埋單時同門口阿姐講個阿姐就話：佢係咁咖，講野大大聲但無得到任何道歉或一句唔好意思。真心嬲，唔會再有下次‼️‼️

佢可以令我專登去出一個post去寫劣評 可想而知可以去到幾差！ 今晚難得同屋企人食飯 就去間屋企附近既酒樓食喇 7點幾入去 然後落order 落左4個餸 啲餸好似唧牙膏咁出 唔講以為食緊西餐 一道一道咁出 足足出左一個鐘都出唔曬 好唔好食都唔想comments 因為真係比佢搞到冇曬心情食落去 真係為求開開心心食餐飯即 但如果真係要等咁耐點解唔可以同個客講要等咁耐呢 同佢地講話等左成個鐘 得到既回覆係 廚房冧檔啊！ 咁會唔會係關我事呢？ 明知呢個星期多人做節都唔安排得好少少 呢餐真係食到好谷氣 可能去茶記食都唔會咁嬲 如果有心想做落去 唔該安排得好啲 仲有就係 唔只我呢一枱客等咁耐 呢啲大時大節真係唔好去呢度食飯喇

早前約了朋友在青衣午飯相聚，有人提議到長發商場的香江大酒樓。今天是星期六已見有很多食客在等位，酒樓佔5樓全層的一半，面積都很大裝修有點舊。今天點了一個套餐，計有燒鴨半隻、豉椒炒牛河、蕃茄煮菜芯， 點心三款:叉燒包、排骨和牛肉腸粉。最先來的燒鴨仍是暖暖的，而且 燒鴨醬汁的味道很香濃，並且已滲入鴨肉内，鴨肉嫩滑亦不算太瘦有點肉。豉椒牛河的河粉尚算幼滑，但主角的牛肉質量不好太多筋，有一半牛肉都咬不動。用蕃茄來煮菜芯，個人感覺就有點怪怪的，而且菜芯亦有點煮得過稔沒有咬口感。三個點心的叉燒包外皮甜美，叉燒餡亦很多。排骨肥瘦肉比例均稱，遺憾是有點蒸得過老的感覺。牛肉腸粉皮不算厚但有點粗，内牛肉餡料亦算多，味道就一般般。總結今個午飯以屋邨商場來說，酒樓地方坐得舒適，而且價錢相對經濟，食物的質與量都中間水準，下次都會再來一試。

今日諗住帶爸媽去飲下午茶，一入去冇人帶位，門口職員掛住傾計，唔望你只係來手飛左張點心紙俾你。我地自己行入去，搵左張枱坐低，但係有職員話你地咁少人唔好坐咁大張枱，（嗰張枱係四人枱，我地三個人）佢指左我地去坐另一張枱。跟住又話我地做咩唔坐前面，我話前面冇枱，佢死都要我地起身，我問佢前面邊張枱，佢話你唔起身點話你知，跟住我地起左身，佢就行開左，冇帶我地去一張可以坐既枱，我地行到去前都係冇枱！結論：都未食野已經唔推薦，永久blacklist!

事關屋企人獨愛去酒樓，天寒地凍費時行咁遠，隨意選了樓下呢間酒樓，早知睇完評論先去食。食物無影相，總括嚟講，又貴又難食，服務態度麻麻。隔離抬叫羊腩煲，發現有頭髮，羊皮上滿滿羊毛，嚇得啊姐叫經理來，點知啊哥經理反駁一句：「你都就快食晒，咁你想點？」嚇得食客啊姐與同抬家人無言相對。最後經理面黑黑話：「送多盤菜比你啦」都真係唔知講咩好我個抬叫左湯，等了50多分鐘，催左幾次話整緊，唔同經理口徑一致又話跟緊，最後等唔到個湯，因為所有嘢食都已經食晒，咁我哋就埋單走人，點知原來係冇湯供應，咁你一早講啦，搞到成家人呆咗咁坐喺度等。冇咩事都唔好去幫襯，貼錢買難受，冬至費事同你嗌交埋年。

今日一朝早2個小朋友就起咗身要去公公度玩，8:00am就到，唔係好多人。食物一上枱，2隻怪獸就夾左去食好脆口！個涵好實淨，好香蒜蓉同蝦味！鳳城水餃個雲吞皮好滑入面係木耳同有葱咁，個人唔喜歡有梘水味，不過接受到個小小梘水咁。叉燒包真係麻麻地，因為佢咬落去個包會漿住係口，同埋佢好似將啲叉燒打醬做涵，我覺得咁樣麻麻地。潮式糯米卷呢個好食！啲糯米同花生都好香個包面都好軟熟，弟弟食咗1舊。黃金糕爸爸鐘意食呢個，不過我覺得佢甜左啲。口感都ok嘅，係幾煙韌蝦餃呢個都係屬於皮薄涵靚5蚊咁大粒，漲卜卜有蝦味嘅！鳳爪排骨飯個飯比較濕，鳳爪好食，啲醬汁入哂飯，呀仔都食咗1半。燒賣我覺得燒賣麻麻地，冇以前咁好食不過有大粒冬菇，啲蝦都好大粒。環境可能叫仲早，8點去飲，都乾淨嘅…枱與枱之間有大塊膠板隔住，會安心好多。

其實我都好耐未嚟過呢間酒樓飲茶🫖，純粹諗住陪下屋企人，又近巴士站先揀呢一間😅點知覺得自己中咗伏😅之前喺度食晚市都唔會有呢種感覺，唔知係咪自己嗌啲嘢比較特別😅但真係完全食唔落😅不過燒賣係正常啲，我嗌咗鵪鶉蛋燒賣、酥炸魷魚鬚、鍋貼、叉燒腸粉都真係好奇怪😅魷魚鬚收我呢個價，張相嗰個係食淨😅都估到佢幾難食😅不過講返句公道說話，鹹水角，燒鵝瀨、棉花雞都係正常嘅😅但係總括嚟講佢真係退步咗好多，唔知係咪轉左人做定無心做🥲不過以後唔會再嚟😅

第二餐嘅中秋團圓飯揀咗青衣一間屋邨酒樓，5個大人1個bb，都係散叫。味道一般，性價比低，其中一款龍躉兩食就真係有啲搵笨，蒸嘅唔係頭腩，係無咩肉唔要嘅位，雖然唔係第一間酒樓咁做，今次老人家有有微言。粟米魚肚羹，無特別。化皮乳豬(例)，肥瘦均勻，夠脆。晚飯組合B：碧綠炒龍躉球，果皮蒸龍躉頭腩，薑蔥焗美國桶蠔賣晒轉蒜蓉粉絲蒸元貝。碧綠炒龍躉球，呢款公道，魚肉大片又厚，肉質都新鮮。果皮蒸龍躉頭腩，唔係頭腩，仲要無咩肉，亦食得出唔新鮮。由桶蠔轉嘅蒜蓉粉絲蒸元貝，唔係大元貝，普通size，都幾好。組合升級：瑶柱貴妃雞(半隻)，幾滑。椒腐通菜炒牛肉，幾大碟。椒鹽鮮魷，成碟都無咩味，鮮魷亦唔係太新鮮。

今日3點左右去左買外賣，兩盒飯加兩個點心，張單收左我四個飯盒錢和兩個袋錢取餐時佢兩個點心放在一起，三盒用一個袋裝住，我善意提醒收多左，只係講一聲，都未叫佢退比我，點知個紅衫職員態度極差，一手搶左我張單仲話已經收平左坦白講野食係ok，但唔會再幫襯了

伏到爆，唔係就腳既話完全唔洗去食。一去到冇執台就叫下輪客坐， 台布都係濕既， 餐具全部都有黑點，要靠自己沖走佢地，落野食叫極都冇人黎，待應會講話我做得邊樣先….叫普通蒸點等30分鐘都未上。

星期六上午飲茶，但被執枱職員罵我媽眼神凶惡，但我媽無罵人也沒有說話不禮貌，她一過到黎就破口大罵，我們說下次不來，她還叫我們下次不要再來，太氣憤之下離開，我不明白為何飲茶要被罵，我以後不會再到這間酒樓飲茶!

今日4月29日我地4個人去食左個圍餐有幾味菜講多無謂自己睇相第一味燒雞係好食，雞夠味皮夠趣第二味有4隻沙律蝦球，隻蝦有半舊係粉。。加4舊西蘭花，想知咩味?你去百佳買舊西蘭花放落清水煲煲熟就知，應該同我食果舊一樣第三味有個菜羹，好似食鼻涕咁，得小小麻油味，d菜爛到可以當糊仔比兩個月大既bb食第四味食蚌，一淡入面有十幾粒沙，鍾意食沙既朋友唔好錯過第五道菜有條魚，有白蘿白蒸魚，同你平時飲湯食既魚渣一樣，要點鼓油先食到小小第六道有個魚翅飯，坦白講地下街市燒味鋪對住果間碗仔翅仲有味過佢，雖然我都已經無再幫襯街市個24蚊難食翅最後有個桂花榚甜品，無咩特別做總結，如果你肚餓既我建議你食隔離間薩莉亞會好d，雖然佢有小強唔衛生，但呢間我食完都係肚痛，咁不如食間味道正常既做隻飽鬼唔記得講，餐佢標價4人600蚊，本來我都無打開review，不過我唔想各位大時大節食完家嘈屋閉仲要唔飽所以先打咁多字，唔講住啦，我岩岩食完兩個鍾要去煮野食先，多謝收睇

青衣長發邨,新張晚飯特惠。脆皮燒鵝皇=>半隻$128, 香脆的外皮,鵝肉鮮嫩,留有肉汁很junice,果真是燒鵝皇。美國龍蝦=>半隻$49(兩位起,每位半隻)，龍蝦份量大隻,肉質鮮嫩彈牙, 美味可口。瑤柱蛋白炒飯=> 香噴噴瑤柱+蛋白炒飯,飯爽身有飯味,真棒。菠蘿古老肉=> 新鮮菠蘿配鬆脆炸肉,酸甜美味。西芹蝦仁腰果=>西芹爽身,蝦仁鮮彈,腰果甘香。一口牛炒小薯仔=>牛肉粒鮮且煙韌, 小薯仔又棉又軟,正。一家大細聯誼實惠之選

作為屋邨茶樓黎講，呢間酒樓算幾好食。蜜糖雞翼皮脆肉嫰；有其他酒樓少見嘅炸魷魚鬚，新鮮熱辣；放入口仍然熱辣辣嘅耐雪菜肉絲炆米；翠綠爽甜嘅菜心。至於其他點心都不過不失。。