影片
364 瀏覽
上星期三經過交加里，見到有新食店開張，小肥就當然要去八吓啦 ！當日喺「紀文」門口影咗兩幅相，就順便攞咗張外賣紙準備星期四同公司同事試食。「紀文」附近有好多學校，為免同學生們逼，我地星期四中午十二點前就已經打定電話落單，外賣自取。接電話嗰位姐姐仔好好禮貌，聽聲已經覺得佢好落力，我地改咗幾次食物佢都毫無不滿，真係值得一讚 ！XO仔五分鐘內落到去「紀文」舖頭，見未有其他客人，食物又未準備好，所以就再影咗幾幅相。「紀文」店內非常光猛，乾淨企理，不過一張櫈都冇。門面有位姐姐仔負責收銀，其餘有五個伙計喺廚房入面煮野食，比食物小弟時更細心問到要幾多份餐具；快餐店都有咁好招呼，真係難得 ！餐單列名，外賣冇額外收費，叫套餐仲有小食送添，小肥就叫咗一份滑蛋雞肉飯套餐： 滑蛋雞肉飯（$39）：滑蛋其實做得好合格，而且飯粒肥大軟熟，可惜主菜之雞肉出咗事，因其肉質猶如罐頭魚一般「削」，好唔掂 ！ 麵豉湯：麵豉湯超咸，加咗成碗水都沖淡唔到 ！ 蛋小食（免費贈送）：涷食o既蛋小食味道帶甜，爽爽地，OK啦！「紀文」屬快餐店，主打日式關東小食、炸物、咖哩、飯、烏冬、蕎麥麵。舖面較細，且冇櫈，故此食客多以外賣為主。雖則服務生勤奮有禮，但最重要o既食材及味道水準都頗低，價錢又唔係話平，XO仔情願去其他食肆覓食囉 ！
繼續閱讀