大歡戈 (已結業)

第一次黎食，都完全唔知呢度既規矩...令我感到一額汗既尷尬😰其實之前啱啱開業見到人頭湧湧，經過見到咁多人既時候以為有啲信心，然後再睇係海底撈旗下既快餐店，更加增添信心，到今日終於經過就想黎試下，夜晚6點見冷冷清清，放工時間冷清都好合理，就抱住期待既心態入去試下！入到去門口就同個點餐既男店員講左2次食咩，呀....原來佢唔識聽廣東話，講左兩次佢先示意佢聽唔明，要我講普通話嗌餐佢先明，然後我嗌多杯凍檸茶，佢就咁比左個空紙杯我，我又一額汗，係咪要我自己沖？點知原來個隻杯係比飲汽水既人任fill，而我檸檬茶係廚房水吧沖，到最後比左個姐姐收返隻杯。出餐後完全冇飲管冇比餐具連檸檬枝棍都冇比，我又冒起好多懷疑人生，我望望側邊左右又完全冇餐具冇野可以拎，問人先知道入到去坐既時候每張枱枱底都有餐具拎，但...但係飲管同督檸檬其實係要水吧比，到最後我都係要主動問店員先知。等餐既時候望望餐廳啲機器，汽水野飲任飲白飯任斟，自助都幾方便，好似幾好咁，我就蠢左點解自己叫左杯凍檸茶。🍚 番茄豬扒飯 HKD$33份量有點細，但呢個價錢都合理既，外表都幾靚仔呀！試食一刻，番茄汁既假甜真係好甜同好假，有啲唔係好習慣呢種甜

試咗一次好難忘嘅經歷😰😰諗住試下一個咖喱焗豬扒飯雖然係炒飯底 完全冇蛋味加鑊氣但係個飯係好淋最驚人嘅係佢地豬扒🤒完全唔需要有牙都食到😑鬆肉粉好多 完全冇肉質無肉味🤢🤢炸雞翼正正常常可惜好重油溢味

呢一間野可以話係平價野中嘅平價之選，喺灣仔呢一個區裏面竟然可以有$19 1個粟米魚柳飯，不過可能太多人幫襯，所以我去到嘅時候已經冇晒呢個選擇。我見到隔離枱嗌咗個咖喱雞焗飯，見到真係好吸引，所以就跟佢一齊嗌，我個朋友就嗌咗咖喱牛腩飯。先講一講佢出菜嘅速度，咖喱牛腩飯我哋等咗成20分鐘先出到，雖然今日午市比較忙，但我相信有進步嘅空間。而去有一部飯機可以自己揀要幾多飯，誠購仲可以添飯，啱晒我呢啲大胃王。佢就連嘢飲都係任飲嘅，不過我驚糖尿病，所以淨係飲咗一杯可樂就算啦。講一講食物質素，啲人話慢工出細貨，可能呢樣嘢唔適用於呢間餐廳度，我哋等咗20分鐘嘅咖喱牛腩飯難食到嘔電，佢啲咖喱汁稀到爆炸，醫院餐都冇佢咁難食，不過咖喱雞飯有驚喜，同大XX 可以一拼高下。點都好，佢喺灣仔區裏面都算係一個平價嘅選擇，啱晒我呢啲窮苦學生哥，下個禮拜出嚟再實習一定會再試吓佢個肉餅飯。

_____好味指數：🌟🌟🌟抵食指數：🤑🤑🤑之前朋友突然分享呢間茶餐廳，話佢啲嘢好抵食，一個午餐三十蚊有找，咁經濟嘅餐廳當然要去試吓係咪真係咁抵食。咁啱喺附近做完運動，就先去試試佢哋嘅早餐。環境都算乾淨，空間幾大，感覺上同其他快餐店差唔多✅香煎豬扒+餐肉+鮮茄通粉早餐比我嘅感覺就唔算太抵，不過都係平嘅。嘢食種類都幾豐富，有豬扒、餐肉、餐包、茄汁豆同通粉，而且佢哋嘅豆漿係自己去部機度斟，都幾特別。味道就正正常常，或者下次要試埋午餐先感受到佢哋嘅抵

因為要去灣仔拎野，就由新界過海去香港果邊，拎完野又唔知食咩好，灣仔間間野都唔平嘛。咁岩經過呢間，友人話好平。叫左個最平粟米班塊飯（$19）（飯仲要任盛）加任飲汽水（$5）再加蕃薯條（$10）=$34。平到就算出深水埗都好難搵到平到咁。先講粟米班塊，魚塊似岩岩炸起，熱辣辣又無翻炸既感覺，加埋忌廉粟米汁，餸飯真係一流，個汁偏咸，本來重口味既我覺得岩岩好，好餸飯。六舊魚塊，$19黎講真係無得輸。個飯我個人覺得似用大陸米，飯中心有黑灰色，似內地食果啲平價米。本來好乾，但撈埋汁就岩岩好。蕃薯條好香蕃薯味🍠炸得唔算脆身，炸完烘住佢果種，但$10黎講份量好足。再加埋野飲又係任飲，汽水就預無咁足氣，但志在解下渴。。。場內都幾新淨，仲有部洗手機，職員又好好服侍，整體黎講，價錢係超值之選

大歡戈在網上很多人討論，原來就係公司附近，以前吉野家個鋪位。之前經過見到佢咁平都唔係好敢試😂😂😂今日終於黎會一會佢$19蚊已食到粟米魚柳飯其他大部份$30蚊樓下，今時今日仲可以去邊度搵？要慳就慳到盡我就試左佢最平既粟米魚柳飯一分錢一分貨！好味就一定唔講得上！但唔算難食既，正常味，係舊魚柳有少少厚皮啦加$5蚊仲有氣水任添～～白飯係自己裝既，可以揀200g或300g，而且都係任添既，岩曬D大胃王值得讚既係店內環境乾淨寬敞，有足夠既座位，都坐得幾舒服而且我遇到既員工都幾有禮貌架！最後想講既係無論你買任何餐都送既前菜睇落平平無奇….食落有驚喜佢係麻辣菇片，個味調得幾好，連唔食得太辣既我都Like用嚟送飯一流

咁嘅價錢，咁嘅質素，實在值得常常幫襯地方光猛，乾淨，價錢又平，白飯任添，飲品自己斟，早餐有豆漿同埋麥皮飲，希望可以喺唔同區域，都可以有分店香港人就有福喇，有平嘢食祝生意興隆！！！！！

好激氣，外賣買三盒飯，打開得兩盒。 打電話想問番，電話打十萬次都無人聽。 End up 要行番去申訴，櫃枱小姐話： 唔好意思，掉左埋一邊睇唔到！？唔信邪，再打多次個個電話，都係無人聽，估計電話係假的

新開無耐即管入去試下啦！因為一望，都幾多人幫襯嫁。一入到去，見佢白飯任食，加$5任飲，呢個已吸引到一定數量嘅人黎試啦！佢飯自助，你可選200g或300g飯，或者食完再取啦！因為飯小暖咋，唔夠熱嫁粟米魚柳飯，最普通，但最易試到味嘅餸，粟米汁可以餸下飯嘅，魚都有魚味，咁都預左係冰鮮魚嫁啦！每個飯都送前菜，有酸蘿蔔同辣菇，個蘿蔔有驚喜，似日式帶酸醃蘿蔔。個蕃茄焗豬扒飯當然唔及大財團個D，但都尚算ok嘅，豬扒味道唔錯，焗耐少少入味D更好。最好味個炸地瓜條，好脆，地瓜味十足，雞翼就有D咸 但我明明叫玫瑰蜜糖味，why好似變左玫瑰鹽味呢？總之咸飲品真係任你斟，汽水奶茶，其實仲有咖啡，個奶茶再加糖會好D，佢隔離放左糖比你自己調味嘅，但好有茶餐廳風味，必飲，糖度任調，又幾好。絕對肯定末去到劣食，但係你對食有要求嘅，就末必啱你黎食了，呢D窮人恩物，你末必會欣賞。不過我就覺得佢嘅炸物，如地瓜條，蝦多士等，其實絕對出得大場面。

第一次嚟到大歡戈食飯，當我一行到餐廳嘅正門，真心覺得間餐廳嘅裝修幾靚，而且間餐廳入面好光猛、乾淨同舒服，店內更設有單邊坐位可供獨行俠用餐，好～講番正題先，我當日入到店內，企喺收銀櫃位嘅男少年服務員真係幾好禮貌，即刻會同客人講歡迎光臨，然後當我買咗票之後，嗰位男服務員就會遞上一張單據及一隻紙杯，買完票之後其實好快就已經攞到食物，白飯係要客人自己攞碗去裝，打飯機有兩種Size選擇，有200g同300g，我裝咗兩碗300g嘅白飯，然後再斟咗一杯凍奶茶，但我後來發覺，可以我落得太多冰，杯奶茶變得好淡，但有茶味，至於食品方面；白飯的確係幾好，有少少嘅米香，飯粒分明，主菜方面～咖喱汁味道唔算香濃，但的確食到有咖喱味，薯仔有6件，都幾粉嫰好食，隻炸雞肶嘅味道應該係用南乳醃製過，所以有好多唔受得南乳嘅人，會覺得味道有D古怪，但其實南乳炸雞肶係好好食，炸雞肶外皮真係炸到好香脆，肉質唔嚡口，真係過得去，呢度嘅白飯同飲品係可以無限任添嘅，認真！個人總結：呢度環境相當舒服企理，服務員態度懇勤，而且坐位靠牆嘅位置，採用一列式柔和嘅LED燈，全店採用流黃及白色設計，相當簡潔舒服，但唔建議中午食飯時間去幫襯，因為場

真係平，廿幾至三十幾元一個午市套餐，選擇又多，白飯任裝。冷熱飲品全部加5元，又係任飲任添。地方乾淨光猛，一般快餐店裝修，但平其他快餐店至少十幾元。葡國雞有一塊雞扒，一隻蛋和不少薯仔，還有幾粒意大利橄欖，味道不錯，好送飯。薯仔再腍少少更好。黃花魚是開邊炸，皮脆肉嫩，配泰式酸甜汁，只係28元。全部都自助取白飯，任添。加了5元，自助取飲品，咖啡奶茶汽水隨便揀隨便添。午膳期間有不少建築工人及學生哥幫襯，工人們多數添大大碗白飯，學生們則叫魚蛋雞翼等小食。有人或者會說味道不出眾，只係預先製作的食物，只屬飯堂級水準。但一分錢一分貨，絕對食得過。

見新開一排都冇食過，店面光鮮乾淨，22蚊早餐有個餐飲蕃茄湯通粉加杯咖啡，外賣加兩蚊好平但好難食，個湯好淡，冇咩蕃茄味，入面啲粟米又好硬，好似冇煮過咁，啲通粉質感差，一咬又散又難食，得個餐肉咪就係餐肉正常味，我要左即磨咖啡，正常野，但唔會有下次...原本見佢有豆漿任飲好似好開心咁同埋程序好亂，廚房入面既人好似唔知自己要做咩咁...行黎行去但又唔係出餐，收銀ok, 出餐有啲慢，都有禮貌...但如果一樣都係蕃茄湯底既通粉...我揀香港地算😭

成個餐廳用自助形式點餐取餐，今次黎我就嗌左個套餐B($20) 有杯汽水可以自助任斟，有隻雞脾，有4條台灣腸，另外我加左咖哩魚蛋($8)老實講係算係平，但食物d質素就真係好差..台灣腸比起出面街邊貨細條，味道一般。魚蛋彈都唔彈下質地似魚腐多過魚蛋，成粒得麵粉完全食唔到魚味，咖喱亦無咖哩味。至於隻脾，用黎炸雞脾d油唔知係咪用左好耐定炸過其他野，搞到隻脾d味道好奇怪。雖然平，但今日公眾假期門市都大把位淨...聽聞呢間係海底撈集團，估唔到原來d野食質素咁麻麻麻麻..不過d講大陸話既服務員妹妹都幾好態度，算係咁

行經灣仔諗住食個麵之後去剪頭髮，見到有間新開嘅快餐店就走去望下個水牌有咩食啦，嘩！😳😳個價錢真係嚇一跳，回到20年前，全部快餐飯類都唔超過30蚊，見佢咁嘅價錢咪膽粗粗入佢試下囉，叫咗個咖哩雞髀飯都只係24蚊加埋杯嘢飲5蚊總數都只不過係 $29 都唔過 30，另外嘢飲白飯重要係任裝添喎。 可能我大鄉里未見過，佢有個自助白飯機，可以揀 200 g 或者 300 g 嘅飯量，唔夠嘅可以再添…… 講番個主餐咖哩雞髀飯，其實冇乜太大特別，咖喱汁唔係太有咖哩味，炸雞髀一般茶記貨色，整體嚟講今時今日物價高賬嘅年代要咁嘅性價比其實冇乜太大要求，心諗應該只有大財團先有咁嘅財力去以本傷人，睇返原來佢背後嘅集團就係海底撈火煱同一個老細……

灣仔呢排開咗間新嘅快餐店，見到又有小食，有主餐同埋有甜品，所以今日就嚟試下。入到去，見到好多人都見新開張入嚟幫襯，不乏學生同打工仔。見佢嘅價錢唔算太貴，而我今日就嗌咗個32蚊嘅海鮮飯同一個20蚊嘅千層蛋糕，不過就唔包嘢飲，要加五蚊先有得任飲汽水，但係由於係外賣嘅關係，所以要加多兩蚊，呢樣嘢我就覺得有啲唔係咁貼心。但佢哋送餐嘅速度真係好快，我大概都係落咗單兩至三分鐘就已經即刻有齊曬所有嘅嘢。先講個海鮮飯，飯係用炒飯底，但我認為唔算太香，佢嘅海鮮比較細粒同埋唔算太新鮮，白汁方面我覺得唔算太濃味。失望之際，食咗佢哋嘅千層蛋糕，反而令我有新驚喜。佢嘅千層蛋糕係有芒果肉喺其中一層，所以食落去唔會覺得好肥膩，而且都好有果香味，呢個可以下次再試。因為呢個千層蛋糕我決定畀一個好評佢。