影片
營業時間
今日營業
07:00 - 22:00
星期一至日
07:00 - 22:00
以上資料只供參考, 請與餐廳確認詳情
眨眼間有2幾個月冇嚟過（星點心）唔太肚餓落嚟食個下午茶，食物依舊不變分量正常，我每次都必叫嘅米網蝦腸，脆皮米網腸曾經喺早幾年好多酒樓都有做,熱潮過後就少咗地方有做，整體食物，在長沙灣道計大南基隆白楊街呢邊，距離地鐵站遠dd但我覺得佢好食嘅，牛柏葉有好耐冇見過嘅玻璃兜，而家酒樓都好少見，牛肉有撻過有入味口感頗好，蝦餃冇乜肥透明粒，同區有間好出名嘅點心樣樣裏面都超過一半肥粒，所以呢間這無肥粒我好滿意，而味道係比平時嘅酒樓點心淡少少同無咁油肥，，感覺健康啲，6蚊一位茶，冇加一服務費
繼續閱讀
成日行開界限街呢邊試過附近幾間酒樓都發覺無邊間特別好食，所以每次都係嚟星點心飲早茶，附近泊位唔多，揸車過嚟都好難搵位，難得咁啱今日過呢邊又有泊車位，連平時要等位嘅星點心今日都唔駛等，咁就一定要再幫襯啦。大大話話幫襯過十幾廿次，平時要等位無嘢做一定次次喺門口認簽名，都好多明星留過名，今日有位直入就唔駛咁無聊喇。每次同朋友嚟一定會一人一碟虎皮尖椒，星點心嘅虎皮尖椒係我食過全港最好味咁濟，今日影呢張相個樣無咁靚，但食落味道依舊，煎到好香，又唔會太辣。以前有黑松露百花魚肚又係我必食，但近幾個月都轉埋餐牌無得再食，希望遲啲會有返，咁就唯有食棉花雞頂住先，味道都好好，但始終百花魚肚有舊蝦膠食落質感好過食雞。而腸粉雖然唔係皮薄但餡靚同埋好足料，一夾起實會跌到啲叉燒出嚟。其實so far星點心樣樣點心都好味道，一食就知唔係啲大陸製嘅預製點心，店心專門店嚟講算係高質，但奈何間舖太細，又多公公婆婆坐喺度打躉，好多人都唔想排就走咗，九龍城間分店好少少嘅，但希望長遠再開多幾間分店，等好多人幫襯吓啦。
繼續閱讀
深水埗臥虎藏龍美食處處，問題係你識唔識得去搵，有間食點心喺界限街同基隆街交界，唔係大街大行唔係旺區，則邊布行整車造膠片，門口細細行過咗都唔知原來裏面係食點心。見到門口咁多簽名，先好奇望一望發掘左一間食店。一入到去鋪仔細細，有啲似添乜運格局，茶錢唔係貴，品質仲好過啲屋邨酒樓。試菜食基本野，蝦餃燒賣牛肉球少不了。因為腸胃有限，叫得唔太多。蝦餃爽口彈牙皮薄仲有少許筍，唔鹹唔淡味道適中，食完都無口渴嘅感覺，如果多番少少汁就完美，老實講，淨係呢個蝦餃已經贏過大部份大酒樓。蝦肉燒賣就食到豬肉切粒而唔係絞碎豬肉，除咗頭先所講嘅鮮蝦味，呢個豬肉味非常出，肥瘦比例啱啱好。不過乾蒸燒賣就非常失望，好大梳打粉味，食落有乸口嘅感覺，而且無牛肉味，好彩係叫鴛鴦，都係輸咗兩粒燒賣啫。至於個黑松露百花魚肚，都係啲gimmick野，當然係食唔到黑松露味，幾廿蚊食兩塊野，性價比就差咗啲。另外值得推介就係脆皮蝦腸粉，簡單來講就係鮮蝦腐皮卷外邊包個腸粉皮，估唔到有幾好食。我喺第度食嗰啲變種，就係用炸兩包住個蝦餃，口感同呢一個爭好遠，始終用腐皮簿啲好食啲。至於個煎釀茄子係用蝦膠做，不過蝦餃無調味，唔係好夠味。食食吓聽到啲人話啲蘿蔔糕好正，就叫一碟嚟試吓。食落就唔係好啱我口味，因為我鍾意食嗰啲蘿蔔糕係用蘿蔔絲而唔係蘿蔔條做，同埋有落胡椒粉，另外啲材料係要用豉油爆香，以上三點佢都無，所以搵到啱我食嘅蘿蔔糕都好困難，不過客觀講一句，佢好食過外邊啲大集團做嗰啲蘿蔔糕。最後買單180左右，喺深水埗來講未算便宜，不過以質素來講，呢個價錢係值。
繼續閱讀
☕飲茶唔一定朝早嘅😆之前同friend食過呢度點心好味😋尤其喺灌湯餃🥟😍所以收工同老公嚟呢度飲茶呢度瑤柱灌湯餃🥟皮薄又足料食過呢度係返唔到轉頭仲有我最愛嘅干蒸牛肉燒賣😋唔係間間酒樓有得食另外滋補藥膳鳳爪，鳳爪好淋，藥材湯味濃😋我全部飲哂其它點心有：蝦餃皇🦐燒賣皇🥟黑松露鳳眼餃，脆皮蝦腸粉都唔錯😋所有蝦都爽口仲有個香脆蝦春卷，新鲜炸起熱辣辣好香口平時唔食青椒虎皮椒嘅老公😊呢度香煎虎皮椒佢竟然都會食總括都會再來幫襯👍樓面姐姐都親切友善
繼續閱讀
以前飲茶都係一家大細齊齊去不過因為疫情關係都好耐無去飲茶今日止下癮連食評都無睇就叫左呢幾樣野問心。。都真係好一般咸水角黎到都淋哂其實細心小小係外賣盒到整返個窿比佢透透氣會好好多燒賣-正路唔肥唔瘦岩岩好鳳找-夠味山竹牛肉都係正路4樣的份量都偏細唔難食正正路路
繼續閱讀