11
11
3
港鐵黃埔站 A 出口, 步行約13分鐘 繼續閱讀
電話號碼
2730 7111
付款方式
Visa Master 現金
食評 (28)
等級4 2016-12-30
1307 瀏覽
仲有成個鐘先開飯,餓死我喇!一路行入貴賓房,場面冷冷清清的,只有疏落兩三檯食客啊。大廳阿哥阿姐獻唱高潮迭起澎湃,無記錯係我阿爸阿媽後生嗰陣最流行既金曲。瑤柱雙寶蔬,我估係小棠菜,但另一種就諗唔到。鑽石百花球,咩鑽石呢?杏片?鮑汁金錢扣鵝掌,金錢?元寶?唔會係原粒鮑魚掛,無可能金錢肚啦。當紅脆燒雞,唔係炸轉左燒?蟹籽蝦仁炒飯,我寧願揚州炒飯喇。百年鴻運,蓮子百合紅豆沙?好快迷底就可以全部解開!掛住食,好多都唔記得影相啊。鴻運宴每席送 6 罐汽水、6 罐啤酒,但我淨係想飲茶乍,飲到成肚氣會食少好多架麻。開壺鐵觀音自己慢慢嘆,呷一呷,好野黎喎,非常甘香可口。大紅乳豬全體,半肥瘦乳豬都有幾啖瘦肉食下。厚厚肥膏下面黏著清淡瘦肉,滑而不咸不肥膩,滿意滿意,最衰非常凍冰冰囉。燒豬腳仔搶住食,皮香肉嫩全瘦肉,味濃帶燋香,非常有咬口,大愛。西蘭花帶子,厚厚半熟帶子外彈滑、內嚥韌,泛著輕輕鹽味咸香,合格。無敵爽脆甜西蘭花,處理得宜,好好味。沾上蝦醬、沾上豆瓣醬都同樣出色,比帶子好食得多。作點綴的彩椒絲爽甜可口,一絲不苟。演繹得過份靜態,鑊氣微弱呢。瑤柱雙寶蔬,估中左係小棠菜,但估唔到係草菇。冷冰冰的草菇跟小棠菜,淋上微暖杰撻撻芡汁,厚撻撻又一舊舊,質感黏糊糊,感覺不良好。蠔油味濃厚瑤柱汁配水味小棠菜及澀味罐頭草菇,低於水平,免強入口。鑽石百花球,我仲估係杏片添,錯晒。到底咩係鑽石呢?外脆鬆化,內彈味鮮,蝦球味道超凡出眾,滿分!每人分到兩粒,但個個話怕熱氣,我捱義氣幫大家哽左去啦!多謝晒喎,連食半打大滿足,爽呀。紅燒竹笙雞絲翅,魚翅帶腥,竹笙爽但鞋口,雞絲無味腍劈劈,高湯味道甜美,不過不失。再次強調如何食翅及醋的作用,醋是翅後呷呷,清清口腔及味蕾的。並不是像碗仔翅一樣,撈醋食呢。當然各有所好,只供參考,最緊要自己喜歡。鮑汁金錢扣鵝掌,原來金錢係冬菇,仲妙想天開係似元寶既鮑魚添。厚肉冬菇有質素,美味非常,彈滑多汁,爽嫩清甜生菜捲著鮑汁同樣好食。反而鴨掌鞋烚烚,乾如柴皮如紙皮。清蒸大花斑,熱騰騰冒著煙游到,堅係香噴噴,口水如洪水般狂奔!個個您推我讓,我唔客氣喇!即刻奪取面珠登,厚肉勁滑勁彈,好美味!黎舊魚腩滑不留手又黏又膠,黎舊背肉啖啖 juicy 結實頂呱呱。當紅脆燒雞,又會用上燒雞既?炸雞大路好多。脆皮不油不膩亦不咸,肉質實淨微滑,雖然無味道,但跟惹味脆雞皮同吃都好正。幸福伊麵,剛剛炒起閃閃發光!雖然幾乎無料,只有雜菇幾條,不過伊麵炒得超卓,炒功深厚,鑊氣迫人!大大力、大大注啜入口,滾熱辣又香噴噴!味道出眾,生抽老抽比例恰到好處,濃郁可口,醬汁濕潤而溫柔地包著每條伊麵,彈牙不失滑溜,難得一遇的高質,果然好幸福啊!通常飲宴最後的粥粉麵都極難入口,可能趕收工、可能一早煮定、可能經過翻熱囉。蟹籽蝦仁炒飯,中西合璧怪怪的,畫蛇添足了。熱辣辣炒飯撒上凍冰冰蟹籽,故意做冰火較果嗎?幸好都唔難食,味道可接受,少左肉香囉,黎個鑊氣揚州炒飯會更開心。最後黎個美點雙輝,蓮蓉壽桃包、蓮子百合紅豆沙,我唔食甜的,多謝。 繼續閱讀
(以上食評乃用戶個人意見 , 並不代表OpenRice之觀點。)
等級4 2017-01-16
715 瀏覽
公司冬至能馳,十二位同事浩浩蕩蕩衝去飲茶!張檯細左少少喎,坐到要縮埋一舊膊頭黏膊頭,我地個個標準身形無肥佬肥婆架喎。鮮蝦燒賣,熱辣辣即叫即蒸飈晒煙上檯,氣氛一流!吹兩下啪入口,結實不散不肥蝦爽肉香,高質好味。糯米雞,不過不失,餡料平庸,雞翼、肉鬆,一般。黑椒金錢肚,得四條金錢肚,手快有、手慢無,哈哈。腍中帶點爽,杰杰的黑椒芡,唔難食。棉花雞,熱燙燙香甜爽彈多汁既白滑魚肚愛,不肥不油益,冬菇、雞柳皆可口。烚菜芯,淋上淡豉油微暖入口,爽嫩無渣,但菜甜味微弱得可憐。煎藕餅,唔講唔知係藕餅呢,蓮藕跟肉餅刴成一齊,咸味重,我還以為食緊煎咸魚肉餅添,嚥韌香口。口水雞,油味強而香辣微弱,沒有雞味,皮厚肥膏處處,入得口唔難食。醉雞翼,有趣酒留有醉雞翼食好少可,皮脆肉鞋酒氣香甜,可以啦。豉椒鳳爪,濃濃豉汁芡略油,甜得霸道,皮爽筋脆,大路貨無驚喜。鮑汁鳳爪,損腳趾我鍾意!膠膠黏黏黏,漿住您的嘴更是歡喜,鮑汁滲入雞腳之中甜美不咸不嗆有質素。金蒜排骨,非常蒜香味,辛中帶甜附在棉棉多汁不肥排骨上,啖啖肉夾惹味,滿意。煎蘿蔔糕,麻麻地,白膠一舊有幾點叉燒作點綴,永遠係街食既蘿蔔糕無可能滿意,因為阿媽出品多料多蘿蔔,那裡有得比。豬腳薑,食過自家極品反唔到轉頭,依個只能形容為甜酸浸豬腳薑,味道留於表面,裡面無味的,整體不過不失啦。素粉果,晶瑩剔透的餃皮,眼睇都覺油得可怕,滑潺潺整隻瀡入口,非常素而淡的味道,都辨認到菌味跟菜味,不太喜歡這味道,我雖要辣椒醬呢!酸齋,放低轉眼已消失殆盡,最搶手!酸酸甜甜嚥嚥韌韌,開胃醒神,令人懷念的味道。素鴨,恰像腐皮卷,外脆卷著麵筋,炸得稍油膩,油光令令,如果沾上大量咕嚕汁應不錯。魚蓉釀尖椒,尖椒爽甜中帶辛辣,溫柔中散發微量刺激,魚蓉煎得乾身香口,淋上豉油都幾好。炸雲吞,雲吞皮脆卜卜、雲吞餡泛著咸香及蝦味,雖凍食但淋上咕嚕汁尚算可口。雞絲春卷,蒜味濃但完全食唔到肉,沾上喼汁酸甜香脆過過口癮都還可以。上湯鮮竹卷,近年很多食肆棄蠔汁轉上湯,我非常喜歡!健康不油不咸不濃,泛著香甜清爽味道。大量湯汁彷如灌湯一樣注滿鮮竹卷,一咬連同肉汁一齊爆開,好味到抖震呢!蜜汁叉燒腸粉,食過翠園爆叉燒腸粉及陳漢記滑不留口腸粉後,其他都不能讓我動容有驚喜了,平凡茶樓叉腸,中規中矩,皮不過厚、餡不過少、叉燒不過咸。奶皇包、馬拉糕、雞包仔、煎堆,都不是我杯茶,試一口,合格。 繼續閱讀
(以上食評乃用戶個人意見 , 並不代表OpenRice之觀點。)
等級2 2016-09-21
1550 瀏覽
買團購四人餐,每人埋單都係約$120(上個月唔多記得),但每道餸都好食喎!間店幾乎完全冇人,我們晚上去的,好像全部也是訂團購的人,哈哈...海鮮都幾新鮮和足料~雖然位置較唔方便,但如果再出團購會考慮再去! 繼續閱讀
(以上食評乃用戶個人意見 , 並不代表OpenRice之觀點。)
等級4 2016-06-14
2335 瀏覽
自從囍滿庭結業後都甚少過黎漁人碼頭食 lunch 喇,不過今日同事們興致勃勃要過黎飲茶,無所謂啦。依家囍滿庭個位置變左做海逸皇宮大酒樓,而且門口劃左小部份位置賣衫喎,勁可愛。商場依舊冷冷清清,海逸皇宮比以前囍滿庭靜,午市都只得幾檯食客,生意難做,慘不忍睹。拍青瓜,爽脆充滿水份,微酸開胃前菜又健康。白灼菜芯,大大碌都鮮嫩多汁又無渣,散發少許天然菜甜味,難得。配上淡豉油,清爽甜美輕輕豉油咸香。炸雲吞,雖然已炸左段時間完全唔熱,但仍保持香脆不油膩,淋上大量甜酸汁依舊使人停不了口。脆皮燒腩仔,略肥皮微脆,層次不太分明,瘦肉位不泛肉汁夠軟棉,只係最低一層偏咸。沾上芥末同吃,希望減低咸度及肥膩感,失望地幫助不大。牛肉腸粉,碎牛肉餡少,雖然滑嘟嘟但不太食到。腸粉皮又厚又粉,欠缺滑溜溜、半透明、白裡透紅、若隱若現質地,向大埔陳漢記腸粉佬學野啦。鮮蝦腸粉,腸粉皮跟牛肉腸粉同一情況,失敗。大蝦球爽爽,鹽味重且鮮味欠棒,還可以啦。薑蔥牛柏葉,熱辣辣又爽口,並無蒸過火而使到硬硬鞋鞋。吸收薑蔥汁完全透徹,多汁味美,一定要趁熱食,凍左芡汁凝結到一舊舊,而且油膩感會倍增。咖哩魷魚,要食得非常小心,滑潺潺水魷不好夾實,高空跳落咖哩汁就一身都係。就算夾得起水魷鬚,但依然好生猛跳過不停,騰騰震彈到滿檯咖哩汁了。外層沾滿香辣咖哩汁,滑滑爽爽,不過不失。醬皇金錢肚,極厚身醬汁沾滿金錢肚,軟腍中帶點爽口,醃味非常香濃,滿意。原粒蝦燒賣,肥豬肉過多,雖香但又油又鬆散,味道幾好。水晶蝦餃,原隻蝦仁爽彈味甜,餃皮略厚而黏,質地麻麻。時蔬牛肉球,外彈內滑,微弱淡淡牛味,沐浴在喼汁之中,整粒掉進口中,酸咪咪夠醒神可口。豉汁蒸排骨,半肥半瘦,係半碟好肥,而半碟瘦肉,油淋淋照食,麻麻地。豉汁蒸鳳爪,大路豉汁重甜味散發著混濁豆豉味,一般。豉椒炒雞球,雞球又鞋又無味,只黏著薄薄豉椒芡汁,試一次便夠。黃豆咸菜苦瓜湯,賣相不討好,味淡如水不甘不甜又唔熱,兩啖放棄。暖暖的馬拉糕,微甜清香,質感軟塾。叉燒包乾硬餡少不香甜,麻麻。 繼續閱讀
(以上食評乃用戶個人意見 , 並不代表OpenRice之觀點。)
行經突然走左入去,開頭真係有D驚,個場好大,但得4-5台客.不過,冇所謂啦,我不入地獄誰入地獄呀!叫左:金銀菜豬展煲豬肺湯,菠蘿咕嚕肉,金銀蒜茄子蒸鮮魷金銀菜豬展煲豬肺湯:一打開個煲就飄出好重金銀菜味,好香!個湯煲得好夠味好濃,足有成10碗,兩個人飲真係飲湯都飽.可惜小小,湯渣見唔到豬肺,不過真係好好味.菠蘿咕嚕肉:真係估唔到,HK$28有噉嘅質素同份量,菠蘿香甜夠味,酸酸甜甜好開胃,咕嚕肉唔會似出面得個炸粉,好有肉地又夠多,真係超級正.金銀蒜茄子蒸鮮魷:份量又係唔細,茄子好淋又夠入味,金銀蒜好香夠野味,用來送飯真係一流.鮮魷爽滑份量又足,十分好味.食完真係好飽,坐下飲杯茶,欣賞一下可以比美IFC嘅夜景,十分舒適.侍應走近貼心地查問:食飽未,先生可以上糖水嗎?雖然好飽,真係都要作戰到底,來吧!紅豆沙,味道都OK,如果,果皮味再重D就真係太好啦!飯後報告:物超所值,一定會再來. 繼續閱讀
(以上食評乃用戶個人意見 , 並不代表OpenRice之觀點。)