火鍋煮場

營業中

休息中

原本諗住黎打邊爐兼飲德國啤因為之前join咗一百蚊一百支的plan未用完仲有好多支，點知黎到時見隔黎枱食烤肉，於是我哋就問吓可否改食烤肉兼同時用唔用得一百蚊一百支的啤酒plan，結果係得，所以今晚就變成BBQ之夜。我哋叫咗火雞腎、牛脷、三式牛拼盤(安格斯牛小排、和牛同牛展)、雞翼同埋茄子，本來見慳咗個湯底錢想叫多少少嘢，不過好彩侍應姐姐叫我哋食住先，驚我哋食唔晒，結果真係飽到上心口，呢度啲份量比起出邊其他火鍋店真係大碟好多，但係價錢就差唔多，所以好抵食。用生菜包住啲肉食感覺上冇咁肥膩同滯。令我哋都好渣，只係飲咗四支啤酒，仲有80幾支有排飲😅

今晚嚟呢間打邊爐係因為有個朋友話呢度有$100 100支啤酒，熱辣辣打邊爐可以肆無忌憚飲啤酒梗係無敵啦。湯底揀咗最傳統嘅鴛鴦鍋，就係集材清湯配沙嗲湯底。紫菜響鈴即叫即炸，可以當小食就咁食或者好似平時響鈴打邊爐咁樣浸一浸湯底先至食，我就覺得浸一浸湯好味啲。同樣都係可以當小食嘅仲有呢個脆炸午餐肉，我又係覺得呢一個浸一浸湯先至食好食啲。呢碟係大size安格斯牛小排，牛肉質素高，份量好足，啲雪花紋好靚，食落牛味濃而且軟綿綿。手打三寶丸自家製嘢新鮮好味，鯪魚球蝦丸同埋墨魚丸之中我覺得蝦丸最好食，另外旁邊影到少少嘅韭菜餃都好好味道，啲韭菜好新鮮，而家寫食評先發現原來冇影到佢相。聖子王有大隻有新鮮，我哋三個人就叫三隻，大家都覺得好正。成餐飯先係飲咗五支啤酒，朋友話仲有80幾支，下次可以再去飲，原來佢呢100支係兩個月之內要飲晒，一蚊一次真係好抵，似乎大家都出盡辦法去救市，益晒我哋。

呢間火鍋店唔好睇佢裝修麻麻哋，食物質素媲美尖沙咀銅鑼灣區嘅高質火鍋店但係價錢就保持返喺深水埗水平，啱晒我呢啲唔係食裝修嘅人。坐低先你兩個小食等齊人先開波打邊爐，叫咗炸雲吞同埋炸雞軟骨，炸雲吞似乎係自家製雲吞拎去炸，雞軟骨就一般貨色啦，配埋佢哋而家德國啤酒優惠一蚊一支真係抵到好得人驚，我哋都係咁以飲咗少少。湯底試咗清湯牛爽肉鍋，所謂嘅牛爽肉就好似介乎牛肉同埋牛筋之間，幾好食。海鮮就叫咗聖子同埋廣島蠔，啲聖子好新鮮同埋都幾大隻。佢個羊肉味道都唔錯，唔算太肥。呢度嘅手打院同埋雲吞都做得幾好，應該係自己整嘅因為食落去都覺得幾新鮮。呢度嘅黑毛豬柳豬肉味香而且咬落去煙煙韌韌好好食。另外我哋仲叫咗冰豆腐同埋菜。整體好食抵食。

今日同2個滾友食飯，當然係去滚啦。而家想選一家無限時火鍋，選擇不多，食物多數一般般，價錢都是較貴。今日這間去到熟口熟面，樓上只有3張枱有客，番查群組資料，原來2019年已食過，仲要坐番同一張枱，心想，那應該不是好抵食，所以book,枱時才沒印象。*蕃茄海鮮蟹煱 $188蕃茄味算唔錯，海鮮都幾豐富，有一隻細蟹無咩肉，但味道幾甜；2只蝦都算爽；三隻青口都ok；六隻蜆細細隻都幾甜；哩嗰湯底算係豐富，味道的唔錯，這個價錢算抵，可推介👍*安格士牛肉 $398出碟幾靚，樣味道ok, 但沒有特別好食。👌*脆肉鱞 原本叫白鱔片，後來想想應該是不是上錯了脆肉鱞，所以價錢不太清楚，彈牙味淡，幾爽口，算是一般般。*手打虾丸，墨魚丸孖寶 $98味道新鮮，都幾彈牙，個人覺得虾丸好味D，不過就細粒左D。👌*自制雲吞，水餃，韭菜三色餃 $78大大粒，好飽滿，雲吞，水餃有鮮虾，皮薄餡靚，味道都好味。👌*即炸紫菜響鈴 $68這個做得唔錯，紫菜增加層次感，很有口感，可即食或滾湯，推👍*炸魚皮 $68沒有很鬆脆，連平日十分鍾愛炸魚皮的朋友都只吃兩口，剩大半碟，麻麻。*什菜藍 $68筒喎爽口，黄牙白清甜，蕃茄ok, 生菜清爽

牛塔有霸氣，三層牛分別有唔同部位，乜都試下。第一層係牛白肉同安格斯牛柳粒。第二層有牛舌芯拼牛展。第三層係最闊嘅，分別放咗安格斯牛小排同埋日本和牛。咁多款牛肉之中我覺得最好食係安格斯牛小排，牛味濃香，肉質夠嫩，脂肪分佈均勻。第二好味嘅我會揀第一層嘅牛白肉，爽口夠彈性。和牛肉只係排第三，此終和牛真係比較油少少。象拔蚌刺身好新鮮，打邊爐前食吓先有一種幸福嘅感覺。炸響鈴超好食，即叫即炸夠晒新鮮。另外d啤酒好抵飲，$1一支德國啤平到痴左線，仲要係德國啤酒，而且味道真係好，仲有8款任揀，真係超誇張。

真係唔好睇小$100 100支啤酒嘅威力，仲要係味道唔錯嘅德國啤。上次同一班損友嚟開咗個plan，諗住起碼飲50支，點知個個講就凶狠，結果都係飲咗12支，仲有88支要喺兩個月內完成，於是今日又來幫襯，可惜原先五個人今晚得返兩個，我哋已經好盡力，每人飲咗4支，呢隻幾好飲，大家有機會可以試吓。至於啲嘢食其實都唔錯架，就以呢個響鈴為例，即叫即炸，攞到埋嚟仲係熱辣辣，非常有誠意。呢個羊肉真係幾新鮮，又唔會有瘀紅色一撻撻，雖然切得唔算好薄，但係放落湯度淥一陣就食得。呢個黑毛豬柳條好好食，肉質嫩豬肉味濃而且又有得咬吓，俾黑毛豬片更勝一籌。聖子超新鮮，好清甜。貪得意叫咗個冰豆腐，都唔錯。

呢間火鍋店火鍋配料質素高但價錢合理，性價比高，淨係睇呢碟安格斯就知道夠晒靚，佢呢度用牛小排，打邊爐一流。呢個西班牙橡果黑毛豬柳條好好食，有咬口得黎豬肉味濃。鱔片好新鮮，厚薄度啱啱好，滾一陣就食得。即叫即炸響鈴唔係咁多地方食得到，真係要趁熱同睇熱。蟶子好鮮甜，滾10秒就食得，呢個真心推介。其他火鍋料都夠新鮮。湯底叫咗皮蛋芫茜，無咁熱氣啦。另外我地仲叫咗兩個小食：炸墨魚餅夠鮮味夠彈牙。炸雞軟骨都幾大碟，餸酒最啱。

特選美國穀飼牛雖然係呢度最平嘅牛肉，不過味道同質素比想像中好，起碼都仲見到油花而唔係大部份都係白色脂肪。新鮮農場雞子係細細粒嘅，比平時食開嗰D雞子起碼細一半，食落又唔錯，一定要用佢比你的大罩呢去淥，否則會唔知去晒邊好難搵返出黎。黑豚肉都OK，肉質唔錯。自家製三色餃有水餃、雲吞同韭菜餃，每樣有3粒，呢個真係好食，D餡料好新鮮，呢個就係自己包嘅好處。即炸紫菜響鈴又係好正，即叫即炸，可以當即食小食，又可以落湯淥。呢個炸蝦餅又係好好味，佢D蝦膠好新鮮同埋佢蝦嘅成份都應該幾高。羊肉片無羶味，刨得都夠薄，淥兩淥就食得。手打蝦丸拼墨魚丸，又係好鮮味，我鍾意墨魚丸多D，勁正。西班牙橡果黑毛豬柳片呢個最有驚喜，食橡果嘅豬果然係唔同D，而且D脂肪分佈都唔錯。南瓜片都OK。衣家呢間火鍋店做緊$100 100支德國啤，真係誇張，第一次打邊爐飲啤酒唔洗就住就住。

$100 100支啤酒係咩玩法？真係未試過打邊爐飲啤酒唔洗就住就住咁叫都米話唔爽呢﹗我地好努力之下都係飲咗12支，仲有88支可以兩個月內用埋佢，即刻Mark時間再黎啦，計返條數，$1一支，仲要係德國啤，9款任揀，上面呢幾隻都幾好飲，真係抵到無朋友。一開始開咗個啤酒Plan之後先叫個炸雞軟骨食吓餸吓酒先。跟全叫咗個龍蝦刺身，然後再椒鹽兩食。隻龍蝦都算大隻，兼且幾新鮮。本來想食美國桶蠔，不過呢度無，所以改食廣島蠔，一份有6隻，雖然細隻過D美國桶蠔，不過味道都唔錯。碟牛望落去就瘦咗少少，不過食落又唔錯woo，新鮮度高，其實少D脂肪仲好啦。即炸紫菜響鈴，可以淥或者就咁食，我就覺得淥一淥先食正D。呢度D餃類都唔錯，叫咗個三式餃拼盤，有雲吞水餃加韭菜餃，三款都好食，三款都似係自己整嘅。另外仲叫咗勝子，一人一隻，好鮮味好好食。炸魚片頭同埋鯪魚滑就後加嘅，都唔錯。

環境雖小，但食材新鮮足料，價錢小貴，但勝在好味！叫左個芫茜皮蛋湯底，皮蛋好味！紫菜響鈴，萵筍正，三味丸中蝦丸好正，爽滑。只係唔飲酒既人，飲品比較少！可以增加多d款既飲品。

天氣終於凍返少少，係時候去打邊爐，鍾意黎呢間因為貪佢有德國啤酒飲。叫咗個炸蝦餅餸啤酒等齊人，個蝦餅彈牙好食。啤酒就主力飲呢兩隻，來自德國嘅，左面係黑啤右面係西柚啤，衣家仲要做緊特價$10一支，平過飲汽水。湯底揀咗豬骨湯，都幾多豬骨，另外D粟米都幾甜。呢度D韭菜餃都幾新鮮，味道唔錯，D韭菜好香，新鮮就係好食D啦。我地仲叫咗個手打蝦丸，一份有八粒，晶瑩剔透，幾新鮮幾爽口彈牙。打邊爐如果無肉又點得呢？不過我地反傳統，無叫一般肥牛，反而叫咗牛白肉同埋手刨羊肉。牛白肉基本上焯一焯一見佢縮就食得，好爽口，呢個真係好好食。羊肉嘅羊味都幾濃，不過就唔羶。

今晚來了這間火爐店來個海鮮邊爐盛會，估唔到深水埗區都有食材高質素的火鍋店。話明係海鮮盛會一黎就叫咗個龍蝦刺身，仲兩食埋。龍蝦刺身夠晒爽口，真係活龍蝦刺身，因為我地就坐喺魚缸同刺身師傅旁邊睇住佢整，$880黎講都算大隻。之後個龍蝦頭同埋D腳嗰D就椒鹽，都幾惹味。大隻蟶子都好好食，勝在夠新鮮，一人一隻，每隻都連少少粉絲。我打邊爐好鍾意叫脆肉鯇魚片，貪佢有好爽嘅口感。即叫即炸紫菜響鈴，黎到時仲熱辣辣，就咁食或者放落湯滾佢一滾都一樣好味道。牛肉都幾靚，唔算好肥。牛白肉反而好好食，雖然有D人話係脂肪，不過又無食過D脂肪咁爽口。呢個三拼都好食，有水餃雲吞同韭菜餃，三款都係自己包，夠晒足料，而且D料都新鮮。最後想講呢間野衣家有個好誇張嘅啤酒Promotion，$100可以飲100支德國啤酒，兩個月內有效，$1一支，打邊爐飲野唔洗就住就住了。

自從開咗個100蚊100支德國啤的Plan之後今次已經係第4次來打邊爐，飲埋今次都仲有43支未飲，呢個$100 100支啤酒都真係好勁，9款啤酒之中我最鍾意西柚啤，是相中左邊嗰3支橙色的，易入口而且酒精度又低，啱晒女仔飲。湯底叫了番茄牛尾湯，佢個番茄湯底好正，D牛尾亦好入味。侍應仲推介我地試吓個加拿大象拔蚌，味道又真係幾好，侍應話加拿大象拔蚌嘅級數比加州的象拔蚌更高，口感更爽更鮮味，咁我地食落感覺上都真係幾正，最緊要新鮮兼爽口。脆鯇片好爽口，淥一陣就食得。碟安格斯牛小排D脂肪紋好靚，牛肉味都好出。牛柏葉都OK，無雪捉藏味，幾爽口。鮮蝦雲吞都好食，佢地自己包嘅，感覺上D餡料好新鮮。另外叫咗兩份菜。

今晚嚟呢間火鍋店打邊爐皆因有個friend之前嚟咗開咗個100蚊100支嘅啤酒Plan所以就叫我哋嚟幫手，我哋梗係義不容辭啦，不過今晚我哋都只係飲咗十幾支，仲有七十幾支，好彩仲有個幾月時間可以再嚟幫襯繼續努力飲。全部都係德國啤酒，味道唔錯，我就鍾意右手邊深啡色嗰隻麥啤，我啲friend就話左手邊白色嗰隻都唔錯。啤酒慳咗唔少錢所以今晚火鍋都幾豪，一開始已經叫咗個龍蝦刺身， $880都幾大隻，睇住佢喺魚缸攞出嚟好新鮮。另外又叫咗鮑魚，$68一隻，都係喺魚缸新鮮攞出嚟。海鮮方面我哋仲叫咗個白鱔片同廣島蠔，佢整體啲料都幾新鮮。叫咗個牛伯肉口感唔錯，淥一陣就食得，好爽口。呢度嘅西班牙黑毛豬柳粒又估唔到都幾好食，有機會真係要試吓。脆炸午餐肉可以當火鍋料又可以當小食，其實就係將午餐肉切條再炸，勝在即叫即炸而且又唔係好多油。呢間嘢嘅自家製手打墨魚丸都幾好食，識到墨魚味而且彈牙。羊肉片都幾新鮮。

呢間喺深水場的火鍋店嘅啤酒真係好好好好抵飲，$100有100支即係$1支，D啤酒唔差架，德國啤酒，我地3個人好努力先飲到7支，下次再黎飲，因為呢100支啤酒可以2個月內慢慢飲，我最鐘意左邊起第二三支啡色招紙嗰支。湯底叫了番茄牛尾湯，個番茄味幾濃，D牛尾又林又入味。每人一隻鮑魚，$68都幾大隻兼幾新鮮。即炸紫菜響鈴幾好食，始終係即叫即炸，所以熱辣辣，就咁食好正，落湯淥一淥食都OK。佢有農場雞子同新鮮雞子兩款，我地兩款叫晒睇吓有乜野分別，左邊係農場雞子右邊係新鮮雞子，農場雞子就係我地平時食開嗰D。味道同口感其實差唔多，係大粒同細粒的分別。碟牛好靚，叫了安格斯牛。脆鯇片都幾新鮮，打邊爐至愛之一。萵苣打邊爐都唔錯woo。