影片
老闆表示上面三樓熟食市場有舖頭，可以坐低慢慢嘆燒味，有機會我都樂意就去探訪一下。豉油雞半隻，人善被人欺，利益權利係要靠自己爭取既！要據理力爭，有冤就要反抗！我指住要依邊靚靚油雞，師傅趁我行開買雞翼，側側膊包第二邊塞入袋！乾乾黑黑縮晒水唔知放左幾耐無客肯要，越諗越唔甘心立即返轉頭換貨！師傅叔叔我唔係要依件架喎，唔該換翻那邊比我，佢當無事發生換完算數！未算太肥還可接受，少少肥膏吐掉可以。雞皮爽滑，豉油香甜彷似有陣雲尼拿味道。極嫩清甜的雞肉，甜甜肉汁滴滴，襯著豉油香堅好味食得過！白切雞半隻，斬雞師傅繼上次偷龍轉鳳，將我揀既靚油雞換另一隻乾雞後，再重施故技！我話要最邊邊件掤靚靚白切雞，師傅唔知係邊度包好件雞話要收錢！我望望枱面剛才隻雞仲係度喎，心諗應該無事既，上次比我發現，唔會再挑戰我麻！點知返到屋企發現，雞皮乾爭爭鞋烚烚仲要脆皮，唯有全部皮去掉淨食白肉。雞髀白肉滑滑彈牙，鳳脂甜美，雞甜加咸鮮，味道不錯令人回味，仲要有靚雞先有既透明啫喱膠原蛋白！立即吸晒落肚，唔好走寶。去晒皮淨食雞胸，有雞汁有咸鮮，嚥嚥韌韌不太鞋。滷水雞全翼，發現新大陸，估唔到其貌不揚竟超優質！肥美脹卜卜，彈彈雞肉有趙口，皮香肉滑，滷水入味舒服不過份。只雖 $10 蚊有 3 隻，平靚正抵食到飛天！好食過珍苑，好味過林德記百倍千倍！就連聯興都望塵莫及。滷水雞髀，大大隻厚厚肉 $10 蚊有交易，最緊要好食！平係無用架。打開膠袋滷水飄香，不知味道如何。豪不猶豫成隻那起，狠狠一口一扯！巨髀滷得清爽芳香不咸不濁，雞皮油潤，白肉結實，醒神開胃搶住食！蜜汁叉燒免切，索價 $40 蚊條還可以。少年時曾經有個女朋友話，識食叉燒梗係要免切成條揸住咬，原汁原味才是皇道！其實都要睇間燒臘檔叉燒是否夠高質喎。依條凍冰冰，不是剛剛燒起，瘦猛猛叉燒偏硬偏乾，唔熱略咸，要大大力咬實扯出，聽到撕裂聲音十分悅耳過癮！滷水乳鴿，雖然我要原隻免斬，但嬸嬸您都唔係直接包比我麻？隨便放係盤道都有段時間，都要掉落熱滷水浸浸洗洗塵都要啦！而且叫賣時口水有否噴到落去架？眼見都有不少烏蠅飛來飛去。成隻拿住咬最正宗最狂野食法！雖然不是乳鴿，供應中鴿唔係老鴿已經好幸福，每隻 $40 蚊其實價錢屬高水。室溫享用，擘大口直接咬咬咬，堅嫩滑多汁！豉油清香吸引，滷得出色！就算胸肉都十分滑溜，陣陣鴿肉甜味，鴿皮薄薄爽脆不肥膩，金黃色調靚仔又好味！炸乳鴿，即叫即炸新鮮出爐滾燙燙！鴿腦補腦壯陽強身健體，鴿腦漿漿甘香，鴿頸香脆連骨吞掉。識食梗係拿住咬原汁原味！慢慢溫柔地續少續少地脫下，直至一絲不掛！嫩滑鴿肉滴著汁，薄薄香口鴿皮，連皮帶肉咬下，嘴嚼融合！味道夾得天衣無縫，每條骨都損得乾乾淨淨！燒鴨下庄，睇錯以為係鵝髀，只需 $30 蚊就肯定係鴨唔係鵝。原隻大咬最有野性最滋味，鴨汁噴射，鴨油爆發，舔舔脷！鴨皮嚥韌香料味濃，鴨肉嫩嫩結實，散發陣陣鴨甜。燒肉，見到幾靚仔仲只售 $20 蚊即買。半份脆皮五層肉，脂肪瘦肉均勻甘香甜美，幾舊過肥，幾舊韌皮。燒豬骨，初時老闆話無，但轉頭改口稱還有一份。點睇都係乳豬腳、燒豬腳仔拼燒豬髀，只需 $20 蚊？雖然不是我想要的燒豬桶骨，話晒啖啖肉熟都照要，餚起粥黎非常鮮甜香口，咸味香料味得宜。海蜇燻蹄，海蜇爽爽正常的咸味，燻蹄偏咸，皮爽肉嚥韌，食完勁勁勁頸渴！甜醋味道單調，加麻油紅椒蒜蓉會更美味。甜酸鳳爪，還以為係酸辣，爽爽雞皮脆脆筋骨，咸味太強不覺得甜酸。本來想買滷水鴨，但見斬定入晒發泡膠盒全部打開，烏蠅周圍飛仲嬲下這盒嬲下那盒，梗係唔買啦！用發泡膠盤裝立即用保鮮紙包住最好。鬍鬚雞，獨獨晚餐自撕雞！原來不是白切雞，咸雞黎喎。白雪雪淺黃的衣裳，雞皮爽滑不肥膩，甜甜鳳脂有著輕輕雞甜散發咸香，結實彈牙雞髀肉，綿綿多汁雞胸肉，食得過。金錢肚、生腸、鴨腎、雞中翼、玫瑰紅腸。生腸極爽脆，唔似聯興腍劈劈，而且同爽彈金錢肚一樣有玫瑰露酒香，味道神秘誘惑不禁追住食，越食越想食！其實好鬼飽，但真係好好食停唔到。雞中翼有點咸但一樣和味，鴨腎甜美微爽，脆皮玫瑰紅腸甜美無比，好想有碗香香白飯一齊趙呢！以前去燒烤我都會係燒味舖買玫瑰紅腸，特別甜美可口，凍肉舖冰鮮無得比！燒腩仔，條燒腩仔滴晒油，師傅您同我講好瘦架喎，您話您自己瘦乍麻？食落豬皮極脆卜卜，肥瘦參半不油不過咸，陣陣肉香肉甜，不能以貌取人呢！燒排骨，黏黏的外層，有著叉燒的味道，肉質瘦瘦，帶著微弱肉汁，趙口十足！一咬一扯聽到撕裂的聲音。滷水鴨，滷味極淡，沒什麼味道。口快快說錯了走滷水汁添，自己作孽！鴨仔細細都免強叫啖啖肉既，肉味麻麻地唔難食，不過近尾部羶到我反眼，吐都吐唔切！皮彈彈肉嚥韌。甜醋甜味重而單調，加點浙醋希望有得救，無補於事！
繼續閱讀