小小食掂 (已結業)

筲箕灣地鐵站出口，有間開業半年既小小食掂，係出名雞蛋仔隔離，今晚一於外賣加料，買個滷水拼盤試下，好夠味又淋又香！有鵝翼，豬手，墨魚，臀，牛展，牛根，金錢肚，牛舌，大腸，大大盒，78蚊，抵食！ 鵝翼，個仔平時最鍾意啲滑野，佢話100分豬手同牛根好淋入味…查看更多

「小小食掂」喺筲箕灣港鐵站對出，主要做外賣生意。雖然舖仔細細，但MENU幾豐富，炒粉麵飯、炸物、滷水同糖水都有賣。老闆娘推薦嘅雜錦滷水好大份，款式亦好多，有牛展、墨魚、豬耳、豬肚…係宜家少見賣滷味賣得咁齊全嘅檔口。炸魷魚鬚用咗吉列皮整，食落脆身啲，仲有麵包糠嘅香味。賣$15好抵食。手撕雞撈腸粉亦都好特別。起初仲擔心腸粉嘅甜醬會同手撕雞唔夾。但手撕雞好重麻油香，同滑溜腸粉一齊食可以減膩，好MATCH。咖喱牛腩飯好值得一試。咖喱濃陏香辣，牛筋牛腩軟腍入味，份量都幾多。整體嚟講食物性價比高，而且店員都戴晒口罩同手套，食得安心放心。…查看更多

近排相信大家都冇咩心機，但好耐冇掃過街又心血來潮，黎左一次外賣既街頭小食! 見到好多街坊都係小小食掂度等緊飯，於是我又去湊下熱鬧。叫左受歡迎既招牌滷水拼盤，阿姐話八爪魚難得返貨，所以要埋，滷水夠入味，豬耳金錢肚爽口! 雖然係滷水，但食落都覺得食材係新鮮! 因為差唔多係晚飯時間，所以叫左個雞脾飯，即叫即炸，好新鮮，而且隻雞脾同隻手一樣咁大，同盒飯分開放，咁飯既蒸氣就唔會令到炸雞脾皮唔夠脆!!!呢度有款芝士燒肉釀雞翼，幾驚喜! 足料既餡同埋冇骨，咬落又冇違和感，因為有粟米粒，咸咸地甜甜地咁，幾得意既口感! 最後叫左碗仔翅!落埋醋、麻油同胡椒粉，又係好多料仲要有花膠碎，好味，佢唔會稠到漿住個口，我自己就覺得算係岩岩好!! 係鬱悶既時間食D自己想食既野，會開心D嫁!雖然係外賣，但都好過冇。…查看更多

呢日晏晝去完行山，搭車出返筲箕灣，已經係夜晚七點幾，阿媽冇煮飯，所以我就買啲嘢食返去當晚餐。東大街有好多小食店同餐廳，其中得個名嘅雞蛋仔就最出名啦。但喺正側邊有間新開嘅小食店，賣啲嘢食好平，所以就吸引咗我🙈。老闆有問我哋有無乜想食，想唔想炒個飯等等。都好喎，橫掂當晚餐嘛！小店賣嘅嘢食種類好多，有炒粉麵飯、鹵味、脆炸小食等等，估唔到連糖水都有👏。我買咗呢到咁多嘢食都只係$105咋，三個人都夠哂😂😂，仲要由小食食到糖水。我買外賣，如果堂食嘅話就坐街邊。咸魚雞粒炒飯($35)，炒飯係即叫即炒，雖然唔係用大鑊炒，但都炒到好乾身，而且有好多雞粒同魚粒。$35邊到搵啊？如果我住近啲都一定成日食😉。生炸大雞比($15)，雞髀真係好大隻呀，齋食佢都飽🍗，雞髀炸到外脆肉嫩，而且本身已經醃咗味，唔會淡。芝士燒肉釀雞翼($20)，有2隻，中間釀咗啲芝士同粟米，成個組合唔錯。不過雞髀同雞翼有啲似，可以唔使一次過嗌🙊。避風塘炸豆腐($15)，呢個同我想像中唔同，因為我以為佢係一粒粒嗰種炸一口豆腐，上面落乾蔥乾蒜。但原來呢度嘅豆腐係大大件，再喺面頭撒好多芝麻同甜醬辣醬，都幾惹味🤤。呀媽近嚟好鍾意食糖水，而呢間小店都有賣，仲要$10碗，即刻買兩款比佢食啦😘～。第一款係白果腐竹($10)，唔錯喎，本身睇隻色以為好淡，點知原來係啲腐竹煲溶哂，而且有好多白果。整體清清地，又唔太甜，正！芋頭西米($10)，呢碗又係好足料，西米大大粒，芋香味濃。基本上對$10嘅糖水真係唔會抱有期望，但佢絕對唔比糖水舖或酒樓嘅出品差。再加上大大碗，一定夠食😋。總括嚟講，呢間小小食掂真係好掂👍，三個字「平靚正」講哂。老闆同老闆娘兩個人應該都有份煮，一腳踢好忙，經營一間小店都唔容易！呀媽仲叫我下次經過嘅話，再買兩碗糖水返去喎🤣🤣。…查看更多

做完運動去東大街搵食,間唔中比自己放肆😹有手撕雞伴麵,XO醬炒腸粉,碗仔翅,雞脾同滷水併盤,兩個人份量都算差唔多😋🍥老闆娘話一定要試滷水墨魚同雞脾,試完又真係幾唔錯,墨魚唔會好似擦子膠咁又唔會太粉😍雞脾都醃得好入味🍜個伴麵係用左麻醬再加少少滷水汁同好多好多雞絲,再拌類似台灣陽春麵而成嘅,XO醬炒腸粉就似平時飲茶個種,雖然好難抵抗美食,但真係偶爾食下好啦🤣🍗最怕會好勁味精同好咸嘅嘢食,呢間小店食完都唔會好口渴,下次可以再戰…查看更多

港式小食店👍今日突然想食啲港式小食，近近地去咗筲箕灣買返屋企嘆。位置係筲箕灣地鐵站b出口，一出就見到，就係一間人龍雞蛋仔舖頭隔離。最近食多咗外賣，覺得有啲唔環保，所以自己帶咗個食物盒去裝。但係去到發現鋪頭食物款式好豐富，叫左好多野，一個盒都唔夠。港式小食我最鍾意食碗仔翅，可惜佢哋今日冇買，就轉咗叫另一港式小食生菜魚肉。仲點咗炸魷魚絲、炸雞軟骨、芝士煙肉釀雞翼及鹵水紅腸等小吃。一定要試下呢度嘅招牌菜手撕雞腸粉，超好味，雞絲又香又滑，腸粉勁多醬，食到停唔到口。…查看更多

今日要去筲箕灣覆診，睇完醫生，見時間尚早，決定去東大街買底雞蛋仔做下午茶。等候期間，發現原來鄰舖新開左間小食店，除了有生炸大雞髀、碗仔翅、撈腸粉等供應之外，竟然仲有手撕雞、雜錦鹵水同各式飯麵、烏冬，食物選擇都幾多元化，而價錢亦非常親民。反正今晚還沒想到吃甚麼，就一於買些外賣回家吃，省卻煮飯的工作。買左盒泰式酸辣無骨鳳爪、手撕雞飯同雜錦鹵水。鳳爪賣相飽滿又完整，大大隻，非常吸引，食落酸爽微辣，口感冰涼。配料有紅蘿蔔、洋蔥、芹菜、紅椒絲等，夾埋鳳爪一齊食，開胃又惹味。咁大盒都只係 $30，非常抵食！手撕雞飯味道亦唔錯。手撕雞面頭灑上了芝麻，食落除左有雞味外，仲好有芝麻香！手撕雞肉好足料又唔乾，雞皮夠爽、雞肉又嫩滑，配埋米飯食，鹹度啱啱好！鹵水拼盤： 好少見小食店有潮州鹵水賣，所以一次過點多幾款試下。睇下幾豐富，有墨魚、紅腸、豬肚、豬腸、豬耳、豬脷、豬手、金錢肚、牛展、牛筋。墨魚肉質鮮甜，口感富彈性。豬腸脂肪不算多，亦沒有異味，間中吃吃也不錯。豬手鹵得好入味，外皮好爽，充滿骨膠原，用來送飯一流。金錢肚軟腍中有彈性，食落無渣。小店雖然以外賣為主，不過聽店員講，夜晚都會喺門口開幾張檯，提供堂食。其實佢啲飯盒真係好平，大部分都係 $30 起，經濟又實惠。…查看更多