食全食美 (已結業)

今天小妹同一個朋友經過深水埗口痕痕想食D辣野，咁岩經過有間重慶火鍋店就同朋友入去試，我地叫左佢地招牌菜，「紙包魚」因為我同朋友都可以食得好辣，所以我地叫左個大辣，可愛之處條魚可以叫全邊同大邊或者細邊，我同朋友叫左大邊，佢拎出黎係有張紙包住條魚，我問佢呢條咩魚同用咩紙包？(因為未見過)老闆娘好好人，佢好詳細咁解釋魚係用魽魚，紙係用鐵樹，老闆娘話可以用於食物上(安全)，我同朋友食完條魚覺得好入味，辣既程度岩岩好，老闆娘好溫柔咁提我地小心魚骨，其實食落條魚又無乜骨喎，反而仲好肥美啲魚肉之後我同朋友又叫左個麻辣豬耳同夫妻肺片雖然都是辣的，但對於喜歡食辣的朋友真的是恩物，佢地都有分小，中同大辣話說回來麻辣豬耳食落有口感，好爽好脆(好食到唔識形容)同埋，因為我同朋友都比較大胃最後我地又叫左個烤魚試試，叫左個細邊，我再問老闆娘之前我同朋友食個個紙包魚係用蒸既，而烤魚就係煎過既，同樣大辣蒸同煎既分別係蒸既魚肉會滑啲，啲汁會索哂入條魚到，反而煎既會乾啲，但口感會香口同脆啲，食完仲可以另加肥牛，豆卜等等加入個魚到當火鍋(當然侍應會加湯水)總括黎講老闆娘同啲員工服務態度都好好，老闆娘好靚女又好溫柔 過黎食飯

小弟今日帶屋企人出來搵嘢食，悶悶啲食下啲火辣辣嘅嘢，係青山道搵到間四川嘢，名係食全食美，幾過癮，好在附近停車好少抄牌，所以停正門口。一家人就咁衝左入去，小弟頭陣入到去，見間鋪都好乾淨，選擇左張檯坐低後，突然聽到把唔鹹唔淡嘅廣東話問幾位飲咩茶，小弟心諗間嘢應該係四川人開嘅，今次應該冇走雞啦。因為早兩個月前係附近間川婆婆食過四川嘢，實在有點欠缺地方風味，有點失望。好今次就叫下啲正宗重慶嘢食下味先。小弟叫左四川涼粉，麻辣豬耳，夫妻肺片做前菜。食左先，唔得就即刻走人，費事對唔住屋企人。第一個來嘅係涼粉，小弟一試…………係好好味，但點解唔係咁辣嘅，搵左個女仔一問，佢話怕香港人唔食得咁麻辣，所以冇整咁辣。我即時叫佢整返四川正常辣味。前菜試過，好得下。就再點個紙包魚，雞煲，酸菜魚。等左一陣先來嘅係酸菜魚，睇樣好得，一試啲湯，正，屋企人都話味道好正，小弟未等來第二個餸竟然已經食左一碗飯了，再來紙包魚，好得意啲紙包住啲魚來煮，不過因為要等待嘅關係，所以雞煲到左，可以即刻食得，即刻食舊雞，同平時食啲雞煲味道有啲唔同，但好好味，好獨特。到食紙包魚，好好玩，打開張紙，條魚原來係孜然搞嘅，好好味道。一家人食飽飽

朋友介紹來呢間試下 食咗一個雞煲同紙包魚 真係冇食過咁正即 仲有好多家鄉野 老闆娘都好好 好熱情 衛生都唔錯 仲有個甜品 好涼爽 原來好多餸都係自家整即 健康又好食 下次會帶多d朋友黎食 正啊