越式工房 (已結業)

新年日日都係酒樓, 想試下其他菜又唔知邊度, 於是去了這家越式工房。 其實而家應該已經改左名叫 Asian Cruise 。 越式工房我同屋企人試左幾次, 我覺得幾ok, 而且佢d野都幾有份量, 而且service都好好, 有一個好nice的服務生介紹給你。 但好似上年年尾開始裝修, 一直都無去試過。 諗住今次想試下其他地道的菜式, 一去到, 已經發覺佢地d碟set得好有問題。明明我地有10個人, 佢竟然得8個碗筷, 於是我地叫佢加番上去, 但唔知係唔係呢度d服務員真係太忙, 好似無咩人理我地, 然後叫左一輪, 先有俾我地, 但好好笑, 佢唔係放有人個位置, 而係放係吉位, 我想知道放係吉位到做咩呢? 好啦 , 叫野食啦..因為未試過, 咁就叫d大路野, 去越南菜緊係食檬粉.. 點知檬粉賣晒.. 但佢好似第一日先開市已經賣晒, 我真係好想知道佢之後點樣keep落去.. 話想要個柚子蜜.. 無柚子... 叫魚無魚... 咩都無!!! 但然後我地又問另一個, 佢又話有魚?? 點樣架? 一時話有, 一時又話無!! 後黎又話有.. ok 咁落order啦.. 唔係叫左好多野, 大概6,7樣左右, 但佢地都要我地重覆3次先記得!!! 因為之前試過牙車快(越式沙律)好好味, 於是叫下, 因為幾乎每間越南菜都一定會有牙車快... 真係牙車快呀..... 好似牙簽咁大快(塊)的沙律!! 而出面的牙車快係會用柚子, 落白醋, 重會有d魚露等等, 係非常可口的!! 但我第一次食到係只有沙律酸味的牙車快!! 根本就唔係牙車快黎!!! 被呃然後叫左木瓜沙律, 佢係一條條呀.. 但肯定唔係木瓜, 而係一d莫名其妙的青菜黎!!! 而且根本就係用卡夫沙律醬!! 又酸又唔好食!!! 食完一輪沙律, 又無端端無上菜, 我地等左15分鐘.. 問佢有無幫我地落個香茅雞中翼河粉, 佢好似咩都唔知咁.. 問我地係!! 我地呢下真係火都黎!! 話我地落order時已經寫左啦!! 佢然後又check order紙, 竟然話無寫到!!!! 咁我地之前重覆左3次, 佢聽咩野呀?? 然後佢又同廚房嘈左一輪, 先話唔記得落單!! 明明自己無寫, 又話d客無同佢講, 呢d咩待客之道黎呀??之後上左碗牛肉河粉。牛肉好似用d滾水碌左好耐, 無晒肉味, d河粉似d粗粉絲咁.. 而且好怪. 佢聲稱係牛肉湯, 佢會飲到係史雲生清雞湯味。 佢d河粉係有蒜蓉包送的!! 但個粉都食完, 個蒜蓉包都未黎.. 蒜蓉包好難做嗎?? 要花45分鐘先有四片???? 然後上左個越式蝦碌, 我親戚一咬落去, 幾乎想吐出黎!!! d蝦根本未熟!! 重係半透明樣!!! d蝦水重係個蝦頭入面!! 又醒又臭, 我地幾個都聞到!! 於是同個老闆理論, 話點解你地d人可以擺d唔熟的食物上檯, 於是佢即刻囉番入去廚房再做.成到呢一刻, 已經無胃口再試佢地其他野.. 真係想快d走... 埋單8個人要成千蚊.. 重貴過食日本野... 後黎我聽到隔離檯都幾乎想反檯, 又係落咩無咩.. 甜品都話未整好...。咩都未準備好, 點解重開門做生意呀?? 不如休多兩日, 等D貨番齊先再開舖啦..總括一句: 員工欠缺經驗, 食品質素一般, 開舖前準備不足。…查看更多

今日老婆唔舒服話唔煮飯, 落樓睇下有咩食, 見有間好似新開嘅餐廳, 無記錯以前應該係越南嘢, 依家轉咗係東南亞菜. 餐牌品種都幾多。點咗泰式咖喱蟹焗大飽，冬蔭公湯明爐烏魚同海南雞飯。先講咖喱蟹焗大飽，隻蟹幾新鮮，但係咖喱汁少咗D同個飽焗唔够脆。冬蔭公湯明爐烏魚，條魚好大條，冬蔭公湯底唔錯，老婆話辣D重好。海南雞飯D雞好滑，配黄姜椰香鍋飯真係好夾。總括嚟講OK之上。…查看更多

星期日唔想出去食, 留返0係深井搵餐廳, 0係屋企搵到張越式工房既紙..於是諗住去試下..book左7點位, 去到門口冇人serve我地, 1行幾人面懵懵咁企0係度..企左1陣都冇人理我地, 全部staff企晒0係入面..跟住我地自己行入去 坐低點野食, d野食款式都ok多! 有成3版!!!好喇, 點左海南雞飯, 我地問雞油飯有冇得散叫, 佢話冇, 咁叫左2個,跟住叫左香茅豬扒飯, 馬拉盞豬頸肉炒河, 半打牛串燒同蒜容包..落左order十分鐘之後有個姐姐仔同我地講如果串燒半打都要晒牛既話要加10蚊,明明menu冇寫到!!! 好喇咁我地改左3枝雞3枝牛..同屋企人係咁傾下計睇下電視, d野食好耐都未到, 1等等左35分鐘!!!最奇怪係所有人都好似等緊野食咁..d staff就圍住廚房野食個出口 等食果陣聽到隔離台d人不斷咁問d野食到未, 話等左好耐果d..最勁係有台人叫左馬拉盞炒時菜, 唔知叫左咩菜,果個staff好耐之後先話"下? 冇晒喇唔好意思, 我地得返西蘭花.."果陣9點都未到, d菜已經冇晒!!! 點解可以prepare得咁少?係咪預左冇人幫襯?終於等左7個字之後d野食先到, 海南雞飯..係白飯!!!!!!!!!最重要係d野食係凍的..串燒又唔熱..我地即刻投訴, 佢換過d飯上黎, 出晒煙!!真係唔明點解等左咁耐d野食都可以係凍!!! 我地坐室內, 好暖嫁!! 冇可能咁快凍!!!香茅豬扒飯仲威, 冇汁!!! 白飯送極乾豬扒..係咪用口水送飯?最後我地用晒沙爹d汁黎食..剩返d白飯0係度..食左20min度碟馬拉盞豬頸肉炒河都仲未到, 呢個時候,我地聽到廚房話河粉冇晒, 媽咪果陣仲話"我地咁早落單應該有既"我見等左咁耐都冇, 於是叫媽咪問下..點知真係冇!!!! STAFF同廚房鬥賴, 話落左單點解會冇果d..到最後問我地轉唔轉檬粉, 但1句sorry都冇!!!!我忍唔住問"係咪要我地等多9個字先有?" 跟住今次就黎得快,算係唯一好食既野..埋單之後d人都係唔理我地嫁, 就咁就走, 平時都會話多謝果d, 呢間係冇!總括黎講, 雖然野食係唔貴, 但咁既service, 野食麻麻又勁慢..慢食文化都唔係咁!!食完1次唔會再有下次嫁啦!!…查看更多

之前我都已經食過好多次~但係都冇影到相~今次帶埋手機去影~食物貿數 保持一貫水準~味道ok~ 詳見上篇食評~…查看更多

今次係我第二次係到食~一坐低就會有碗細細碗既開胃菜(係d生菜同d紫椰菜加小小雞肉撈d甜醋整成既沙律)食完沙律之後~我叫左加喱牛腩飯~需然同第二到d加喱有d唔同 淡淡地~但配飯都好正~整體黎講都好味~但係d飯對我黎講好似小左d~我細佬就叫左個汁燒豬頸肉飯 d豬頸肉好香 外皮又脆~正我阿媽就叫左個香茅豬扒湯檬 d檬好大碗 落埋佢d甜醋 都好好味 最正既都係佢d豬扒 d香茅好香 好夠味 塊豬扒好脆 正呀 d服務態度 都好好 可能冇咩人係到啦:) d價錢都算ok:)唯一既缺點d飯好似小左d:( 我一定會再去既…查看更多