金葉海南餐廳 (已結業)

我係梨消費,而唔係梨受氣...12:55分入座坐低足足成40分鐘先上到枱...對於一個普通的打工仔,午飯時間得果一粒鍾,食完我係要跑返公司...吹過三次...第一次...得啦,好快到..第二次...已有少訐不滿地說,得啦得啦...第三次...更是目露兇光地說:做緊架啦,你都見咁多人,等多陣就梨...我地都好多野做架..剩係做你一個客咩.....晴天霹靂!!!好似真係我做錯野咁...你估我要你煮9 大鬼咩要左個海南雞炸...難道只雞即湯即做既再講,隻雞只係好一般的一般,仲有幾條雞毛...油飯嗎..更是冇一d香味...呢檔野唯一就係唔洗等位好...今時今日咁既服務態度...簡直令人費解,惋惜,痛心......

好少出街食晏, 睇食評見有不少笑臉, 又响公司附近, 所以嚟試試去到唔駛等位, 但係我哋舉極手啲待應都唔多理, 好似好忙咁每人叫咗個午餐, 我揀咗燒汁牛扒跟薯菜, 朋友揀咗蝦球焗飯朋友話個焗飯唔錯, 但係我個牛扒就.....一邊就血淋淋, 一邊就切到我手軟, '趙'到我牙骹都軟跟白湯, 但冇餐包, 凍檸茶略甜$50仲要加一, 以質素同環境嚟講, 貴啦

今晚成七點去了金葉晚餐.晚飯今次是第二次. 上次試了他們鎮店之寶的其中兩樣, 海南雞飯及東山羊, 海南雞飯是水準之作, 雞真係夠滑. 東山羊就ok la.今日再臨, 女友叫了第三樣的嘉積鴨, 我見到侍應哥哥端過的鐵板扒幾大份, 心癢癢叫了一客西冷牛扒.先來嘉積鴨, 像海南雞飯一樣, 有酸甜醬跟, 另外還有白醋.鴨肉還算軟, 但就真是淡味, 就算加了醬汁, 也帶不出什麼特別鴨味.我來的一份西冷牛扒, 份量頗大, 初頭還只是覺得較熟, 但越食就覺得牙關發軟, 因為部份確是靭了點, 汁也是淡淡的, 與其他食品風格一致.最後130多元埋單

日期：二零零八年8月內時間：中午12時地點：金葉海南餐廳人物：我+我阿爸食物：新加坡式海南雞飯套餐,洋蔥汁西冷牛扒套餐去買完新書後,聽阿爸話呢間restaurent d野好好食,諗住去試試.去到自己搵左個位,就同阿爸坐低.我叫左洋蔥汁西冷牛扒套餐,阿爸則叫左新加坡式海南雞飯套餐.我個餐既cream湯唔夠5分鐘就到,個湯幾hot,但係就冇咩味,睇在佢多料既分上放過佢.跟著阿爸個餐都來左啦.聽佢話咁好食,我都夾左佢d雞一舊.d雞幾軟,幾新鮮又有雞味.d油飯熱騰騰,幾爽口,不過硬左少少.最後我個餐來左啦,扒幾諗,汁真係好淡(正所謂:寧可信其有(味),不可信其無(味)-.-)d飯都幾soft.薯條仲多過飯-.-.我個餐50幾蚊太貴,下次都係叫阿爸個餐好~~(心想:我會特登由太古來食野咩?)

放工去搵野食, 來到上環海旁, 上次target了的一間海南雞飯店.這裡說正示海南島既海南雞飯店, 海南雞飯亦有 海南島式 同 新加坡式..既然有海南島式, 就當然試試所謂的正宗....說來, 是否因為我背對面向門口, 竟然沒人理我, counter阿姐揮手叫人來, 後面檯家庭截停了哥仔要刀要叉, 之後沒理我, 我再揮手, 沒人理, 我再揮手, 哥仔見到, 正在幫另一檯埋單, 佢又揮手叫一個阿姐黎落單......叫的海南島式海南雞飯, 到來變了 新加坡式海南雞飯, 當想叫另一個哥仔叫阿姐來問問, 阿姐接了一個手提, 後門走了去聽電話...., 之後由counter阿姐親自拿回廚房, 重做.真正的雞飯來了, 海南飯是兩個飯團, 除此之外, 隻雞暖暖地之外, 同新加坡式海南雞飯有何分別呢, 偶食唔出......走了, 都是沒人理, counter阿姐直接叫我出去counter埋.....回到家, 口乾乾......原來師父十足........., 海南雞, 泰式比較好.

前一排OT.老細請食飯.近近地,去樓下嘅金葉食啦.二個人,叫左個二人餐加椒鹽鮮魷同蝦多士.5-10分鐘上台.野食比我想像中大碟.海南雞比左雞脾我地.雞肉好滑.參乜牛肉就真係唔知乜又酸又甜,可能我地唔識欣賞....白菜落左好多蒜蓉.椒鹽鮮魷幾大碟.蝦多士味道一般好油,好熱氣.油飯幾硬下.

已經第二次來, 上個月一個星期日, 我們點了一個二人餐($128), 包括二碗中湯, 問可否轉西湯, 竟然可改西湯, 我要了 栗米湯, 朋友要了羅宋湯, 好大碗, 另外有多款菜式, 我們選了海南雞及參也豬 , 油飯, 不過飯比較硬, 還有一碟炒菜, 甜品要了一個雪糕和啫喱, 甚飽, 餐茶後更滿足伙計都招呼不錯, 可能位置比較僻, 客人不是太多, 相信中午生意就很好

日期：二零零八年五月十九日時間：晚上七時地點：金葉海南餐廳人物：我食物：海南式海南雞飯 (附飲品一杯)東山羊、和樂蟹、嘉積鴨和文昌雞堪稱海南四寶，其中文昌雞更紅遍東南亞，成為著名的海南雞飯，有很多人慕名前往新加坡，為的肯定不是星州炒米，而是一口令人回味的海南雞油飯。在香港要吃海南雞實在容易得很，無論中式、西式、高級還是廉價食肆，都可以找到海南雞的足跡，連美式餐廳Dan Ryan’s Chicago Grill的午市餐牌也有海南雞的份兒，但正宗而又味美海南雞，便可說是一雞難求了。海南島的特產文昌雞是正宗海南雞飯最重要的一環，但由於成本問題，香港很多食肆甚至已經棄用新鮮雞而轉投冰鮮雞的懷抱，更別奢望廚子會因應菜式，而選用清遠雞、龍崗雞還是文昌雞奉客了。金葉海南餐廳供應的是東南亞風味的食物，包括咖哩、串燒和喇沙等，當然少不了海南雞的份兒，而海南雞則細分為新加坡和海南食法。新加坡食法是以碗筷進食，油飯以碗上，並佐以辣椒醬、薑茸及黑豉油；而海南吃法則將油飯搓成球狀，佐以酸汁，並主張徒手進食。金葉的海南雞如香港很多食肆一樣，並非正宗，但味道有時比正宗重要得多，此店的油飯恰與「好時沙嗲」的相反，不黏

吃了set lunch. 餐湯有周打魚湯. 味道唔錯.馬來咖喱幾香, 牛肉幾腍. 有翠華咁上下水準.

試過海南雞飯, 講真一句. 未算最好. 雞雖有雞味. 但骨中有血水滲出. 不太喜歡. 油飯似白飯. 反而鍾意個咖喱雞飯. 正宗絲苗白飯好香甜. 咖哩汁濃稠度剛好. 雞嫩滑, 唔覺唔覺食晒成碟飯.不過我見D阿姐侍應好懶散. 經理就仆心仆命咁落力.

講開海南雞飯，坊間標榜正宗及美味的真的不小，而幾家大家都說不錯的海南雞飯店都有光顧品嘗過，亦不見得是所指的人間美味。這裡的亦標榜正宗海南雞飯，幾次路過都沒時間光顧，今次見到開上環，午餐就在這裡吧解決吧！一客海南雞飯盛惠五十三元，要了脾多加五元，這價錢比起莎巴已經較為經濟，況且還包凍熱飯品一杯。點了的海南雞飯由落單到送來前後沒有三分鐘，雖然當時光顧客人不多，但很清楚是已經預先斬妥。煮雞用的雞湯加上百靈茹再加上幾件珍肝及腎來作配湯，幾正宗，但湯裡的雞味不見鮮甜；三色醬油幾正宗，酸辣醬都幾冶味；這裡的海南雞是連骨的，要脾這決定都幾正確，因見前桌食客檯面雞骨滿佈已知一二，而脾位可說啖啖肉，而皮下呈Jelly狀的雞汁亦相當美味，不過就是雞味欠奉，要靠醬油補充；這裡的是雞油飯，幾爽口及不油膩，算是不錯的飯底了；這裡伴碟的炸腰果反而甘香鬆脆，可恨份量挺小呢。所點的凍鴛鴦小甜只是合格，咖啡奶茶味不見凸出，以標榜海南餐廳的這裡都不太強求了！其實這裡的海南雞飯正如題一樣，不算最好但可以啦，因始終雞味欠奉，是否現階段想一嚐鮮雞味道的話，都幾困難。今次評完這裡的海南雞飯，下趟都應該輪到好時吧！

初四開工大吉，在公司叫外賣吃，同事推薦這間外賣便宜，當然要試試看。海南雞飯外賣都要＄４０，所以大家也沒有選它了。最後我吃了牛肉喇沙湯米粉，味道過淡，有點失望。不過在這一區以＄２９元吃餐有飲品，不過不失啦。

都一段時間前幫襯架啦.. 而家補寫Order 左個T 骨扒( 7 成熟) 鐵板餐同埋羊扒鐵板餐，跟左兩杯紅豆冰個T 骨扒幾好食，好香口，亦唔過熟，上既時候熱辣辣。羊扒就比想像中差D，伴茶一般，薯條淋左D，紅豆冰唔錯。印象中係$70- @，但改紅豆冰要加錢.. 唔記得係咪+ $8-

經常叫外賣返公司同事話佢地外賣價平過堂食我覺得炒飯同o加喱飯(外賣一般$26,包飲品)之類唔錯同事話海南雞麻麻, 但就讚嘉積鴨好食

今次約於上環返工的朋友食晏, 本來佢話去"遊", 但我早幾日先食過, 行經呢度時就扯左佢入來(因我未試過這間)呢度的廣告勁sell海南雞飯, 咁我就要呢款, 朋友要嘉漬鴨. 個餐好快到, 個湯有雞菇同腎, 雞係雞胸加上脾, 味道麻麻, 全靠調味三寶, 特別係黑豉油. 雞油飯就唔太差, 但略嫌油左少少.呢間鋪地方唔算好大, 但座位之間排得幾貼, 所以午市坐滿人時都幾嘈, 而且好似無非吸煙區, 撞正多煙民的時間都幾煙霧漓漫...