海灣冰室 (已結業)

今日lunch 心血來潮想食花生醬西多士。我：唔該花生醬西多士，凍檸茶少冰。服務員：好丫。小姐你要咩話？我：花生醬西多士，凍檸茶少冰。服務員：好既。1650PM完成落單______________________________服務員：小姐可以搬去第二個位坐？（同我講）我：無問題。。1655PM______________________________我：想問下係咪已經幫我落咗單？因為我見轉左位又未有落左單既飛仔。服務員：已經幫你落左了。我：ok,不過唔可以拎杯凍檸茶俾我，我有啲口渴。服務員：好迅速俾咗杯凍檸茶多冰。1709PM______________________________服務員：食物已有啦（拎咗花生醬搽麵包）我：我叫咗花生醬西多士woo服務員：花生醬西多士已經冇貨我：我等咗半個鐘有多，你而家先同我講冇？服務員：花生醬西多士已經冇貨，你要轉其他嘢食！再唔係要去出面食其他嘢！1730PM______________________________⚠️服務態度超差，唔推薦大家去❗️

早餐竟然沒有沙嗲牛肉，荷包蛋變太陽蛋，可以選擇的已經唔多，仲要多樣食材缺供應，好難想像。而且伙記招呼水平以下，可能新開張準備不足，但仍然非常失望，因為收費並不便宜，早餐由$50起步。

以往嚟海灣冰室，通常係食午餐及下午茶，估唔到都有酒樓嘅菜式， 多謝朋友推介，蒸魚，檸檬魚，烤雞，仲有蛋糕🥰真係非一般冰室幾款餸都滿意，最欣賞烤雞外脆內軟，同埋蛋糕雖然我都識整，但咁強勁嘅文華酒店真傳蛋糕，我當然唔蝕底買返屋企試吓，果然好好味非一般味道👍👍👍😋旁邊仲係海邊好好feel，食飽可以去散步

員工服務態度非常之惡劣，剛坐低就問洗唔洗落埋單，聽order時好似趕時間 ，未聽清楚客人要求，諗住提一提佢，佢擰轉頭啤住我，覺得好麻煩，送餐時好大力放。非常失望 ，不會再光顧🤬🤬

星期六日黎過依度幾次🚴🏼🚴🏼窗外有busking 同埋可以望海 好chill!! 😎😎😎好鍾意依度好嘢食款式選擇好多😙😙牛柳粒大推😋✨每次嚟都一定飲佢嘅例湯～難得飲到冇味精嘅湯👍🏻尤其嘅炸雞更加嘅出色，皮酥脆肉滑嫩，值得一試！

係海旁踩完單車 一入嚟就覺得依度環境好舒服😇😍老闆娘好熱情係咁同我哋介紹有咩菜式👍🏻👍🏻嗌咗咕嚕肉、魚腩煲、炸子雞同埋豆苗 都色香味俱全🥳🥳仲有位冇味精嘅中湯😌😙店鋪講明話冇味精 想大家食得健康啲🫶🏻依度嘅地理位置亦都好好🙌🏻荃灣西地鐵站一出就到 望住個海🌊🌊有次黎到仲有busking 都唱得幾好聽 有feel呀🎼🎤🎹價錢合理 間中會有唔同優惠 同朋友都話會再嚟🤩😆😙😙

我住e 間野附近既，想分享返近排對e 間茶餐廳既兩次經歷。有一晚我荃灣西落車去到間冰室買兩個小菜套餐返屋企食，見佢個套餐寫送例湯或熱飲咁，我就話兩個套餐兩杯熱檸茶，個埋單時見到無lala 收多左我廿蚊，個收銀同我講話套餐跟例湯，熱飲另計...另一次就係今日叫外賣，我同佢講左食D 咩野，都見佢篤左機，佢問我比咩野啦，我都未答佢，佢又走左去同其他人落單收錢，佢攪好晒d 野就再返黎照顧我，咁我就問佢張單射左入廚房未，我趕時間，咁佢就話射左入去，咁我叫佢比單張我睇先比錢，佢先按個掣，之後印張單既時間只係剛剛...我嬲到無比錢就走。有e 個收銀應該會越來越少回頭客

朋友推薦海灣冰室，大讚好食又抵食。今日就同佢試下有幾正先。首先位置好方便，荃灣西C1出口隔鄰就係，步行唔駛1分鐘，極之就腳。餐廳望到海景，景觀一流。朋友勁鐘意食酸菜魚，於是叫左個來試。嘩，原來係脆肉鯇，我最like, 入口彈牙爽口，配菜除左有芽菜，酸菜，豆卜外，還有大大塊的雲耳，份量十足。我鍾意佢湯底唔會太辣太酸，味道恰到好處，我地食到停唔到口，朋友連湯都飲埋，真係必食之選。作為蛋控，我好鐘意食蒸水蛋，依個蒸水蛋配料有肉碎同埋瑤柱絲加蔥花，蒸蛋香滑可口，差唔多成碟比我清晒。除了酸菜魚，朋友亦好鐘意食生炒骨，佢話夠鑊氣，皮脆肉香外，配菜亦好新鮮：有菠蘿，青椒，沙律菜，又係全碟清晒。另外叫左芙蓉蛋飯，除左有火腿絲，芽菜仔外，驚喜係芙蓉蛋裡面見到開邊蝦球，要將蝦腸取出來係好花功夫的，反映出廚師對食材預備的認真，值得一讚。甜品叫左一口朱古力西多士，厚厚的西多士咬落好鬆軟，外層係朱古力醬，內層係花生粒醬，絕對係味覺雙重享受，不愧為邪惡之選。朋友果然無介紹錯，不單經濟實惠，仲要好味選擇多，真係值得大大力推薦。

Boxing Day姐姐🧍‍♀️放假🏖，要落街買外賣🥡，老婆揀海灣冰室芝士忌廉汁龍脷柳焗飯配熱檸水，我揀福建炒飯配熱鴛鴦，外賣🥡自取8折，coupon減多$8,等15分鐘，都準時。Pack得都好企理，門口可望海景。福建炒飯好多料好多汁，不過不失。芝士忌廉汁龍脷柳焗飯都ok，個人唔鐘意酸，所以焗飯白汁ok。熱鴛鴦有d苦，加咗3包糖。總括嚟講，一般茶餐廳🍴質素，冇咗蛋餅🥞失色不少。

第一次幫襯晚餐，坐咗三張枱左右唔駛等位，好多吉枱。叫咗椒鹽魷魚同乾炒牛河，因為老闆娘話炒嘢出色，炸嘢亦都好味。食到一半先記得影相，乾炒牛河夠乾身，有鑊氣好好味，椒鹽魷魚個炸皮做得好脆，裏面林林地唔un, 整體嚟講都好味。價錢比一般茶餐廳貴少少，因為佢有海景。

呢間餐廳飲水要自己斟，斟完又要俾阿姐話今日食完早餐諗住斟杯凍水飲，侍應阿姐走埋嚟話：啲凍水我哋員工飲，你唔可以斟，下次唔好啦。（佢哋熱水及凍水放埋一齊）意思係熱水先可以畀客人斟我回應返佢：你擺得出嚟枱面客人就會斟佢再講：啲單車友斟晒啲水，凍水我哋飲，唔係畀你飲。我回應返佢：我點睇都唔似踩單車啦！阿姐再講：下次唔好喇我：下次唔幫襯喇👎其實啲野食都正常，但噉嘅態度真係好趕客態度十分差對單車友唔尊重第一次自己斟水都要俾人話衰過快餐店

我用八達通付款，明明已經收咗我一次$39 ，我張八達通顯示已付費。但係餐廳聲稱自己部機收唔到，係都要收多我一次$39。叫佢個夥計搵老細出嚟，佢就聲稱自己係老細。一個著到不知所謂嘅師奶，竟然話自己係老細。所以呢間店舖，完全係一間某人寺。好彩我今次只係食咗$39 ，俾多次錢都係$39。如果一家大細入去食，咪無端端比多幾百蚊。原本貪佢就腳，所以食呢間餐廳。但真係貪字得個貧，錢比2X之餘，野食又難食，還要搞到一肚氣。千叮萬囑大家，真係唔好一家大細入去，會無端端變咗食高級餐廳嘅價錢。

今日黎到呢間位於海之戀商場既海灣冰室，其實之前都有行經過呢間冰室但就一直都沒有入去試，今日都終於去試一試先。大約12點左右見入面冇咩人，咁就選左個卡位坐，準備想點餐時侍應就叫我等一等，一等就10分鐘，眼見得佢一個人做野，執枱、送餐、落單都係得佢一個人做，有一個收銀就坐左係度，其實係冇客人埋單時幫手落下單都好簡單的事。咁我點左個馬來亞咖哩牛腩飯加凍好立克，上菜都算好快，咖哩牛腩賣相都幾好，咖哩汁夠杰同多，可惜汁多得滯而且唔夠香也太咸牛腩得四粒少得可憐，唯薯仔係有炸過都叫有返少少心，凍好立克我覺得就幾好，不過短時間都不會再去了。

專登入去諗住食蛋餅，門外menu仲見到有套餐，但入座後才知悉師傅已另起爐灶，係有啲失望🥲三個人叫咗三個餐，食物普普通通，未必會再幫襯了。失望而回，希望店家會抽起返門口menu啦😅

✨呢間係黎自台灣高雄既蛋餅專門店「蛋餅王」🤩佢哋聯乘海灣冰室開咗喺荃灣西🤤 而且佢哋亦有用到台灣直送食材❤️‍🔥太掛住台灣嘅味道 所以都專程去試吓🥹✨今次揀咗三款蛋餅 佢哋蛋餅皮都好Q彈有口感 而且厚薄適中👍🏻仲要每款都大大份 賣相都好吸引🤭✨巧克力香蕉🍫x🍌呢個組合一定冇得輸 滿滿既朱古力醬 啱晒做飯後甜品🥳甜味嘅蛋餅仲有芋泥肉鬆口味💜芋泥口感綿密 甜度啱啱好🤤配埋滿滿嘅肉鬆一樣咁夾🫶🏻起司肉鬆玉米蛋餅都好有驚喜👍🏻非常足料 芝士控必叫‼️芝士味好濃郁 仲做到拉絲效果🤩而且入邊有勁多粟米同肉鬆 面頭仲有淋上咗台灣直送嘅醬汁 真係啖啖滿足🤭❤️‍🔥✨ 冰室位置就喺荃灣海之戀入邊❤️‍🔥西鐵站𝙲𝟷 出口一出就係 好方便👍🏻而且餐廳座位都好多 環境乾淨舒適 今次去坐喺窗邊位 邊食蛋餅邊望住海邊 特別𝚌𝚑𝚒𝚕𝚕(●’◡’●)ﾉ推薦大家去𝚝𝚛𝚢𝚝𝚛𝚢♡︎🍴幸福の特濃巧克力香蕉蛋餅 $54🍴爆漿起司肉鬆玉米蛋餅 $54🍴古早味芋泥肉鬆蛋餅 $48