祥興茶餐廳 (已結業)

多謝杜蘇芮這個來得快，去得快的颱風，不然，我也去不到祥興的Last Day。早餐點了個豬扒煎蛋公仔面、熱奶茶。廚房會把豬扒切開，十分細心。至於公仔面及奶茶，不過不失吧。

渣甸街滿佈不同菜式的餐廳 , 車仔麵 , 雲吞麵 , 四川 , 雲南 , 上海 , 泰國 , 越南 , 日本 , 真係花多眼亂 而當你行到街尾 , 你會發現一間毫不起眼的平民茶餐廳 , 價錢亦比較便宜我喜歡它的兩餸飯 , 因它的例湯足料又冇咩味精 , 今日我揀左豆腐豬扒飯 , 它的豬扒煎過 , 好香口 , 仲幫你切開一小塊 , 豆腐同肉碎一齊煮 , 有少少汁茨 , 撈飯食一流 下次行過呢頭都可來呢度食下 , 環境雖然唔係華麗 , 但食物 ok , 伙計們都好有人情味

知道係銅鑼灣要搵平野食真係好考功夫 , 今日竟然係渣甸坊搵到 呢條街食肆臨立 , 昂貴舖租之下 , 每間食肆價錢都咁上下高 , 但行到差不多最尾 , 竟然見到呢間茶餐廳 , 佢既裝修應該有番咁上下歷史 , 門口睇佢餐牌 , 價錢可以話好平喎 , 於是決定入去試下 伙計很熱心招呼 , 老實講 , 當時店內都住滿八成 , 伙計應該很忙 , 但他們仍然表現出很友善去回答我們的問題 , 又熱情地介紹我地叫 " 兩餸飯 " , 望一望牆上介紹 , $ 25 有兩個餸 , 仲送例湯 , 好抵啊 , 一於試下啦 我地叫左兩款 : 黑椒雞扒炒椰菜 , 咖哩雞豆卜肉崧 , 送左兩碗例湯來 , 平時一般呢 d 例水都係味精湯 , 但我飲落去唔太覺味精喎 , 相反湯味濃郁 , ok 喎 老闆話下午 d 湯已煲到夠味 至於兩個碟頭飯 , 我不會評論太多 , 廿零蚊想點啫 不過我都想講下佢既味道不太咸和太油 , 呢點我已經 ok 喇 如果你係附近做野 , 想食得平又過得去既 , 來呢度你應該唔會失望

14-3-2010又等朋友落堂開飯, 又嚟未夠鐘就餓得發慌, 又要搵地方食平價早餐, 今次撞了入渣甸街呢間勁低調的茶記. 11:45am 嚟到已無 $20 樓下的「早餐」供應, 不過散叫都唔係好貴, 叫了熱奶茶 + 餐蛋治烘底 (total $22) 止止肚餓.奶茶色水有點「奶」, 飲落奶味就好淡; 茶底好稀薄, 但飲落又幾澀, 唔得喎. 餐蛋治烘底: 炒蛋幾滑, 食落淡淡鹹香, 不過實在油膩得有點兒那個; 午餐肉亦然, 油淋淋軟撻撻的, 感覺麻麻; 麵包輕輕烘過, 食落好韌, 唔知隔咗幾多晚夜? 仲要索油得很, 食食吓還是放棄好了.門面低調, 店內環境亦然, 阿姐們就幾友善, 十分「街坊」的一個地方.$22 埋單, 銅記嚟講係勁平, 輕食可以一試的.

由於朋友最近手緊,只好將平時$25左右的預算削減至<$20 雖然舊式,但坐得很自在,店員亦不會迫你立即選擇.-豬扒蛋麵$18 (不要蛋可選菜/腸,不過後者不會在餐牌中顯示)1塊輕輕炸過的豬扒,輕易可以貼骨的咬下一口又一口的豬扒,不過如果另上而不是浸在湯就好了!公仔麵不是出前一丁喇,雖然我平時不喜歡太腍,但這種麵有點香口膠FEEL,就腍一點會比較好........-豆漿,口感有點"杰".......不過味道都是正常的.......以銅鑼灣來講,這個價錢吃早餐,已經是相對便宜的喇!

八月初，親眼見証南華以兩球輕勝熱刺後，街上滿滿都是大球場散去的人群，搵食頓時變得困難，於是和陳真走入中學時代常去的「up dup 茶餐廳」－ 祥興。喜歡以「up dup 茶餐廳」形容位於渣甸街的祥興，因為這間小店位於街尾的一角，毫不起眼，相比附近的食肆，環境更是殘舊，但竟能一直屹立至今，其中一個原因應是其便宜的價錢，每日兩點後，炒粉麵飯特價只需二十四元，更送冷熱餐飲，在銅鑼灣區簡直是絕無僅有的。走進店內，平日水靜鵝飛的餐廳，因球賽日變得熱鬧非常，令本已狹窄的空間更形壓迫。甫坐下，老闆就表示是晚沒有白飯供應，原因是「飯煲跳制、煮唔切飯」，這個技術性問題聽落有點硬滑稽，但想深一層也是可以理解的，始終是家庭式小本生意，一時間人頭湧湧，又如何應付得來呢？反正想吃炒粉麵，就來一客炒貴刁，陳真則點了干炒豬頸肉炒粗麵，餐飲分別是凍鴛鴦及百事可樂。金黃色的炒貴刁，賣相十分港式，純粹以咖哩粉炒製，再加入少量配料，包括蛋絲、辣椒絲、火腿、洋蔥及芽菜，份量中規中矩，味道略為偏鹹，鑊氣更是一般，幸河粉炒得均勻，口感爽滑不太油膩， 絕不糊口，以此價錢絕對收貨了。陳真兄的干炒豬頸肉炒粗麵，豬頸肉數量不多，炒粗麵則

喜見南華大勝熱剌 2 - 0. 我同搵食能手二人, 賽後歡喜的回去銅鑼灣找飯食, 原先決定新寧, 但價錢 Out Budget. 去到另一間舊式扒房, 亦大排長龍. 突然, 二人想起, 大家仍是純網友時提及到, 渣甸街的一間 "up dup" 茶記. 就離開長龍, 再路過三名身紋著 South China, 每人拿著一渣啤酒, 口中唱著春暉 春暉 春暉 (張春暉) , 的三名醉老外....之後在人群同小巴群中, 找回這一間, 小小的家庭式茶餐廳. 一入門口, 老闆已表明, 唔記得"禁"飯煲而今日冇飯食. 問了仍有炒粉麵麼. 有就決定坐底. 忙碌的老闆同老闆娘, 搞了很久才有空理會新客. 點了炒貴刁, 同一個豬頸肉粗炒. 食粗炒, 預左佢好油, 果然是油面, "令立立", 不過食到底時, 起瑪沒有成碟油. 味道就咸了少少, 不過帶少少焦味又覺得佢鑊氣不差.炒貴刁, 新加坡菜式, 味道唔夠辣, 配料又唔係幾夠. 感覺上非常普通. 而且, 同我食既粗炒一樣, 味道比較咸.....難道呢間野既宗旨是"咸就是好味道" @@不過, $24 for a dinner, 仲平過我食快餐店lunch.

原來聯威傍邊還有食店，但祥興門面細小，毫不起眼，若不是在對街望過去，就像前次那樣，走漏了眼。餐牌所示，各類食物多是廿多，但淨坐卻要三十大元！此告示高懸牆上當眼位置，應該沒有人會以身試‘法’罷。最爲吸引的是全日兩餸飯，餐牌上列有八餸，任擇其二，連飲品，只是廿二元，認真抵。要了魚香茄子倂青瓜肉菘，貪其好送飯。魚香茄子帶有些許鹹魚香味，和些許紅椒的辣，相當惹味。青瓜較淡口，這味菜則以蒜香來取勝。一濃一清，鴛鴦瓜肉飯，不錯。是夜例湯為青紅蘿蔔豬骨湯，料足，但湯水較爲稀薄，不過以這樣的價錢，實在不能要求太多。

唔經唔覺又一日 一返親工就覺得自己只係機器返工 食 返工 放工 食 訓未必係無意義 但唔係我想過既生活但奈何 學生哥無錢返學 唔返工真係咬自己餓死為左再節省金錢就行左黎呢間出名平既食店地方唔大 但坐得唔辛苦好多西裝佬都低頭埋首自己碟飯見到雙餸好似幾岩胃口又抵 就整碟黎啦。叫左招牌炸豬扒同黑淑雞扒一黎以為少左雞扒原來只係整亂左。因為無諗住都係炸食落真係唔差 唔會乾爭爭或者炸粉太厚雖然唔會係香口 但唔難食的而個黑淑汁係很可以的 微微辣 好對胃口但雞扒就真係差左d 好似被調味料強暴過杯豆漿都很有豆味22蚊 仲想點??? 假如無錢 呢度係堅抵食同值得再來的。笑臉不可不比

昨晚六四，每年皆去維園悼念。今年，男友答應一齊去，事前想吃過晚飯先。於是便拐入渣甸街，看看有甚麼又平又快的食店。選這問是因為見它有兩餸飯，炒粉麵都係 $23。入到去，店面極細，客人幾乎背貼背。與男友各要了干炒豬扒意和干炒牛肉米，加兩杯凍飲。 不久，兩碟齊來，色澤一樣，不過唔係干炒，濕濕地的。意粉好碎下，但米粉就不錯，味道沒有偏鹹，食落也不是過於油膩；豬扒不太好食，冇肉味。埋單 $46，連凍飲都不另收費，銅鑼灣邊度搵？唔怪得之客如輪轉啦。

前幾日係cwb 唔知食咩dinner好行行下見到一入去都無咩期望點知一食就知咩事果日我叫左個2送飯,$22蚊好平,重要包湯有好幾款送簡,我簡左茹子同黑淑雞扒特別想講個黑淑雞扒拎出黎重脆ga,好食$22蚊真係又抵又好食我睇過全店都好似唔過$30唔好比佢門口扼左

15 May 2007 (Tue) - 晚飯睇戲前食咗嘢先，諗住睇完就可以返去睇溏心，哈哈～～呢間嘢人少唔敢黎，因為門面up dup，絕對感覺污漕，入到去都有陣勁舊舖味，不過碟頭飯同炒嘢都極平，全日都係咁既價錢，好抵！炒飯麵好似$24，下午茶餐至到夜晚七點，嚇人！兩餸碟頭飯只需$21，己跟湯或豆漿！真係好好好抵！當然味道一般，唔會食到肚痛，份量亦OK，我叫咗茄蛋+薯仔排骨飯+豆漿，只係$21，我哋三人加埋食咗$58咋，但係己係兩個人食兩碟飯，一個就食米粉！我諗咁既價錢，真係第二度搵唔到咁平！

同朋友行街, 肚餓, 想食平野, 於是黎祥榮.兩餸飯, 八個餸揀, 揀左魚香茄子同咖哩薯仔雞.係就係普普通通冇特別, 不過份量夠, 一定夠飽.紅蘿蔔豬肉湯一碗, 飲完好口渴.

呢間茶餐廳個樣好似好摺咁﹐又唔係好爆滿。點知一試之下﹐原來禾稈珍珠。我已經食過幾次。最初食個豬扒炒公仔面﹐好似$23蚊左右。豬扒好鬆軟又夠味﹐公仔面都好正斗。咁既價錢絕對收貨。之後有幾次試佢既招牌兩飯﹐八樣揀兩樣﹐加杯豆漿或例湯﹐都只係$20。係銅鑼灣簡直係超級抵食。八樣我試過大半﹐魚香茄子同栗米班腩好正呀。雞扒同豬扒都好滿足到我呢個鍾意食肉既人。我記得似似仲有蕃茄炒蛋呀咖喱雞呀﹐真係幾多選擇我睇過餐牌仲有好多選擇﹐不過可惜我唔係住附近﹐無咁多機會試晒。服務態度都幾好架﹐唔會寸寸貢﹐都幾好笑容。地方就細D同舊D﹐不過都叫ok乾淨。

宜家想食野都要用三四個字四圍搵,都幾晒時間.不過搵到D虎藏龍都幾開心.好似喱間茶餐廳,佢應該係成條街最up dup o既餐廳,但喱碗餐肉火腿蛋公仔麵又真係幾好食.麵底係比一般公仔麵o既爽口,唔知佢用邊隻公仔麵呢?火腿又係有陣香味,又係唔知佢用邊隻火腿呢?最重要係佢全部野即叫即整,例如煎蛋,煎午餐肉,煮麵,所以喱碗普通o既公仔麵係幾好食.連飲品$15......