更多
2025-06-03
553 瀏覽
上個月去到日本旅行,由於老婆食嘢偏向少食紅肉,而和牛一類油脂咁重嘅就更加唔啱,所以,一餐日式燒肉都無試。而日式燒肉都好一陣子無食過,搵番好此道嘅親友聚一聚兼食番餐。今夜,就嚟到「D2 Place One」嘅「銀座炎藏燒肉」探店,佢喺東京銀座嘅過江龍,主打日本和牛同多處罕有部位,值得一訪。一室傳統日式嘅木系環境,配以柔和燈光,感覺幾舒服,我哋被安排坐晌卡位,感覺寧舍闊落,最鍾意喺挨背加高咗個屏風,令前後嘅騷擾度大大減低。此外,近門口有個凍櫃,放滿唔同部位嘅和牛,望上去蠻吸引。餐具、紙巾、簡單嘅調味早已放好晌枱上,玄米茶亦由侍應緩緩送上,下單可用枱旁嘅二維碼。而烤爐抽風採用下抽式,且夠強力,所以,食完成晚都唔會一身油煙味,讚。講到食物選擇,單喺用嚟烤肉用嘅黑毛和牛就已經非常之多,有啲更喺稀少部位,睇圖都令人留晒口水。當然,食烤肉就仲有豚肉、雞肉、海鮮、野菜……等等供應啦。此外,食事、一品料理、飲品、酒類及2、3、4人套餐,都一應俱全。不過,掃二維碼進入點餐版面,會發現選擇仲會多啲。菠蘿乳酸梳打、草莓番石榴乳酸梳打 $42食烤肉咁熱焫焫,梗喺要飲凍飲啦,所以,我哋同樣揀嚟冰凍嘅梳打邊食邊飲。
食烤肉咁熱焫焫,梗喺要飲凍飲啦,所以,我哋同樣揀嚟冰凍嘅梳打邊食邊飲。小弟向來甚好菠蘿,加埋乳酸,甜酸爽集於一身,襯烤肉真喺非常夾;而親友杯草莓番石榴乳酸梳打賣相靚仔,味道清新酸爽,配烤肉真喺無得輸。
啲和牛有多款拼盤,揀拼盤當然比散點划算,我哋就點咗一份4點盛,唔使擔心唔知自己食咗乜,每款肉都有個牌仔介紹,包括:和牛上等肋肉、和牛肋肉、和牛龜之甲同和牛鞍下,睇到個賣相同啲和牛嘅色澤,已叫人心動。
炎藏和牛「極致」4點拼盤
$398
13 瀏覽
0 讚好
0 留言
有個「上等」二字,信佢喺好嘢嚟,試試佢先。睇上去油花好靚,加上厚切,燒到微焦,入口既有肉味,又有脂香,肉質細膩且極富肉汁,不失上等之名。
呢一款裁出嚟更厚身,外型就好似平常食韓燒嘅牛肋肉咁,但就切成一件件,而且,仲鎅晒花。比起和牛上等肋肉,呢個肉味更濃,口感軟腍有嚼勁,沾點鹽,肉味更突出。
好特別嘅名,唔止第一次食,個名都喺第一次聽,原來喺大腿一個位置。裁成薄切,輕輕焫一焫兩面就食得,油脂無咁重,肉質細緻嫩滑,油香跟肉香都較平衡。
又喺一個未聽過嘅部位,但賣相真喺吸晴,薄薄嘅一大片,油花如大理石紋般,稱為霜降更有意境。入口油香澎湃咁晌口腔湧流,甚有入口即化嘅感覺,沾上燒肉汁真喺一流。
食完4款和牛,可謂各有亮點,每款都好精彩。跟住落嚟,就唔少得試試海鮮,選呢款「海鮮三味」就最好,一份海鮮試晒帆立貝、虎蝦同大魷筒,睇見色澤閃爧爧就知新鮮貨,童叟無欺。
海鮮三味
$188
40 瀏覽
0 讚好
0 留言
雪白嘅帆立貝喺連殼成隻擺晌爐上燒,燒至收收哋水就差唔多,入口口感鮮嫩,甚具彈牙感,此外,味道鮮甜帶點點海水鹹鮮味,絕對食得出喺新鮮靚貨。
超級大隻,真喺有成隻手掌咁大,燒至轉色,再焫一焫背脊厚肉位就食得,因為背脊位已鎅開,食用方便。咬落肉質爽口,甚富蝦嘅鮮甜味,蝦頭仲帶有少少豐腴嘅蝦膏。
大大隻魷筒已經剪成一圈圈,燒到焦黃,沾上燒烤醬汁再烘一烘,更加惹味,而食落柔韌有咬口,卻唔會好似軔到擦子膠咁,同樣好食。
食咁多肉,唔食番多少少菜平衡吓好有罪惡感,一份蔬菜拼盤有齊多款蔬菜就最好喇。啲蔬菜燒過之後,跟平時灼菜、烚菜風味唔同,又跟炒菜唔一樣,有少少焦香味,而且,收咗水,粟米、南瓜更甜,菇菌更香。
淨喺烤肉、燒海鮮,怕唔夠飽,所以,嗌一客食事,簡簡單單叫咗石鍋拌飯,嚟到滾熱焫,飯面鋪滿唔同嘅蔬菜,夠營養又健康,仲加隻日本蛋,將所有食材撈勻,食味一流,飯底仲有少少脆口嘅飯焦。
石鍋拌飯
$88
3 瀏覽
0 讚好
0 留言
最後,追加兩客甜點作結。小弟覺得柚子雪糕比較有啲似雪葩,但估唔到,咪睇佢白潺潺,好香柚子味;而另一款軟雪糕好軟滑,淡雅嘅芒果同蘋果味,食落唔錯,仲灑上少少脆筒碎,添幾分脆口感。
張貼