小炒皇 (已結業) 查看

老闆捨得在食材下本錢, 選取食材亦嚴謹, 烹煮方面願意落功夫, 單是一個烏雞椰子湯已令人讚嘆, 超級足料以慢燉的方法, 湯入口甘甜鮮香, 辣子炒雞丁食得出是用鮮雞, 且非常入味, 送酒一流, 還有好少在食店吃到的赤米, 這種海蝦的鮮甜是非其他蝦可比, 酥炸生蠔是選用新鮮本土蠔, 那個酥皮做得酥脆不油膩, 入口即溶, 當晚叫了很多餸, 抱歉沒有一一影相, 埋單價錢是良心價, 吃得滿足, 付鈔時更是笑住俾, 伙記態度好好, 小店的人情味, 這樣的食肆食完你是想通知好友有這樣的好店。

非常好食，又超平！我們一行10個人去小炒皇！炸鮑魚，用特別的粉去炸，超好味💪🏾臘味粒煲仔飯，食完一煲要再叫一煲，超正👍🏽梅菜炒芥蘭，一絕👏🏽👏🏽👏🏽食物新鮮，冇加味精，快、靚、正！

一行六人叫左五樣野和自携了四款海鮮。波蘿咕嚕肉，皮脆肉多汁，但要趁熱食，加上大量波蘿及青椒，吾錯。椒鹽鮮尤，炸粉略多，件尤魚都厚身，好食但好熱氣。上湯菜心豬潤，豬潤都幾多下而且啱啱熟，好此道者不要錯過。豉油皇鵝腸，之前食過好ok ，今日d鵝腸比較細小，在底的芽菜也不多，這個餸比較差。豉油皇炒麵，炒得乾身有獲氣。自携海鮮菜式有豉椒聖子皇，蒜蓉粉絲扇貝，清蒸老虎斑和豉油皇大蝦，四款煮工也不賴。埋單 $1000+$780（海鮮）

假日同屋企人去完海洋公園，難得黎到南區，晚飯就同屋企人打算去鴨脷洲大街食海鮮！我地一行4人去到鴨脷洲大街街市睇下有咩海鮮可以加餸，最後就買左賴尿蝦、膏蟹、肉蟹同埋龍蝦🦞今次選擇左呢間小炒皇，店員都好熱情有禮招呼！最叫我地點左芝士龍蝦伊麵、避風塘炒蟹、椒鹽賴尿蝦同埋其他菜！海鮮好新鮮，全部都整得好夠味！龍蝦伊麵d芝士好濃好滑，個面又唔會好乾好硬，好好食！避風塘炒蟹完全唔乾，用既配料都非常惹味，鹹鹹香香會令人不停咁食！賴尿蝦更加唔洗講，外脆內滑，連個殼都可以食埋！d肉又好彈牙，完全唔會覺得過左火！整體呢餐海鮮餐都好滿意，一定會再訪！

鴛鴦鱔：豉汁蒸 拼 南乳脆皮，蒸果邊d鱔好肥美，脆皮果邊咸香唔油膩，送酒一流！黑椒鐵板豬手，上台自帶BGM，咋咋聲引死隔離，一刀切開，正宗皮香肉滑😅白灼珍寶赤米，特登叫老闆安排，因為收工去街市一定買唔到，真係又大隻又鮮甜😁果皮蒸方利，自帶海鮮，可能條魚太大，感覺果皮落得唔夠多🙃避風塘同椒鹽菜式，夠乾身，唔會油立立，又唔會好似外面d大排檔咁過鹹！乾炒牛河，小炒皇，鑊氣十足！其它嘢，全部都好好食，睇圖就明！☺️

今日lunch去咗鴨脷洲嘅小炒王度食，豉汁炒蟶子啲聖子皇大大隻啖啖肉非常之鮮甜。豉汁炒蜆正正常常，燒乳鴿非常香口沙拉骨酸酸甜甜好開胃。椒鹽牛腩煲個湯底好龍濃。蒜蓉粉絲蒸扇，西蘭花炒帶子，霸王豬手炸得好香脆，驚喜嘅係佢加咗啲芥末，冇違和感同埋咬落去豬手啲骨膠原幾有口感，臘味飯好香口。

因為限聚令的關係，分了三桌坐，自携海鮮六款及以左d餸。紅燒乳鴿，好香口，都幾 juicy 。豉椒鵝腸，原本冇叫，侍應話可以落錯了單，整多左，問我地要吾要，鵝腸應該系新鮮嘅，有股鵝蘇味，送下啤酒，吾錯。上湯菜心豬膶，食左件豬膶，啱啱熟，吾錯。椒鹽九肚魚、勝瓜煮魚肚粉絲，咸魚雞粒炒飯，冇試。咕嚕肉，因為見到隔離枱叫左碟，好似吾錯，所以加嘅，件咕嚕肉外脆內軟，個汁甜甜酸酸，好醒胃。啫啫芥蘭煲，一上枱，好香好惹味，但略嫌吾夠乾身。自携海鮮加工為，蒜蓉粉絲蒸扇貝，蒜蓉開邊蒸蝦，椒鹽鮮鱿，蒸班，薑蔥炒肉蟹，上湯油鹽水煮花甲。另外加些啤酒、汽水，埋單連加工費，每位 $220，都抵食。環境就一般啦，侍應可能比較忙碌，所以應對就一般，沒什麼耐性。

樣樣都好好味，連我平時唔食既茄子🍆都食埋，水蛋🥚蒸到火候剛剛好，又滑，自己食左半碟🤪，最緊要果碗無味精既例湯，好似返左屋企食飯咁，好有家既感覺，其他食物就更加唔洗講，雞煲，南乳吊燒鱔，烤魚，水煮魚，腊味飯都一流，海鮮更加撚手，老闆同廚師對食物有一種執著，多謝朋友帶我去食超水準既飯店

服務態度極差，我們叫左8個餸，用餐時間只有1.5小時，問我們要幾多個飯，我同朋友講我想食半個，佢大大話講我們無半個飯買，我話我同朋友講問有無人同我share姐，叫餸食飯居然有限用餐時間，我地叫得多都要快食哂，又貴又唔特別好食，不知所謂

一入到去叫左個六人餐，另加蒜蓉蒸扇貝（唔新鮮又細隻），個炒大蜆(食到我一口都係沙，殼多過肉好多)，果個咩招牌小炒皇（咸到呢食完飲左成壺茶都唔掂），跟餐的籠仔開邊蝦蒸飯(啲蝦肉霉到呢～)…啲嘢食差都算啦！追加三大罪狀：1.問人到齊未又唔俾人對單，望下張餐牌都唔俾，甘點知道齊唔齊呀！啊姐，跟住啲態度超差。2.不斷催人走，話有客係門口度等緊。3.仲要唔俾人碌卡，焗住我地要搵人跑去地鐵站㩒錢。今餐真係食到一肚氣～

自從有咗地鐵站，我哋間唔中都會去香港仔食飯。平時我哋主要都係買海鮮比餐廳廚師幫我地煮，因為食材係我哋自己選擇，而佢哋煮得都唔錯，我哋都幾鍾意去食。今日晏左去只能夠在餐牌上叫餸，叫咗個菜，豬手，鮑魚炒飯同埋脆皮牛坑腩。除咗牛坑腩，基本上其他都好食的。

服務，態度超級超級差。已經唔係平，做客人仲要受返佢地氣。單又成日落錯！唻錯左，同佢講，仲好串咁問返轉頭，咁而家整錯左有無問題呀？當然我地無要求換返啱啦！就算大街幾小夜市選擇都唔會再幫襯！

新年留留全個鴨脷洲得番幾間餐廳開門做生意呢間係其中一間原來係接左旅行團團餐生意我地入到去得一張枱可以比我地呢啲散客坐底望望餐牌 新年價我地一場黎到 都無所謂啦椒鹽鮮魷 - 比較正常 炸得鬆化 唔會太鹹滑雞煲仔飯 - 煲底啲飯唔係飯焦咁簡單 係真係燶芥蘭炒肉碎 - 唔鹹 但好油金沙骨 - 超鹹啊 一定要配飯蒸魚腩 - 唔知點解蒸都可以咁鹹幾個菜都偏鹹架 老人家唔適合食可能新年淨係打算做團餐生意師傅都放晒假mode 馬馬虎虎了事平時午市唔加一 新年就有加一 埋單人均160

同事抽中大獎iPad Pro 一部，他把它在網上放售套現之後，拿了部份現金出來請大家吃午餐。餐廳地點選了鴨脷洲的小炒皇。兵分兩路，一路人馬先到餐廳取位，另一路人馬就去街市買海鮮，拿去小炒皇加工。這裡不論吃什麼，都會按人頭數份量送例湯，今天是青紅蘿蔔湯，飲落好聚火。海鮮尚未到，我們便先點了一個蝦羔蒸腩仔午市快餐食和一個鐵板黑椒豬手食住先。腩仔又爽又腍，蝦羔味非常濃味。豬手煮得腍，黑椒汁非常惹味。極期待的海鮮來了，赤米海蝦是白灼，鮑魚是以果皮蒸，紅鮋就來個清蒸，而大蜆就用鹽油水煮。這裡的師傅弄海鮮的確有一手，時間掌握很準，煮出海鮮的鮮味出來。魚肉非常嫩滑，蜆肉非常鮮甜，鮑魚肉質彈牙。不過加工費略為嫌貴，平均每款要收80多元。

今日老細心情好，中午揸車拉隊去鴨脷洲大街的小炒皇食飯。先來個【青紅蘿蔔老火湯】，夠火喉，無味精，食落非常舒服。【蒜蓉少豆苗】豆苗好嫩，加咗上湯來炒，幾好味。【蒜蓉粉絲蒸扇貝】扇貝非常大隻，啖啖肉。粉絲嗦晒扇貝和香蒜味，是這道菜的精華。 【一品雞煲】嫩雞件放咗在特別湯底的沙鍋內，慢慢滾熟，又香又滑。食完雞，襯鍋內還剩有湯，便放些拉麵入內，煮一煮又食得。【白灼鮮魷】鮮魷剛好灼熟，鮮甜爽口。還有墊底的牙菜，魷魚跟牙菜一起食，口感很特別。 【荷葉海鮮蒸飯】用荷葉包住啲米和海鮮來蒸，海鮮包括蝦、蜆、蟶子、魷魚，再加上香蒜、蔥花，好食到不得了。如果老細日日都心情好就好了，可以多帶我們出外吃飯。