忠輝潮州鹵水燒臘店

營業中

休息中

今日突然好想食燒味飯所以就專登過去元朗忠輝忠輝佢有幾間分店今次就嚟近大榮華呢邊嗰間買呢間嘅燒味飯不嬲出名係份量大又平所以每次我想食燒味飯嗰陣都會揀佢今日揀咗叉燒燒肉飯 少飯叉燒雖然睇落好似好瘦但係一啲都唔硬同鞋口另外燒肉個皮好脆不過我覺得有少少鹹啲飯撈埋叉燒嘅汁，真係好好味😋😋😋呢個價價錢食到咁嘅質素真係叫好抵燒味又多價錢又唔貴食晒啲飯啲燒味都仲有真係幫我專登入嚟元朗買👍🏻👍🏻👍🏻👍🏻

好食唔好食，真係睇彩數，今次之後，我以後都唔會再喺度買淨叉燒因為真係好垃圾，睇住佢切，勁多頭尾，又切是斷。之前食兩餸飯真係ok，但係淨餸反而唔掂！去返大橋街市嗰面買好過。

早幾日突然想食叉燒，之前喺呢間買過一次雙併飯覺得都ok，就叫左男友返黎之前順便幫我買盒叉燒油雞飯～雙拼飯$30，肉類會舖到滿滿唔太見到啲飯，幾抵食，賣相其實不錯不過今次既叉燒比較乾，乾得黎又完全無焦香味～而啲豉油雞得皮同骨，勁少肉。。。。本身燒味已經鹹，仲要落左勁多豉油同一大pat薑蔥，食完呢個飯我覺得自己腎都虧埋🤦🤦 (其實上次都係偏鹹，但今次依然唔記得叫佢少豉油少薑蔥🤦🤦)只能說如果下次再有機會食既話，就要睇下好唔好彩當日啲燒味水準如何，兼記得記得叫少豉油少薑蔥🙈🙈

今日6點時路過見到咁多人排隊就排埋一份， 見左份上裝燒鵝同一盒叉燒燒肉飯，加埋都係140，重有例湯送。 個燒鵝燒到色澤好靚， 油份岩岩好， 回到家一打開盒，香氣撲鼻，食落肉又嫰，唔會痴牙， 味道濃郁， 而且唔會成舊肥膏係口， 絕對係好高質素既燒鵝。而叉燒燒肉飯份量十足， 叉燒口感以致味道都係上上級，令人食完想再食。燒肉雖然口感都一流， 肥瘦比例都好， 而且層次分明，但我個人來講， 覺得有少少過咸， 可能配埋啤酒食會好d 。

因為相熟中醫在元朗，所以基本一至兩個星期我就會到元朗一次，果度附近有間叫忠輝燒臘店，每次上去睇中醫我都會特登去買返盒燒味飯作晚餐，真心好正㗎！朋友同我講原來我早響五六年前同佢已經結緣響天水圍！嗰陣時我響天水圍一間中學工作，lunch成日去天耀商場隔離嘅街市買燒味飯，嗰陣時已經超愛呢間燒味舖！估唔到原來嗰間就係忠輝！！！😱😱😱以為走咗之後冇乜機會食，原來佢搬咗嚟元朗，仲發光發亮！我知道佢仲生意好到開咗間分店響又新街！果然好嘢係多人欣賞！咁多年之後再同佢重遇，佢嘅燒味一樣係咁好味咁吸引到我！雖然每次去到都見到大排長龍，不過好嘢真心值得等。我最鍾意食佢嘅叉燒，佢啲叉燒燒得够夠林身，如果係肥差仲正，格肥格瘦，中間嘅脂肪肥而不膩，好似食啫喱咁，就算瘦叉都好林，唔似出面啲叉燒勁柴同埋癡牙，如果食到外面其他好柴嘅叉燒一定black list嗰間燒臘舖! .另外佢嘅其他燒味好似燒肉切雞油雞燒鴨，我都覺得響水準之上！單拼$26，雙拼$28， 鹹蛋都係$4一隻，我通常會叫雙拚加隻鹹蛋$32，價錢抵分量仲要勁足，師傅手起刀落大大舊，我已經幫襯左N次，所以都有少少心得，建議唔好嗌四寶飯，因為四寶飯都成$40入

經過這燒臘店，想買半斤叉燒加餸，以前買過之店的燒鴨是抵吃又美味的，這次就試試叉燒如何!叉燒 ($72/斤)要求半肥瘦叉燒，不過吃時仍覺得沒有給予半肥瘦的，叉燒偏瘦而且很硬，實在不好吃，下次都是買回燒鴨好了.

搬來元朗後每次經過忠輝燒臘都總會見到一條人龍的，不論是午市還是旁晚時分!每次都總是說要找日買來試試，也說了好幾個月，是次旁晚六時多經過，再也沒藉口推郤下一次的了~ 店子有兩條排隊的人龍，較長的一條隊是買燒味飯盒的，單拼($20)、雙拼也只是($22)，還要送例湯，價格也真實惠，怪不得有多達十多人排隊。至於買燒臘的隊只有4、5人，相對買飯盒的人龍少得多~等候了大約十多分鐘，終於排到了，由於現在家中只有二人吃晚飯，是次就買了半隻燒鴨($55)回家加料，燒鴨是即斬的，新鮮熱辣，快快歸家開餐了!回家路途大約十多分鐘，回家拍照後才吃，燒鴨仍是熱的，熱辣辣的燒味配上白飯最美味不過，燒鴨肉汁豐盈，亦很肥美，以$55可以買到那麼大盒的燒鴨，而且是新鮮出爐的，燒鴨外皮很脆，肉質也厚實，亦有很多肉汁，味道真好!這間店價格實惠，而且味道也不錯，絕對有下次!

呢盒飯大家可以估幾多錢.18元有飯有湯.不過一定要外賣,不設堂食.湯贈送的冬瓜豬肉湯.碗內有2件冬瓜,豬肉鬆化.富肉香味.湯清徹帶鮮甜.物超所值.燒鴨飯:燒鴨份量多.皮脆.肉嫩也有鴨的鮮甜味道.要批評之處只有某部份有肥油.味道有點過鹹.而飯粒亦粒粒分明.不俗.服務也不錯.18元可以食到飽.味道又不差.當然值得推介.

係好耐好耐之前，我已經見到呢間燒臘店日日排晒長龍，d人都係為左個燒味飯。今日我見無乜人排，自己就走去排埋一份......終於知道原因......十八蚊一個雙拼燒味飯盒，d料多到鋪滿盒面......d飯多到「掙飽」你。俾個燒肉特寫你嘆下......千層肥瘦火腩肉，肥美得黎，又有肉感咬口享受......但火腩皮已經唔脆(唔好意思，因為買完飯盒，返到屋企，都隔左半個鐘，焗到唔脆喇。)燒肉味道調得剛好，唔會太鹹，唔會太淡。俾個肥叉特寫你睇睇......嘩~肥瘦參半，肉質鬆軟唔會韌。正呀~味道都係調得雙當好。另外要讚就係d飯，好正，一粒粒好煙韌，唔會一「pat pat」成瀾飯狀。配合埋荵油同佢地既燒味豉油，更添滋味!

元朗美食多，連燒味店也多過人。每次買燒肉，回家途中都忍不住偷食，但一定要買燒腩或成條骨買才包好食，因為就咁燒肉，有時部份不對，便吃不到那種入口溶化的感覺。所以，每次我都寧願俾多d錢，買舊好d燒鵝味道濃口，連皮食更是香得不捨得食。一到6時左右，便大排長龍，因為真的又平又好味。

尋日農曆三月廿三日天后寶誕,元朗一年一次會景巡遊.熱鬧完後到呢度買外賣返屋企食,呢度我係第一次幫襯,之前都聽過好多朋友話,呢度外賣飯盒平靚正,尤其以燒腩仔肉皮脆肉厚。但呢度只係得外賣冇堂食,所以我買【燒肉切雞飯】外賣,雙拼$14元送一碗例湯,今日係菜乾湯。返到屋企即刻急不及待開餐,好耐都冇食過燒味飯,食落認真好味。燒肉名乎其實燒腩仔肉,皮脆肉厚完全唔肥,切雞肉亦唔肥厚肉有雞味唔霉,甜豉油加薑蔥茸更加正。例湯雖然係送而且細細碗,但菜乾味好正唔過鹹,湯底有瘦肉好咬口,完全唔覺係頭尾什肉。總括講,$14元一大盒雙拼飯,真係超抵食又新鮮。雖然呢度離我屋企較遠,但我下次都會再去幫襯~