越南米紙 (已結業)

我哋訂了兩個外賣一個係雞 ，一個係牛 ，但係最後兩個都係牛， 另外我哋等咗超過20分鐘 ，那時全間餐廳呢係冇人嘅！ 啲嘢食味道非常一般， 毀壞嘅盒， 賣相係凹凹凸凸 ，非常難睇！ 我以後不會再幫襯另外呢間餐廳嘅, 服務態度非常惡劣, 我們要求用paywave ,但係佢哋又叫我畀cash.。我哋喺過程中已經不停詢問究竟有咩要咁耐，但係佢哋冇任何回應 ，我覺得一間做街坊生意嘅鋪頭，坐立响呢啲舊區 ，最基本嘅人情味都沒有，劣！ 我哋我去買嘅時間係下午1.45pm至兩點鐘左右基本上是一個下午嘅黃金時間, 但係店內空無一人, 明白這個疫情下 是沒有辦法, 但是試問如果你連這個時候都冇用心去做好自己嘅生意, 疫情之後又怎會有人幫襯呢！

小型屋苑商場餐廳好耐之前食過覺得質素好差今日有幸再遇上😅坦白講真係有少少擔心😂。抱住零希望叫咗碗無骨雞河粉「咦！竟然都唔錯！」上湯睇起來幾靚帶少許雞油配上新鮮越式香葉雞雖然擺明係冰雞無乜味但件數多＋肉質處理幾滑加番分河粉份量足夠有餘好滑口唔會一夾就斷👍🏻直覺話我知轉咗廚師🤭🤣。而朋友就叫咗香矛豬扒撈檬檬粉份量好多我唔想食生冷野所以無食到不過睇落啲檬粉都幾彈唔會碎濕濕斷哂豬扒我食咗一啖覺得咸咗啲。環境唔錯地方唔大但坐得都舒服員工好街坊老友feel即使係第一次見嘅客人對話起上來都好有人情味💕難得下次再try下啲飯類😁

天氣凍左，今日放工來到米紙食飯，貪佢有邊爐打。之前打過幾次，唔算特別好食，食過佢嘅生牛肉湯河，係冇越南風味的，只可以話係有肥牛的河粉今次打邊爐，份量比之前少牛肉更少得可憐(圖中係未食嘅牛份量),得兩片，又好肥，要整舊除走。然後原來杯熱朱古力先係極品，有朱古力色，但水味極濃，唔可以話有朱古力味，應該只落了半殼粉才有這效果我都係第一次飲咁難飲嘅朱古力不過個番茄湯底係好味嘅，但可惜其他野太過將貨就價。最後唔知幾時開始有加一收費，之前都冇，餐牌又冇講。。。加埋都七十幾一個人，可以有其他好味啲嘅選擇，即係以後不用再去。。。。

可能是比較夜的關係 ，餐廳比較少人， 但是上菜在的速度都比較慢。 叫了生滾牛肉粉 ，分量方面比較多但牛肉質地不是太爽。我同時叫了泰妃雞粉 ，正確來說叫無骨泰妃雞粉，雞非常好女食， 非常鮮甜。

今日見好想食越南牛肉湯河，屋企附近有這間，所以來試下。點了越式生熟牛肉河、鹹檸梳打。碗牛河有一片生牛肉、幾件熟牛腩。味道好一般，但最過分係幾件牛腩無一件可以咬開，完全無炆淋過，件生牛肉都係硬，但免強食到，最後只食晒河粉，極之浪費。而鹹檸梳打就不用提，因為無可能有問題

諗住冇咩胃口，食吓越南嘢，惹味些。入到來當然叫了個越南生牛肉湯河，叫個檬再加個雞飯。睇餐牌，冇咩可散叫的小食，跟餐有四款。下午茶餐，全部是港式茶餐廳的套餐。來了個檬，一吃… … 醋汁唔掂。見埋碗生牛河粉，湯底色渾濁，牛肉熟晒，入口完全沒有越南湯河的味道，只有港式茶餐廳的死鹹湯底味。係個雞飯叫好一點點，但唔好諗到d雞好好味。服務水準更是零，我們入來幫襯好似打擾員工玩手機，晦氣地拋吓所有食物後，即時坐番低玩手機。只此一次，不會再來。

平時搭車常常經過，見到裝修得好靚。今晚心血來潮，好想食越南生牛肉湯河，專登走來。安格斯牛肉湯河，湯底好有牛肉味、牛肉又滑又軟，雖然有放薄荷葉， 但都係唔似食越南湯粉。加了墨魚餅，外層脆又香，而且好彈牙，但就冇乜墨魚味。脆皮乳鴿， 細細隻冇乜肉，但味道唔錯，應該係新鮮炸。

呢間米紙成日都話去試，今晚經過舖面見有小火鍋食，即刻同男朋友入去坐定定。店舖並不大，但座位之間都算寬闊，坐得舒服。香茅雞翼完全冇香茅味，好似冇醃過咁，只係一隻普通炸雞翼。墨魚餅超級唔抵食！食唔出係墨魚餡，層炸粉又好厚！安格斯牛肉雜錦鍋我們揀了麻辣湯，配料有肥牛、丸、餃子、生菜、菇、烏冬，加埋都只係$68！竟然同頭先果4塊墨魚餅一樣都係$68。。。材料都新鮮，份量剛好二人share。眀爐烏頭魚條魚都算大條，個湯酸mei mei幾開胃，可惜overcook左，魚肉質感偏鞋。男朋友另加＄10一碗黃姜飯，他表示這是一碗有顔色的白飯。

難得安基苑有間越南野，就去試下！叫左碗越南火車頭湯河，味道普通，有粒芝士丸好唔夾😐個炸墨魚餅同炸炸春卷係加錢配既小食，墨魚餅超唔掂，好似食擦子膠咁。春卷味道ok但太油。fiancé 杯椰子沙冰唔算太甜，椰奶味重。我杯紫薯沙冰估唔到有cream，可惜我唔鍾意cream，俾我new走晒，都算濃紫薯味但可以再少甜啲。個安格斯律牛肉青木瓜沙律一條青木瓜都無，但有羽衣甘藍同啲沙律菜，勁大碟！牛肉有好多塊，$68超抵食！不過佢用黑椒洋蔥汁煮啲肉再淋上面，食落唔夾，菜還菜，肉還肉，但勝左夠抵食。最期待既明爐烏頭出場！平日泰國餐廳都百幾蚊條，呢度$68！唔細條架。真係以為眼花！佢無做特價，係正價黎架。如果佢有汁俾我地點就好喇，我地拎左撈檬個汁點😂😂😂

午飯的時候，經過見到這間越南餐廳，價錢也合理便進來。午餐有很多選擇，有越南河粉，也有焗飯。枱上也放了越南醬汁以及麻辣菜脯粒。這間餐廳午市沒有收服務費，水是自助形式客人需要到出面裝水，我認為也合理。我們加配料蝦餅，切開了才記起要拍照😂蝦餅是非常脆的。而且有一些芝士在內。😯😯是芝士蝦餅嗎？！蕃茄牛腩焗飯，飯是黃色的，配上番茄汁牛腩，份量也很大，而且焗出嚟賣相也很吸引🤗我們叫了越南火車頭，也超超超大碗。我們兩個女仔share也足夠了。這個是由河粉轉了檬粉，配了扎肉，蘿蔔，生熟牛肉，也有芝心丸。價錢個人覺得很便宜！下次再推薦同事過來午餐。👍

我幫襯咗呢間餐廳幾年，一直當佢係飯堂。今朝諗住去食個brunch，見到個餐牌轉咗，心知不妙。以前早餐menu好豐富(可參考其他食評)，而家剩返4款，仲要冇side dish (多士、煎蛋等)。以前D食物都幾有越南風味，而家主要係車仔麵，明顯個廚換咗，冇哂越菜，何謂"越南米紙"????以前服務都幾好，侍應同D客有講有笑，而家個經理轉咗，連拎杯水都要客人自己去水吧拎。雖然冇收加一服務費，但係拎杯水咁簡單，都唔幫個客。d客人喺間餐廳四圍行，空間又唔係大，只會造成混亂。以前有侍應幫手點餐，而家要客人自己喺餐牌上面劃。我問個經理，早餐餐飲包唔包豆漿，一開頭話包，過一陣之後就行過嚟話唔包。點做經理，俾咗錯誤期望俾客人，對menu唔熟悉，好唔掂。以前餐具都係可再用嘅，而家全部只派即棄餐具(堂食一樣)，包括筷子、匙羮、杯，連碗都係塑膠即棄。我明白洗碗工好難請，但係當政府同大集團都推廣走塑嘅時候，呢間餐廳竟然反其道而行。完全冇社會責任、環保意識，有學識同教養嘅消費者都應該以自己嘅行動作出抗議，唔好光顧呢類不理會可持續發展嘅餐廳。

噚日路過見到休息話內部裝修，並會於今日重新營業，所以今日特意來試試有咩唔同。今日來到發覺主要變成了車仔麵款式，自行在餐牌上剔好要咩食物。以往嘅越南菜款式消失了超過一半，特色飲品亦不再有。最重要一點係餐廳內全部改為用即棄膠碗膠杯木筷子，呢點係令我最難接受。車仔麵份量好少，麵底少，男士應該唔夠飽 😏

在附近返工， 早已看過食評， 都幾有興趣，今日決定一試， 叫左個順化香茅豬扒飯，塊豬扒又硬又冇香茅味，就連最重要的蔥油都欠缺，而個飯就一般， 極其量只可叫做煎豬扒飯囉～～～當簡簡單單食個午餐，算吧！

🍞焗芝士番茄牛腩麵包盅伴牛油金磚$82🍞好邪惡的麵包盅，澱粉加肉加芝士😈醬汁酸酸甜甜好惹味，牛腩肉質不過不失👌🏻麵包焗到好脆身，內裡軟身，點番茄汁食好正❤️.🐔越式雞絲扎肉撈檬$53🐔天氣熱食撈檬一流，清爽不膩❄️有無人同我一樣，會倒汁倒到變湯檬🤣🤣🤣食落好開胃，檬粉彈牙，雞絲同扎肉都唔錯~.🐷鮮蝦豬肉米紙卷$48🐷🦀芒果軟殼蟹米紙卷$68🦀兩款都幾好味，個人比較偏好芒果軟殼蟹😍.食物質素: 🌕🌕🌕🌗🌑食物顏值: 🌕🌕🌕🌕🌑性價比: 🌕🌕🌕🌗🌑回頭率: 🌕🌕🌕🌗🌑

前一天在油塘食了個不錯的越南菜，因工作關係要到安基苑，又見到一間越南菜餐廳：「越南米紙」！於是就去再嘗越南菜，當一打開菜單就發現了和油塘的那間應是同一個集團，於是心想應該會不差的，確實地越南菜是不差的，但……春卷札肉撈檬─這個檬粉非常好，春卷剛剛炸起，好新鮮，非常鬆脆！但如果淨食這個春卷的話，我就會覺得比較油膩，然而配合檬粉的話就會剛剛好！而札肉也沒有令我失望，非常爽口、美味！檬粉亦不會好散，加上撈檬汁，爽口及酸酸的，非常開胃！菠蘿雞扒焗飯─我曾說過在越南餐廳食意粉焗飯，伏味會很重，結果我中伏了…首先，黑椒醬太重手，使黑椒味遮蓋了其他的味道，包括飯底的黃薑飯！另外，飯底的黃薑飯太濕身，使整個飯都好軟身，如果焗飯軟身的話，好易會變成糊狀，會是頗災難的效果！而雞扒份量都算多，但也只是一般般！我覺得這個飯唯一可取的地方是那幾片菠蘿，很鮮甜，不是罐頭菠蘿！鹹檸檬梳打─本來都沒有打算要飲品，但因焗飯的太辣，所以要了杯鹹檸檬梳打，解渴解辣，是不錯的！結論是去越南餐廳還是食越南菜吧！