12
0
0
港鐵深水埗站 D2 出口, 步行約3分鐘 繼續閱讀
電話號碼
27256618
付款方式
現金
食評 (14)
呢排成日屈喺Office食外賣,食到悶,同事話不如出去堂食啦。本身我哋想去嗰間餐廳因為疫情關係,連午市都唔做,暫停營業😖。我哋即刻由青山道行番落去元州街搵嘢食,有諗過食加藤屋,但要等位。於是就去咗試隔離舖、由同一老闆經營嘅「素味牽」。老實講,我係一名食肉獸,之前同事多番苦苦哀求下,我都唔肯陪佢試🙈。哈,又邊諗到會喺咁嘅情況下食咗呢。實習女店員態度超好,絕對值得讚賞👍。每當有客人(包括我哋)喺門口睇餐牌之際,佢都會主動開門邀請客人幫襯。同時,佢全程保持禮貌,我問及食物詳情時,佢有唔清楚嘅地方會向廚房求證,唔係敷衍了事。餐廳環境好舒服,冷氣充足,加上而家有限二人一枱,座位超闊落。另外,裝修簡約,以白色同綠色為主色🌳,配合番食素嘅感覺。素菜款式可算係齋口唔齋心,不過都OK嘅,始終有時加啲創意同幻想力,確係會令食物好食啲😆。呢度連黯然銷魂飯都有!不過我哋叫咗嘅係素食套餐(兩餸飯餐)同撈米線。素食套餐($43),項目包括兩款菜式、白飯以及湯或熱特飲。素菜款式有8️⃣八款揀,並且會不定時轉換,基本上大部份菜式都有「肉」。套餐造型幾精美,餸菜同飯係分開上的,餸碟就一分為三格,幾款唔會撈埋一齊😉。白飯係可以添飯的,本身唔算細碗,但因為餸汁好食,所以先覺唔夠。麻辣蘿蔔牛腩,佢個樣比真.牛腩更像真,就連🐮牛坑腩嘅一絲絲形態同塊筋膜都好似,「牛腩」應該係菇菌嚟,口感爽爽的,好好食。不過重中之中係啲蘿蔔同麻辣汁,蘿蔔由內到外都醃到入哂味、上哂色,而且又甜又無渣,好多餐廳都做唔到呢個效果!另外,🌶麻辣汁亦好鬼正,味道好濃郁,辣味啱啱好,夠出、但唔會搶喉🤤。咕嚕肉,呢個個樣就幾明顯係齋,因為睇得出啲「肉」應該係麵筋嚟,又有啲似素肉丸。咕嚕汁甜酸味適中,幾唔錯。不過「🐷咕嚕肉」無做到脆皮嘅效果就爭少少,而且只係得三色椒作伴菜,無菠蘿。所以整體而言,佢絕對係合格有餘,但仲有改進嘅空間!本日精選炒菜(+$5),炒菜竟然要加錢,份量唔算多,得五、六條小棠菜🥦。味道正正常常啦。不過要加錢就始終覺得應該要特別啲,唔可以白烚或者蒜蓉炒咁簡單。是日餐湯係雜菜湯,其實係番茄湯嚟🍅,味道偏酸,但應該唔係用茄膏開。蔬菜量唔算多,有薯仔同豆腐等。意式香草雞麻香米線($53),呢個係拌米線來的。由於佢寫住係香草🌿,所以賣相同我想像的都算貼近,係白汁底。不過我就估唔到有炒蛋(幾滑幾香),而且亦無諗過「雞」係細細粒嘅「雞粒」。雞粒得五粒,份量少咗啲,但我都唔恨食,因為唔太啱我口味,外皮太硬;我懷疑佢根本就係一包包零食嗰啲齋雞粒嚟。未撈匀之前,係見唔到啲米線同醬汁;不過一撈之下先發現原來咁多汁!醬汁係米黃色,以為係一般忌廉汁,因為話係香草;又或者帶有麻醬味,因為話係麻香。但我勢估唔到隻汁原來係咁勁麻味,麻辣個「麻」啊,超級無敵惹味😋,條脷維持住少少麻痺,但又可以繼續食。呢隻味道就係我尋尋覓覓要搵嘅麻辣味,辣度唔太高,可能因為有啲忌廉汁中和?再者,我最欣賞嘅地方就係夠重口味,我個人認為麻辣好食一定要夠鹹。米線偏幼身,煮得較有嚼勁,勁掛汁,好好食😍。是日特飲係菊花圓肉杞子茶,凍飲要加$2。🌼菊花茶好冰涼消暑,飲落好清新,並唔會過甜。飲品真材實料,有勁多杞子同龍眼肉,餐牌仲介紹有好多功效添。我真係無諗過連飲品都係咁出色😳。點解要食素?就好似餐廳所講,可以有唔同嘅原因,包括愛護動物🐶、宗教信仰、關心健康、支持環保♻️或轉轉口味等。另外,我認為亦可以係為咗追尋好滋味而食素,原來齋都好好食㗎!總括嚟講,餐廳嘅出品係完全顛覆咗我對素菜嘅印象😱。其實我一向都知素菜唔等同齋食蔬菜咁單調,但好多時味道都會偏淡,而且唔同款都係咁上下口味。不過我認為呢度嘅素食直頭係好食過食肉,無肉不歡嘅我並無誇張呃你;再加上價錢相宜,絕對值得一試。 繼續閱讀
深水埗最近很多素食餐廳開業,對區內的素食者來說實在是一大喜訊,或者你間中想食健康少少,都可以有更多選擇。素味牽開業之前,元州街這邊完全沒有素食選擇,現在可以吃到平價素食套餐,還有素食版黯然銷魂飯,環境和食物質素都唔錯,而且五十蚊可以落樓好平價。素味牽在元州街最旺的地段,很容易找到。新店6月1日開始試業,目前還有特價優惠,午餐時間都差不多客滿,生意唔錯。室內設計明亮,牆身都有佈置過,一排排桌椅都排得幾密,不過坐得舒服既。素味牽主要做素菜套餐,九款菜式可以任揀兩款,菜式會不時更換。套餐另附白飯、湯或熱特飲,每日餐湯和特飲都有不同,餐牌上面都有列出來。素菜套餐也可以加 $5 多個炒菜,另外也以免費添白飯,也可以加錢轉其他飲品。除了素菜套餐,這裡還有一個主打「黯然銷魂飯」,用素叉燒+日本雞蛋+秘製豉油+珍珠米,睇個樣都唔錯令人好想試下。餐廳現在試業階段,惠顧素菜套餐或者黯然銷魂飯都減$10,計起來真係幾抵。 黯叉銷魂飯 HK$50食黯然銷魂飯最重點其實係個豉油+蛋汁撈飯,素味軒個秘製豉油好好食,連兩條菜食起來都甜左好食左。素叉燒用麵筋製成,咬起來中間其實還是麵筋口感,比較缺少瘦叉燒的層次。不過素叉燒外面燒得幾脆,個蜜汁都好惹味。雞蛋因為係日本蛋的關係,的確好大隻又鮮美。素叉燒的顏色都幾靚,外表非常吸引,配埋個豉油係幾好食。裡面可以清楚吃到是麵筋,口感像偏肥的叉燒。 蔬菜金錢袋 HK$10(加點價)素味軒有兩款炸小食,跟餐加點只係$9/$10,都可以試下。兩款小食分別是蔬菜春卷和蔬菜金錢袋,這次試的是金錢袋,外皮顏色看起來很淺色,不算炸得很香脆。入面是蔬菜絲餡料,我就覺得餡料太濕,味道有待改善。元州街是深水埗很熱滿的平價美食熱點,現在終於有素食選擇啦,襯新開張有特價不仿來試下。 繼續閱讀
(以上食評乃用戶個人意見 , 並不代表OpenRice之觀點。)
等級3 2020-10-26
0 瀏覽
經過元州街市政大樓,見到附近食店(隔離就係加藤屋)好多人,要排隊。素味牽少人啲,就去試下素食 。 店內環境好舒服 有講到點解有食素 餐牌 黯然銷魂飯 $50呢個名源自《食神》,即係叉燒煎蛋飯🍳素食店當然無可能有真叉燒啦!不過蛋奶素嘅朋友,可以食蛋,所以蛋仲係蛋,不過煎得今次無脆邊,反而用麵筋造嘅素叉燒好脆。豉油煮過甜甜地,都幾好。傳統黯然銷魂飯用泰國香米,但佢哋介紹用日本珍珠米,出來都真係珍珠米。黏嘅圓米配脆叉燒,好似都唔錯。凍洛神花茶 +$2酸酸甜甜,甜味多啲,但因為佢哋舖頭用左冰糖,所以比較清甜。 (加配)蔬菜金錢袋2件 +$10小食可以揀春卷或者金錢袋試過原來都係春卷皮包菜,裡面有粉絲同少少薑味,有時食皮,有時食餡,都幾好。 繼續閱讀
(以上食評乃用戶個人意見 , 並不代表OpenRice之觀點。)
等級3 2020-10-26
0 瀏覽
成個十月都食得好放縱,呢幾日係咁俾人話我肥左。於是諗住食少一兩餐肉,去食下齋。素食套餐$43(精選炒菜+$5)有大約十款餸,可以揀兩樣。加$5要個炒菜,加埋就有三個餸。套餐仲包埋是日餐湯/是日特飲,同埋白飯一碗。唔夠食嘅話可以免費加多碗飯。🎃南瓜湯是日餐湯係南瓜湯,好多南瓜蓉,好濃,味道清甜,好飲。🥔黑椒薯角雞髀菇味道同平時食黑椒薯仔牛柳粒差唔多,不過當然唔會有牛柳粒喺入面啦。不過曾經食過第二到有啲好好食嘅黑椒薯仔牛柳粒,啲薯仔係有蜜糖味之餘仲要係脆嘅,仲正過啲牛肉。但大部分餐廳都唔會做到呢個效果,係正常嘅。呢到都係正常嘅質素,薯仔唔會太硬,不過都唔會係脆皮嘅。大約有三分一係菇,菇好食,咬落去會有汁。🍅番茄炒蛋好多時喺出面食嘅番茄炒蛋都係落大量嘅茄汁,於是好甜,味道會好假。但喺屋企,媽媽整嘅番茄炒蛋唔會落茄汁,反而會落大量嘅番茄,味道會係番茄天然嘅酸甜味,雞蛋又會炒得好嫩滑。所以雖然我好鍾意食番茄炒蛋,成日出去都會忍唔住叫番茄炒蛋,但一直都淨係覺得媽媽整嘅番茄炒蛋係好食嘅。但呢到個番茄炒蛋味道竟然同媽媽整嘅都幾貼近,又係食到天然嘅番茄味,而唔係茄汁味。雞蛋雖然炒得冇媽媽炒嘅咁嫩滑但都炒得唔錯。所以呢個有驚喜。🥬精選炒菜用左蒜蓉炒,炒得幾香。呢五蚊值得加。🍚白飯見佢有得免費添飯,就以為佢本身碗飯會好細碗。點知原來好大碗,食完一碗已經好飽,唔洗添飯。個飯應該係珍珠米。其實唔食肉都唔一定可以減到肥,點樣煮同埋煮嗰陣落得多唔多油先最重要。呢到雖然唔會話過油,但都唔係少油,同平時其他餐廳差唔多。所以都係減唔到肥架啦。係有一餐唔食肉會自我感覺良好少少。另外,學生證有得減$6,最後$42埋單真開心。 繼續閱讀
(以上食評乃用戶個人意見 , 並不代表OpenRice之觀點。)