7
7
5
電話號碼
68100111
營業時間
星期一至日
07:00 - 00:00
以上資料只供參考, 請與餐廳確認詳情
招牌菜
見到銀鑛灣酒店有生日優惠，包半自助晚餐，早餐，仲送生日蛋糕，加埋住一晚都係938，所以就同媽媽遠渡而黎一試。6點半黎到，唔算多人，環境都好乾淨簡潔。但眼前個個都一pair pair, 內心都有點不是味兒。幸好家母都算是美魔女，情侶檔feel 呃得下人。先㨂一下主菜，本身仲諗住一個叫扒，另一個叫下意粉， 居然無， 最後唯有叫左兩個扒。哈！一場黎到無理由叫中式飯吧。等食之際出去攞野食，真係一眼睇晒，menu上有d 沙律款其實佢都無既，選擇真係唔係好多。最好食係沙律，凍蝦其實唔算好鮮甜，個款不太結實，但加左海鮮醬算幾好食，所以最後都食左至少二十隻。煙三文魚色水真係唔係好得，暗暗黑黑仲好咸。泰式鳯爪除左面果層d 汁有味，食落去其實係無味。(記得要自己取汁)羅宋湯最好飲最正常，飲左幾碗。望住堆甜品，我的媽！蛋糕好乾身，有個唔知係咩布甸？質地好實，食落有d 雲呢嗱味。 甜品黎講最好食應該係芒果啫哩望見個糖水，我的天！蕃薯糖水個色紫到好似利賓納咁，有d 可怕，不過味道正常。望埋個生果，我的神啊！生果真係得蘋果，同酸到爆既綠色的柑，真係酸到核爆。主菜叫左香煎豬鞍配白菌汁， 塊扒超級大。肉質算幾爽，不過無咩肉味。伴菜都係hea hea 地，最好食應該係條粟米。香草羊扒配蜜糖汁， 呢個反而係最好食，不過見佢好似好生咁，有d 位唔敢食，個汁甜甜地點粟米唔錯。登登登登， 最後出場既係生日蛋糕。味道係紅莓mousse cake, 味道好甜，賣相唔係好得，仲用個紙碟裝住，真係好鬼hea..食物其實真係一般般，唔好抱有期望都ok.如果唔係有呢個優惠就應該唔會黎喇。
繼續閱讀
趁住兩天假期，與男朋友一起離開巿區，到梅窩渡假，入住銀鑛灣酒店，晚餐我們決定留在酒店餐廳用膳，有半自助餐或自助燒烤供選擇，我最後揀選了半自助餐，除了主餐外，有自助前菜、甜品及飲品可供選擇，雖然款式不多，但味道都尚算不錯👌我點了檸檬牛油汁伴龍脷柳，清新的檸檬牛油汁，配上大大件香煎龍脷柳及炸薯條，一點都不覺得油膩，另人胃口大開。而男朋友則點選了香草西冷牛扒，香草味濃郁，但牛扒就過份熟透，咬口較韌，影響了整體的味道，不過仍算好味。重點是一邊食住美食，一邊望住沙灘美景，真是能夠放鬆心情，增進食慾的好地方
繼續閱讀
男友生日，上網見到酒店有生日套餐優惠，所以決定來避世兩日。套餐包含係酒店餐廳嘅半自助晚餐，即係前菜及甜品任食，另再加主菜。餐牌上睇落都好多嘢食，而實際上係無咩選擇。甜品沒有餐牌上嘅精選蛋糕，生果係蘋果同梨。因為之前都有睇過下啲評論，所以我哋都不抱有任何期望。煙三文魚嘅顔色好似浸煙水浸咗好耐咁，睇落唔新鮮，亦都吸引唔到我夾落去。沙律嘅味道普通，還算可以。蝦嘅味道都尚算可以，男友都覺得啲蝦係眾多前菜中來講，算係唔錯其他枱嘅食客幾乎都係成碟蝦拎來食。主菜我哋一個揀牛，一個揀豬。男友以“茶餐廳嘅牛扒”來形容尼塊西冷。食落肉質幾嫩，味道亦不差。男友解釋話應該係浸咗蘇打水，所以塊扒先咁大塊，肉質先咁嫩。好似都幾有道理🤔到我嘅“豬鞍”，其實即係豬扒。右半邊嘅肉有啲脂肪，所以比較嫩。個食到另一邊就變得好乾好“鞋”。成碟最好味嘅係粟米🤣來到甜品，椰汁糕清甜爽口，奶凍好香雲尼拿味，不過口感似係燉蛋🤔另外仲有餐湯同埋中式糖水。都係兩樣可以話係好味既。餐湯係羅宋湯，仲有好多蔬菜係入面，絕對唔係清湯寡水！木瓜雪耳都好足料。我去盛嘅時候已所剩無多，但都仲可以有雪耳＆木瓜。其實餐廳環境唔錯，但食物方面可以有更多進步空間。不過因為係套餐，所以一開始就不抱有希望，所以亦不算失望。最後生日套餐仲送埋生日蛋糕。蛋糕係芝士蛋糕，味道亦不錯，食落唔會太“流”。當係飯後甜點都不錯
繼續閱讀
復活節最後一天唸住寫意下, 見佢下午茶有D遊客係度飲啤酒，好似幾休閒，又望住個海。當晚對住個海BBQ, 燒烤只得我地一台, 唸住夠清休, 點知....... 雖然見到網上有劣評，心唸唔會甘差掛，點知就中伏啦, 食自助燒烤，佢D材料望落都好一般，全部放雪櫃, 個樣似放左好耐, 不過都算啦，都係一般野姐 完全無服務可言，燒烤坐露天，我入去歺廳拿隻乾淨碟用，個女侍應即刻跟出來問我拿咩食，我話淨係拿隻碟，因為原本隻碟已堆埋骨頭，佢話D碟唔可以拿，有骨就自己倒左佢，後來個經理出來睇下我係有無拿佢D buffet 野食，吹賬 , 後來想要杯水，個侍應叫我入去自己斟，入去見到剛才個經理，佢D水機都旡曬水，佢都唔加水，仲叫我比10蚊買支水，仲再次提返歺廳入面D碟唔可以隨便拿，佢仲問我有無去過外面既燒烤場，都係得一隻碟, 激氣 ，只係用多一隻碟姐, 話晒都係間酒店呀，佢唔同我換碟不單止，仲要話D顧客，果一歺我都食左幾百蚊，簡直一肚氣, 激氣到我要第一次寫食評, 評分係負數啦...D侍應，上下員工都甘對D客，歺廳經理都係態度好差，係唔尊重客人 差不多燒完時, 見一批內地旅行團入住, 呢間酒店專接待內地旅客，唔知係咪甘，服務態度極度差劣真係試一次都覺得非常後悔
繼續閱讀
好耐冇喺度寫食評,聖誕食既野依家先寫~因為呢期實在太唔得閒la!聖誕放左幾日假入左去銀曠灣玩,第一次入黎..知道有間好似渡假式既酒店喺度,所以決定喺度住反晚.今次喺度試左個自助晚餐~款式唔算多,果度仲有BBQ.我果晚食得最多既係冷盤,因為比較好食D,其他果D味道好普遍.唯一比較滿意既係翡翠螺,因為都幾好肉,係最大果隻碼.夠鮮甜.三文魚係厚切,但好似冇咩味~BBQ係普通凍肉貨.另外仲有D意粉,中式菜,蛋糕等...整體黎講,最建議都係食返冷盤好食D~
繼續閱讀