4
9
6
營業時間
今日營業
07:00 - 22:00
星期一至日
07:00 - 22:00
以上資料只供參考, 請與餐廳確認詳情
12月14日揾食肥華，一心到紅磡買十年花雕皇，路過此店，正值午饍時，肥華又腹嗚如雷便走入此店醫肚，在呢個午膳時間，肥華單拖一人揀咗個靚四人窗邊卡位坐，竟然冇俾此店員工，要求轉坐撘位圓枱，真係有啲愕然及驚喜。而此店嘅招牌名物，魚蛋粉就真係令肥華失望，本來在現今時勢，在普通魚蛋粉麵店內嘅魚蛋，唔爽，唔滑，冇魚味，就預咗，但最奇就係此店嘅魚片竟然係有，魚肉腸味咁就肥華，真係人生第一次食到，加上湯底奇淡，而河粉又碎濕濕，連挾嚟食都有問題，食完呢碗此店招牌名物，再望個場在午市時段入場情況，肥華，終於明白點解，今日單拖都可以坐，四人卡座，嘞
繼續閱讀
唔知食緊咩，食唔食自己諗 晚上十一點，唔算忙時間，河粉嚟度仲黐埋一嚿嚿，啲牛腩咬唔落咁制，好多根，啲牛根就超淋，牛肚似像根，水都冇杯，啲筷子仲要黐立立，要自己搵紙巾抹。
繼續閱讀
📍章記香港仔魚蛋王🇭🇰 紅磡民裕街15號地下人越大越嚟越識欣賞牛腩麵呢間朋友話好食一於就去試吓係唔係咁好食😋 原汁牛腩麵 $34 加腐乳通菜 +$10😋 原汁牛腩撈麵 $41碗嘢一擺到上枱內心哇咗一聲點解啲牛腩咁多咁大件嘅😂一食落去超淋超好食唔會話好肥 但係又有少少肥膏 好正食極都仲有😂 我諗有起碼十舊至於個通菜份量都ok 但腐乳有啲鹹 佢個湯底可能有少少味精 因為食完有啲口渴不過個牛腩真係好食衛生情況差少少 見到有螞蟻係台但呢個價錢 咁嘅質素同份量 好👍🏼
繼續閱讀
放工前突然間好想食牛丸，但又只可以係紅磡呢頭食個快晚餐，落車後周圍望下有冇牛丸食，真係有喎，冇理其他即刻行入嚟，叫返碗牛丸米，再係餐牌見到加錢有菜，又或者炸魚皮，點好呢，揀邊樣呢，最後係炸魚皮勝出左。雲吞麵舖有樣好，同職員落完單會好快送食物嚟，唔洗等太耐。5粒牛丸，米粉，其實都正常，不過湯底好咸下，如果唔食魚皮還可以忍受到，但佢個魚皮調味咸，如果單食就可以食到幾塊既，但當兩樣食品都係咸，魚皮正路都會浸少少湯先食，咁樣就好咸喇。如果佢個魚皮唔調味，就好好多囉。
繼續閱讀
走進舖頭心臟地帶，廁所係正附近，瀰漫著濃烈鹼水酸縮味，惡嗅難當。零星的食客各據一方，只剩下廁所位，唯有照坐，拿拿聲食完即閃。香港仔魚蛋連飯都做埋喎，以前潮州粉麵那有飯供應呢，真係生意難做，某些還做埋雞牛豬扒快餐添呀 ﹗雞都有得叫？我無雞不歡喎，梗係要一探虛實啦﹗食家要有冒險精神，勇字當頭，繼續燃燒我的小宇宙。我只有十多分鐘食個 lunch，您班神州大媽侍應係度搞搞震，係都要我發火，最後一次幫襯！剛好門口附近有吉檯可以獨佔，打算拿拿聲幾分鐘食完即閃。約13:45坐低，等到呆終於有得食，皇恩浩蕩啦，留 4 分鐘比我倒碗麵落肚，仲有成 1 分鐘可以跑返回公司添呀﹗等食其間，大媽侍應們安排食客入座鬼殺咁嘈，左掉右掉，迫迫夾夾、舖面陝細、地方淺窄，食客們根本不願意坐低，食都費事食，立即起身轉場，得您一間食肆咩﹗有十幾個菲律賓自由行想食，最後都放棄即閃離開。終於等到我碗麵送到，已經趕到不得了﹗剛有 3 位食客問有無位，要求我轉去後面搭檯，火都黎﹗忍唔住講句我都係食 3 分鐘啫，等食都等左 10 分鐘喇﹗同時間後面位食客大嬸亦非常不滿怨道張檯咁細點坐 3 個人呀，頂手頂腳﹗新黎 3 位食客都唔想坐，掉頭走左喇﹗跟住先叫我坐返原位，我真係著晒火﹗連肉連麵帶湯帶肉掃落肚，13:59 分脫出，雙併 $37 蚊貴到嘔血又難食，環境惡劣，服務極差﹗墨魚丸牛腩麵走蔥，難食到自盡﹗依位年青師傅是否新上班的呢？放低碗麵已聞到濃烈鹼水味，食落壓味霸道野蠻。麵質不爽帶韌，漿口黏黏，感覺及口感都不舒服，到底有否過冷河？有否沖乾淨？食完見到湯底厚厚杰撻撻，飲多滴都不想。墨魚丸有著陣陣腥味，實淨粉口，低於水平。索價 $33蚊只有給這類食物，我寧願返去食車仔麵啦。墨魚片牛筋麵走蔥，無墨魚鬚？嬸嬸提議轉墨魚片，一試無妨。明明諗住食撈麵，點知坐低後完全忘記。湯底超級霸道滷水豉油味，地獄濃咸，免強還可以頂得住。麵條十分爽彈，掛著大量辣椒渣使咸湯可以中和一下，撞在一起減低咸度。墨魚片，白雪雪質地彈滑似足魚蛋，最敝味道咸到死呢。牛筋很平嗎？勁多喎。結實黏膠討人喜歡，嚥嚥韌韌，要用多一點牙力，但係味道超咸，比墨魚片更加咸。用麵條捲著才吃比較好一點，咸咸咸再加咸，食完勁頸渴囉。雲吞牛筋河走蔥，雲吞簡單可口，食得到蝦、食得到肉，蝦爽肉彈，雖然包到散散地不夠實淨，比尖沙咀錫記乒乓球雲吞更好食。我都話走蔥咯，講左幾次喇，火都黎 ﹗挑晒蔥落張檯，您自己慢慢抹！我都話要牛筋丸咯，牛筋丸、牛筋丸呀，講左 3 次喇，用心聽下人地講野得唔得？碎濕濕腍劈劈散筲筲的河粉，想煮糊仔嗎？只好用羮畢黎食，湯底淡如水，淋上大量微辣微咸不香的辣椒渣好一點。牛腸牛筋丸粗麵走蔥，真心覺得麵底較早前份量多，幼麵及河粉都有同樣情況，終於夠飽肚喇。約 5 分鐘多才送到，都知道食丸間中都要等耐一點既。粗麵黐埋一舊要用筷子攪散去，質地腍劈劈，煮到過晒龍，濕淋淋使到蛋香流失。明顯一早麵底已經煮好，不過烚丸時間較長，師傅唔係唔知架麻？終於食到牛筋丸，早前幾次幫襯只聽到牛筋，我都話要牛筋丸咯﹗牛筋丸比普通丸更爽更彈，不硬不鞋，還射出肉汁，甜美味濃，可以添食。微咸微香辣椒油要倒三大匙撈麵才夠喉，本身夠咸都不用再加豉油。一定要豪氣地大注大注吸啜先夠開心，迅間秒殺，爽乎 ﹗潮州咸雞湯麵，她來至潮州？客家鹹雞就食得多，嘆潮州雞都係第一次 ﹗嬸嬸真好，専登比碗蔥油我，麻煩晒。蔥油？可以試試撈湯麵食喎，放棄辣椒油。來一口咸雞，唔客氣喇﹗強烈霸道的鹽水味，有點嗆喉，用湯浸浸洗洗都係於事無補。雞肉霉爛乾爭爭又起晒渣，救命呀﹗幼麵爽爽，但散發刺鼻鹼水味道，師傅到底有否將幼麵啤水沖洗乾淨先倒滾湯出貨架？唯有自己諗下解決方法，隊一大篤蔥油，沒有改善，只令到湯底咸雞味更重，食到我滴晒汗又黑晒面，無晒心機喇。難食到出奇，一試難忘，再試投降﹗浪費左寶貴 quota，頂硬上求其食晒去。豬手伊麵走蔥，得兩舊豬手咁少？淡茂茂的南乳味道，南乳水浸豬手嗎？南乳味十分微弱，食原始豬肉味嗎？豬皮及豬肉都非常有咬口，豬皮爽脆架喎，故意的嗎？湯底無味既？我應該要求加腩汁才正路，雖然腩汁都不是造得十分好，總好過無味既 ﹗雲呑牛肚伊麵走蔥，伊麵烚過火，腍劈劈泛著滾水味，沒什麼味道可言，無蛋香無麵香，白紙條一樣。辣椒油救命時候又到喇，狂撈不香不辣辣椒油，變得咸咸地蠻不錯喎。無味伊麵捲著辣椒牛肚塞入口，入到口唔難食。牛腸牛腩粗麵走蔥，先呷兩口湯汁，清淡如水，不香不甜，只有微微滷水及牛肉味道，即刻倒入大量辣椒油點綴一下，咸咸地而油味突出，香辣一般，總比無既好。牛腩半鬆化軟腍、半瘦削乾硬，質素十分參差，而且散發討厭羶味酒益味，好可怕啊 ﹗牛腸外皮嚥韌有嚼勁，非常有趙頭，滷水入味濃郁，味道不錯啊﹗裡面藏著大量絨毛及脂肪，入口爆開，舒服暢快。在此絕不可以食鹼水麵，異味壓味強烈無比，食伊麵、粗麵較好。粗麵實淨完整，滑帶嚥韌，不過腍不散碎，老懷安慰，合格。粗麵掛上辣椒捲埋腸腩齊齊食，多種質地及味道，比單一品嚐更有趣味又可互補不足。魚蛋牛肚麵走蔥，極腍帶爽有著極濃滷水味的金錢肚，不過不失。魚蛋少彈少滑，咸香味濃，鮮魚味薄弱，食得過。粗麵實淨完整，滑帶嚥韌，不過腍不散碎，老懷安慰，合格。魚蛋牛丸麵走蔥加腩汁，牛丸硬實，不彈不滑，淡茂茂。蠔油生菜，鮮味蠔油不咸不濁，搭上清淡生菜也不錯，爽爽又多水。牛什麵走蔥走肺，牛膀、牛肚、牛腸，彈滑乾綿嚥韌有齊，滷水滲透每條纖維，難得好味道﹗勁撈辣椒油，更刺激惹味 ﹗黑椒牛丸牛膀麵走蔥，黑椒牛丸，爽彈味濃，黑椒辛辣醒胃。牛膀，綿綿嚥韌，索盡湯汁，每口水潤，非常美味喎﹗湯底香濃，幼麵就有點過腍。實太怱忙，又只剩下 5 分鐘倒碗麵落肚，表演飲滾油，燙到颷眼水，禮成即閃。魚蛋牛丸麵走蔥，牛丸硬實，麵過腍，湯底啖而無味，辣椒油不香不辣。其實已講多次唔再幫襯，但實在太趕時間，間間食店排長龍，是鬼旦啦！如果不是趕時間貪近貪快，真係唔會幫襯，浪費我寶貴既 quota ﹗牛膀牛肚麵走蔥，牛膀，綿綿嚥韌，索盡湯汁，每口水潤，非常美味喎，但湯底香濃有點油膩。
繼續閱讀