一直都想入嚟試吓，今日未多十二點，人唔算多，於是就行咗入去。餐廳在馬路旁，玻璃門嘅設計，光線可以透入餐廳內。西餐廳內卻擺放兩部電影，播放電視台劇集，有點格格不入。午市餐牌有 A 至 F 嘅選擇，配有餐湯和飲品，週末假日就需要加一服務費。而我就揀咗 C 餐意式燴豬仔脾配野菌汁 (Braised Pork Shin-bone-in w/ Wild Mushroom Sauce ($58)，而餐湯就揀咗意大利菜湯。不過餐廳職員係會即刻問埋你飲什麼餐飲，而唔係等係食主菜食得七七八八時先問，於是我叫咗熱華田。意大利菜湯配蒜蓉包 (Minestrone w/ Garlic Bread)意大利菜湯比羅宋湯味無咁濃，以洋蔥，蘿蔔，西芹為主，湯料都算多，味道中規中矩。而蒜蓉包係好脆，脆到其實有啲硬，無咗蒜蓉包應該有嘅外脆內軟，有點失望。係我飲緊湯嘅時間，餐廳職員已經奉上我嘅餐飲，而我仲未飲完湯嘅時候，連個主菜都出埋嚟，真係好奇怪嘅安排，食西餐都會食到成檯都係，呢一方面真係有待改善，否則幾好食嘅食物或熱飲都會待涼，影響原有嘅味道。意式燴豬仔脾配野菌汁 (Braised Pork Shin-bone-in w/ Wild Mushroom Sauce) 單看賣相係唔錯，配菜顏色鮮艷，豬仔脾經排列過。因為我揀咗薯菜，所以有薯條，薯條粗幼適中，尚算香脆，不過待了一會嘅關係，已經唔夠熱。豬仔脾有三件，肉質唔夠嫩滑，同我相像中不同。伴碟嘅有豆，蘿蔔，西蘭花，椰菜花同菌類。豆，西蘭花和椰菜花食落都幾新鮮，不過蘿蔔因為用鹽水煮過，仲有鹹味，扣晒分。而菌類就更加特別，全部浸晒落個汁，而個汁係茄汁，酸酸嘅菌真係入唔都口，最後剩番晒係度。餐牌中文係意式，英文寫 Mushroom Sauce，但係依家係 Mushroom + Sauce。以我嘅認知 Mushroom Sauce 唔係茄汁。如果因為我叫薯菜而將茄汁放係底部，真係錯誤嘅配搭，我最後要避開晒啲汁食豬仔脾同配菜。餐飲 (熱華田)由於杯餐飲太早到，加上本身唔熱，當我食完個餐之後再飲，係涼晒。不過我就見隔離杯即磨咖啡係後上，真係唔明餐廳嘅安排。時間接近一點，人開始多，本身餐廳職員唔多，所以有點踢腳，已經等唔到同餐廳職員有眼神接觸叫埋單，唯有自己去吧位嘅收銀處俾錢。餐廳職員在找錢時話可以儲單，一年內滿二千元就有折，之後就係張單蓋咗個印仔。總括而言，餐廳食物和服務有待改善，希望下次去試其他食物時唔會咁唔好彩。…查看更多
