影片
港鐵中環站 D2 出口, 步行約4分鐘
繼續閱讀
電話號碼
25221624
付款方式
其他資料
自帶酒水
泊車
詳細介紹
外賣服務
加一服務費
以上資料只供參考, 請與餐廳確認詳情
4449 瀏覽
長輩一群早已定下三八婦女節於「鏞記」開年，大肥爸爸亦約好細佬充當柴可夫，點知當晚有兩位貴賓突然有事未能出席，XO仔與甜心兒即有幸補上。上到鏞記大廈八樓先知道晚宴o既所在地其實係「鏞記」名下o既高級會所餐廳「嚐真」。會所式經營o既餐廳只會招待會員。個會包有免費代客泊車，而且用餐時並無收取茶介、開瓶費或加一服務費，但午市及晚市均設有最低消費；如果冇聽錯，前者應為五百多元，而後者則為千二左右。步出升降機門已覺光鮮亮麗o既接待大堂及走廊雅致得黎好有氣派。廳內全為廂房，空間感及私隱度極高。廂房內用餐區旁都有個小偏廳，廳內用上酸枝椅櫈桌子及精美o既茶具，配合埋窗邊o既竹林，感覺就好似置身於世外桃源般。會所內外都可見時尚鮮花擺設，四周裝潢典雅大方得黎又不失現代感。餐桌上公用及自用o既餐具齊備，餐巾仲要係圍絲邊架，認真高級！主人家早已訂好菜譜，單睇餸名已覺震撼得好有詩意。賓客續一到臨，並由經理哥哥親自招待，所有菜式上枱繞場一周後都會由專人分好一份份，酒杯或茶杯都從未缺水缺酒，服務絕對貼身周到。酸姜皮蛋（免費贈送）：皮蛋不單色澤分明，食落就知其外層有幾彈牙，個蛋黃如何香濃糖心，酸姜則爽脆且唔辣。前菜之松子雲霧肉：貌似東坡肉o既雲霧肉層次分明，上柔潤下鬆軟，肉香帶甜，又唔會好溜。師傅專登另配一小碟脆口o既醃烏支筍，以其酸甜一解肥豬肉o既膩感。前菜之椒鹽海參扣：金黃亮麗o既海參扣皮脆心煙韌，少辣惹味，送酒一流。前菜之欖角烏魚扣：細佬都係初次認識此味「烏魚扣」，經理哥哥講解先知原來所謂「扣」其實係胃臟，「烏魚扣」亦即烏魚o既胃部，由於烏魚本身細小，每一小件已經係一條烏魚整個胃，名貴就在於要儲夠做一碟要用好多條烏魚。烏魚扣滑身得黎好爽好脆，實屬驚喜之作。至尊一品鵝：依道一品鵝之前喺「鏞記」都有食過，當時仲不斷四周推介俾身邊o既親友，其人氣度明顯有增無減，因為XO仔喺門口都聽到有遊客專程黎食名店o既「一品鵝」，而並非昔日都會點o既燒鵝。勁量級o既鵝煲就好似盆菜咁豐盛有層次，鵝隻o既肉、紅、肝、腎、腸、翼等都好有技巧同藝術地舖疊。墊底o既豆卜同鵝掌翼索哂味之餘仲好夠腍滑。中間o既鵝肉分有片狀及件狀；鵝片軟潤巧薄，鵝件則鬆軟嫩滑，各有各好味。舖面o既鵝雜更是一絕，因為每款均出色細膩，當中鵝腸、鵝腎一樣爽脆非常，咬落真係索索聲架！鵝肝厚潤軟滑，最正必選超級滑嘟嘟而又厚身o既鵝紅，冇得頂呀！一品鵝瀨：跟一品鵝每人有碗以鵝煲湯底撈煮o既瀨粉。一品鵝瀨滑溜半透光，由於索盡鵝煲o既精華，入口微辣惹味，有陣時美味就係如此簡單！鵝腦魚雲羮：魚雲羮魚味濃郁，混入咗蛋花及嫩豆腐，飲落質感柔滑，好非一般。窩貼明蝦球：窩貼明蝦球其實即係蝦多士o既升呢版。相信大家對蝦多士一啲都唔陌生，細佬自己都食唔少，不過原來喺高級會所餐廳食o既版本可以咁high。「嚐真」版o既蝦多士底層鬆化得黎一啲都唔油膩，頂面件已去殼o既蝦隻極之鬆爽彈牙，一味咁普通o既菜式當有比較下當真能突顯師傅精湛之廚藝，細佬真係食到拍爛手掌架。月映照紗窗：好比詩詞般雅麗o既「月映照紗窗」乃白鴿蛋拼燕窩竹笙卷之美名。燕窩竹笙卷爽脆心嫩，就連個口感都好似紗窗咁有「紗」feel。煮至奶白透明o既白鴿蛋外觀真恍如十五皎潔之明月，蛋蛋有彈性得黎好軟腍，吃畢一啲都唔溜滯。伴碟o既豆苗翠綠嫩脆，望落係咪好似一片草原呢？！禮雲子蛋清：每人一客o既燉蛋鮮橙明亮，師傅專登加多個雕花同綠湖增添上枱時o既震撼，有心思極！XO仔之前已學懂「禮雲子」為蟛蜞之卵子，亦深知係一種中國南方珍貴o既食材。柔軟滑溜o既燉蛋以味道鮮濃o既禮雲子調味，效果香濃易入口，輕巧得很。香芹枝竹浸深海斑：炸過o既海斑外層香口鬆脆，炸皮下o既魚肉卻又幼嫩甜美，就連魚皮都滑溜非常。揚州炒飯：講真食完大大碗一品鵝瀨都已經幾飽肚，但眼見金黃閃爍o既揚州炒飯實在吸睛，為食貓小肥結果都係唔忍得口。。。炒飯粒粒飽滿潤澤，伴上晶瑩爽透o既蝦隻更顯矜貴。椰奶紅豆沙湯圓：開年飯當然要食湯圓團團圓圓啦！足料o既紅豆沙只屬微甜，撈入椰奶即倍添香滑，主角湯圓軟潤香濃，正好為晚宴繪出完美o既句號。機緣巧合下讓XO仔於三八婦女節遇上「鏞記」屬下o既高級會所餐廳「嚐真」，喺環境幽雅o既廂房內享用咗頓畢生難忘o既珍饈盛宴，感激長輩悉心安排及經理哥哥貼身o既款待。據悉，除咗「鏞記」o既特色菜餚之外，會所大廚更會烹調出多道傳統及獨家o既絕色美饌。從主人家及經理哥哥口中，得悉已故o既甘先生原來多年前曾與著名武俠小說作家金庸先生合創出咗席「金裝射鵰英雄宴」，內含名作中「英雄豪傑」、「桃花園」、「北丐降龍十八掌」、「二十四橋明月夜」等精髓，聽到都垂涎三尺。女主人仲傳來「射鵰英雄宴」o既靚相，話下次約個時間再請大家食多餐，當真令人期待萬分！
繼續閱讀