朋友生日，原本係去一間食海鮮嘅餐廳，但因為店內有隻大米奇，當咗自己係貓咁响店內行嚟行去，所以轉地方，嚟咗呢間《泰象泰國越南餐廳》。一直我對食泰國菜嘅感覺都好一般，唔係話太啱我嘅胃口，但係食過《泰象泰國越南餐廳》嘅泰國菜，一改以往對泰菜唔好嘅印象。我哋4個人，點咗泰式串燒、泰式炒西蘭花、咖哩炒海鮮、咖哩炒蟹、冬陰功湯同生蝦刺身6樣嘢，我最鍾意係泰式炒西蘭花、咖哩炒海鮮同冬陰功湯，我鍾意佢個湯清得嚟又有冬陰功酸酸甜甜嘅味道。《泰式串燒(豬、雞)》，難得串燒嘅豬係唔硬，而且肉質就鮮嫩，冇雪藏嘅臭味。《泰式炒西蘭花》，佢泰式嘅醬汁同西蘭花好夾，西蘭花炒得好夾脆而且唔會太硬。《咖哩炒海鮮》，炒得好有鑊氣，加上鐵板上，令到每件海鮮嘅咖哩香氣迫人。《咖哩炒蟹》，好大隻蟹，啖啖肉，咖哩味好香濃，但咁樣炒蟹就有少少浪費咗隻蟹。《冬陰功湯(中)》，頭先提及過佢個湯好清澈，好多料，加上酸酸甜甜嘅味道，令人胃口大開。《生蝦刺身》，正常嘅生蝦刺身味道，冇話特別驚喜。今次係少有食泰菜完全冇叫到炸嘢，可能因為咁令我對泰菜改觀，除咗炸嘢，泰國仲有好多唔同嘅美食。…查看更多
