綠野仙踪 (已結業)

來過很多次，每次都看到有過半食客都會點烤魚，就知道除了珍珠奶茶，烤魚必定是這裏名物。可點大半條、小半條、全條。今次有5個人，大好機會試全條烤魚⋯⋯蠔王枝竹涼瓜茄子烤魚，原條開邊炸過，又真係幾大條嘅，加上各種配菜：枝竹、涼瓜、茄子、香葱⋯上枱再烤一下，魚肉多汁鮮嫩，配菜吸滿湯汁及魚肉精華，美味可口，性價比超高，果然吸引一衆食客！後記：當心那個四眼老男店員，每次都落錯單（不只我，其他枱也有此情况），有錯不認還惡人先告狀，小心！

.🔻綠野仙踪呢間都大大話話食阻十年都有，到e+都仲食緊，佢有好多選擇，有台式小食/小菜，焗飯/意粉，鐵板，一人火鍋，台式飲品同埋少量甜品都有😯😯.🔻口水雞 ($40)老實講，食過好多間口水雞，呢間係我覺得最好食既一間，雖然佢唔係正宗，但味道各方面都好岩我😍😘個汁係咸咸地少少麻辣，食落唔係好油，超好餸飯！隻雞好嫩好滑，一d都唔鞋，通常口水雞都係偏凍食，但佢就係微暖既，所以好易入口🤤🤤黎親都食佢，仲會問定有冇口水雞先入黎食😂😂(ps. 建議唔好貪平食午餐，有次午餐時間食，d雞係斬頭斬尾碎濕濕，寧願散嗌食齊齊整整既雞件) .🔻鐵板餐包野飲 ($66) 鐵板餐揀阻炸雞脾+司華力腸配炸薯角(牛要加錢大約$10左右)跟餐叫阻杯凍蜂蜜綠茶，幾重蜂蜜有d 偏甜 ，鐵板夠熱辣辣，揀阻黑椒汁不過唔係好覺有黑椒味，炸薯角冇乜特別，司華力腸個皮脆既整得幾好食，炸雞脾都係冇乜特別，整體都ok既，我係食剩阻d薯角姐，太多😂😂.總結：我下次都會繼續食返口水雞😍

綠野仙蹤不愧為街坊之選。縱使藏身在橫街盡頭，但每到開餐時份總是坐無虛席。坐位舒適，兩部電視長期開放, 仲有WiFi㖭😁各式即制美食雜錦雞鍋份量充足，跟一般大型連鎖快餐店的份量簡直冇得比，細食女士們二人一鍋也吃得飽。大量生菜、油麵墊底。沙爹湯底味道夠，食物可以免點豉油。跟餐可免費跟一杯$20飲品，超過補差價。台灣奶茶，茶、奶比例適中，鐵板扒餐任選兩款主菜，另選飯、意粉或薯菜。鐵板上菜時仍熱驣驣，啫啫鐵板兒時回憶豬扒、雞脾預先醃製，已有底味，配上黑椒汁錦上添花。百香果椰露 - 甜甜酸酸，椰果粒襯底，開胃有咬口！

綠野仙蹤五年前幫襯得很頻密的，貪佢坐低飲杯珍珠奶茶，但好幾年冇經過， 今晚再嚟，仍然係有咁多人客，但服務員及收銀員，只得兩三個，好心大集團老板請多些人手喇， 好影響客人，因為由落單，食品到枱，都用左好耐時間去等侯員工完成！例牌必飲珍珠系列，係得嘅，仲係用外賣杯方便你拎走 ，又有好多口味配搭選擇， 正！ 鹵肉飯，飯粒分明， 夠熱，滷肉飯的汁唔肥膩， 尚算滿意！ 鴨髀滷肉飯，個樣真係唔開胃，口水雞，我食開凍嘅，但係呢度係熱嘅，下次都係唔好亂叫野，一定叫番啲大路最穩陣， 否則後果自負！

在橫街窄巷中的綠野仙蹤，除了台灣菜之外，也有港式火鍋、鐵板雜扒等菜式，亦有很多種類甜品。經常都是高朋滿座的，可想而知性價比不會差到那裡。今天叫了鮮雞雜錦鍋、肥牛雜錦鍋，選了沙爹湯底。各可加配一杯$20飲品，叫了凍胚芽豆漿、凍台灣奶茶，套餐價$86/$88。鍋料新鮮，份量比一般連鎖店的火鍋大很多，大男人也可以吃得很飽。這價錢能有好吃、吃得飽的質素，現今香港社會已買少見少，難怪一直深受區內街坊支持。有很多枱都叫了明爐酸菜魚，想必是此店招牌菜，下次必會來試試。

lunch時間約左朋友黎食 都好full下坐無虛席 主餐 小食 飲品都好多選擇而且上菜時間都算快吉列魚柳拼沙律 沙律份量多配有青瓜食落感覺清新同埋酸甜味道調較適中好開胃👍🏼魚柳亦炸得非常香脆配埋沙律醬食非常滋味 賣相ok 炸物小食拼盤有薯角，春卷，燒賣，餃子全部都炸得外層金黃香脆內層餡料味道不錯咖哩雞扒烏冬呢個我自己好鍾意食因爲係甜咖哩對於唔食得辣既人會好喜愛同埋夠曬多汁 雞扒都好入味百香果紅茶好清香味道好夾

與同事一起叫外賣，我叫了一個肉燥腩飯(未計運費$55)。準時送到黎，打開飯盒，真係哇一聲!好大碗飯!一眼睇落去已經覺得好足料，超多飯和肉，一個女仔很難食得晒!事實上，我好努力食都食唔晒，仲剩下6份1的飯餸.....腩肉都算軟身，不難入口。燥肉就味道不錯，送飯一流。成個飯汁唔算多，感覺唔多油，不算好肥。不過，可能因為我放涼了才吃，打開個飯時沒有嗅到正常肉燥飯香噴噴的味道，太可惜了。如果有飲品送就更好

每次係香港仔諗唔到食咩或者周圍都好多人等位既時候, 就會即刻諗起呢間鋪.去到台式鋪頭, 緊係要點返Taiwanese style food, 今次食左雞扒肉燥飯.雞扒煎得幾香, 雞皮煎到有D crispy. 肉燥唔會太salty, 但份量有D少. 整體上食物quality唔錯.

香港仔呢間係總店，陪住南區人成長，由細食到大，10幾廿年都有，已經唔係食味道，係食回憶，學生時代午餐放學打等既地方，雖然轉左入後街，風味依舊。睇餐牌依舊價錢親民，40零蚊冇加一。肉燥撈飯必食，今次叫雞脾同肥牛加個口水雞。先睇小食，口水雞就係要夠濃味香而肉滑，呢個配料多既，可惜花生唔夠香，雞唔夠滑，頗多肥，味道唔係好夠。肥牛食頗足料，牛肉正常，肉燥野味，飯底份量足，岩哂青年人。炸脾係我覺得最出色，肉滑多汁，相信係生炸，香茅味濃，推介。總結：雖然唔係話超好食既一間店，但性價比高，出品尚可，價錢親民，地方闊絡舒適。

👁‍🗨肉燥烤骨飯 💲46自從脫離中學時期，就冇再食過呢間野，只係睇住佢由對住馬路既地舖搬到去隱蔽既小巷入面😳呢一日突然諗起佢既存在，見咁耐冇食過，就一於去食下，發現多左好多野食，印象中以前冇甜品，變到而家都有頗多既甜品可以選擇，野食既種類亦都多左，頓時覺得自己好似發現新大陸咁🙄😂講番正題，呢日食既呢個肉燥烤骨飯，整體離講其實只係不過不失，肉燥偏酸，味道吾係平時食開既肉燥味，但係又吾可以話佢係難食😳兩大舊烤骨整得吾夠腍有點兒韌🤢飯既份量就偏多，如果好肚餓既人食就岩岩好🔛 整體評分（6.5/10）

香港仔的綠野仙踪我於讀中學時已開業於香港仔。事間多年再去別有一番風味，好多選擇，樣樣望落都好好味諗左好多。最後揀了一口香酥雞。飯有肉躁，炸醬同紅米，最後選了炸醬同珍珠奶茶。友人選了芝士撈公仔麵碟頭好多。雞翼有四隻，炸雞好多粒。一大碗飯。炸醬好惹味雞好香脆。新鮮炸起好juicy 珍珠奶茶就一般同其他連鎖式的差不多埋單$56都可以接受

綠野仙蹤可以話係香港珍珠奶茶解嘅 始創人 我記得係好多好多年前珍珠奶茶味輕嘅時候 綠野仙蹤已經有得飲 嗰陣時成日買嚟飲但係依家執得一間得一間都唔見曬難得今次喺香港仔見到 仲要係朋友曬先知 因為佢搬咗去一個corner度 唔講你都唔會知位置方面都係嗰句你唔知佢搬咗去corner度你以為佢執到啦 應該係香港仔嘅人先會去嘅一間店舖 唔會有人費咗特登去而去一邊大部分嘅位置都好闊落 我喺度同朋友傾計 真係一流非常好 我哋仲揀咗個非常之偏僻嘅位塞咗喺一邊慢慢傾計食物方面選擇好多 我就揀咗一個肉燥飯 加一啲滷肉 味道都唔錯跟住食咗個紫米露但係因為太肚餓冇乜點影相 我朋友就嗌咗個雞扒沙律 佢太肚餓一嚟就食咗亦都冇機會畀我影相總括而言又係一間良心小店 幾好味唔錯大家支持下下次就唔係搬去corner就真係執咗笠㗎喇

要搵台灣野食真係唔多地方有。本來想食滷肉飯，但呢到得肉燥飯。叫左一配肉燥腩肉飯腩肉夠淋，食落唔油膩，幾好食。但肉燥偏咸，整碗份量都夠配飯食。最唔得係d飯，未熟透，飯芯乾，偏硬。跟餐叫左杯西柚檸蜜，味道ok，但甜左少少仲叫左個雪糕水果吐司，有奇異果，火龍果，西瓜一球士多啤梨雪糕底是一塊厚方包。d醬應該有士多啤梨糖漿，煉奶，藍桔糖漿。撈埋又酸又甜，不過配色賣相就差d。

諗起台灣美食肉燥飯便光顧呢間，材料充足醬汁撈飯最正，惜日回味之選。經過今次，沒再下一次，該店名稱越來越入我們以為已執笠。晚飯時段都一般吾哂等，我們點選3人套餐，選擇不錯但食出來真差.....食物前菜極怪味，小食豬頸肉硬而沒味，一般奶油津白，還漏單至愛的牛展...主菜咖哩牛腩細煲，吾係咖哩牛腩味似葡汁居多，配菜薯仔只得2細塊，慘慘慘，另外選海鮮焗意粉，簡直同波仔仔飯盒份量差不多，焗至乾身，明白食材租金上涱，但份量與價錢實作不乎......舉手bad

今日，幾個中學同約出嚟聚舊!就話想食當年的味道。由落單到上菜大約十分鐘。我入到餐廳，坐低俾左餐牌我!諗住叫香芋珍珠;點知無結果就叫左豬扒薯蓉加胚芽奶茶;我叫個薯蓉無左以前的粟米，薯蓉無左牛油的香!無咩味，食唔番舊時的味道舊豬扒無落炸粉就咁炸，豬扒夠淋;豬扒味仍有!