3
0
0
港鐵灣仔站 A1 出口, 步行約5分鐘 繼續閱讀
電話號碼
25540888
營業時間
今日營業
11:30 - 15:30
18:00 - 23:00
星期一至日
11:30 - 15:30
18:00 - 23:00
付款方式
Visa Master 現金 AE 銀聯 JCB
座位數目
40
其他資料
Wi-Fi
酒精飲品
自帶酒水 詳細介紹
泊車 詳細介紹
電話訂座 詳細介紹
加一服務費
食評 (3)
等級3 2017-01-19
8467 瀏覽
產後第一個生日,老公安排了與我外出吃飯,第一次離家沒有BB在身邊,不太自在,但老公說一定要去試試這間餐廳而且也叫做放鬆一晚,兩個人相處下。是晚餐單 (由於我剛坐完月,好多東西都未食得,所以無所謂食大廚出馬冠軍菜)不過都好有驚喜去相⋯⋯頭盤:好精緻京燒海蝦拼煎封帶子:好鮮味燉湯慢煮吉品鮑魚海參這道菜一定要比5星,鮑魚海參好冧但又有𡁻頭,汁濃可配3碗白飯!我地真係叫了2碗飯食,仲要一路食一路讚好!紅燒乳鴿野生竹笙配有機蔬菜濃味菜式後可清新下味蕾糯米飯:又很出色,真係生炒生日版甜品總括:菜式正服務:專業,會留意客人進食速度,經常加茶,介紹菜式環境:都算靚,枱與枱之間可再間隔開會更有privacy最後陳師傅會出來謝謝大家支持,感覺不錯啊~~~ 繼續閱讀
(以上食評乃用戶個人意見 , 並不代表OpenRice之觀點。)
等級1 2017-01-01
4770 瀏覽
今天終於有機會試陳師傅的Solo. 餐廳不大但絕對有番屋企食飯的感覺,忍不住馬上開了瓶價錢合理的La Fleur Petrus 99。雖然沒有專業人士去開酒,但存酒的質量保夠不足。相信陳師傅在這方面會再下功夫!講番菜單,廚師發板,我喜歡!絕地推介,黃湯鮑翅,菜飯和煙燻BB鴿,人間美食,味道非常優雅,恰到好處,實而不華,絕對是冇得輸!有機會的話想試番陳師傅的鑊鏟功夫,非常期待!最後,仲要人頭一千蚊都唔駛,相信好快會加價.... 繼續閱讀
(以上食評乃用戶個人意見 , 並不代表OpenRice之觀點。)
一個電視節目令大眾認識到陳國強師傅,一編報導則令肥肥家族知悉冠軍名廚於灣仔開設新食府。翻閱過報導後,小肥即與家人商討,決定週一晚上喺新店「嚐悅」為哥哥餞行。以電話訂座時,接線生Faye姐姐耐心地解釋食客必先選定所食之套餐,現階段共有七款,每款均兩位起,價格分$680/位、$880/位及$1,280/位。「嚐悅」佔用面積全層,但地方唔算好大,幸好餐桌唔會擠得密麻麻,兩個廳之間又有趟門分格,配合埋潮格裝潢,感覺高雅大方。暗花枱布上齊備o既餐具中西合璧,潔亮衛生,且入型入格。就連桌上o既白玫瑰花都秀麗過人。幾位女服務生都一樣咁友善客套,細心體貼,小肥面前o既水杯同酒杯成晚都冇吉空過,實屬難得!由於六人立心要品嚐名菜,食盡蟹、龍蝦、魚翅同鮑魚,故已預先訂好名廚老闆以其得奬菜設計o既「大廚出馬冠軍宴」。六道菜好有文化地續一呈上,速度控制得好好,過程相當流暢。主廚頭盤:冠軍宴以四色頭盤揭開序幕,建議由右邊食吃,順序即麻香小象拔、涼伴野生小木耳、蒜香千頁黃瓜、花雕醉雞。麻香小象拔爽脆非常,香辣惹味中仍不失鮮甜,醒神又開胃,以半透明o既粉皮涼拌更覺清新。薄身o既涼伴野生小木耳同樣脆口,微酸o既調味都係咁醒胃。蒜香千頁黃瓜蒜味香濃,很是清爽。花雕醉雞芬芳醇美,肉質柔滑,最令細佬感動o既就係雞脾肉都去埋骨,因為坊間好多中餐廳已經唔會為醉雞起骨,感激師傅肯花時間喺依啲細節度。套餐每人其實只可以揀食「醉人蟹后」或「菌皇龍蝦球」,我地六個人就每款要三個,上枱後先各自分配。大廚出馬複賽冠軍之醉人蟹后:醉人蟹后以拼盤上,建議食用次序為牛油果蟹肉沙律、酒釀蛋白鱈場蟹鉗、大閘蟹粉法包。中間可以食埋碟上藍蝶花o既花瓣分隔味道不同o既蟹肉菜式。牛油果沙律入面o既蟹肉唔多,食落清涼微甜,好有西餐feel。雪白嫩滑o既鱈場蟹鉗鮮甜無比,每碟兩隻,啱啱好每人可分得一隻。配角酒釀蛋白蓬鬆輕巧,散發著微薄o既酒香,亦是一絕!金黃色o既大閘蟹粉法包香甜濃郁,完全唔溜滯,!大廚出馬初賽冠軍之菌皇龍蝦球:餐碟上o既龍蝦殼生動精妙,震撼o既外表已值滿分。如果龍蝦殼下不能食用o既麵粉團可以改選薯蓉或其他可食用o既食材,相信會更上一層樓。菌香洋溢o既龍蝦球爽口彈牙又多汁,可以話已達到煮龍蝦最高o既境界!墊底o既菌皇軟中帶脆,清香怡人,超級美味!北京黃湯鮑翅:鮑翅一梳梳上,份量睇頭都咁十足。黃湯濃醇甜美,唯一同桌o既大肥爸爸略嫌熱度唔夠辣口,希望翅品入口時可以更加滾熱辣。大廚出馬總決賽冠軍之慢煮鮑魚八寶乳鴿:八寶鴨就食得多,冇乜睇電視o既細佬都係第一次認識八寶乳鴿。乳鴿皮軟腍滑溜,皮下o既八寶餡料剁得夠碎,入口超爽超脆。八寶乳鴿唔算好溜,不過女士們就話一人一隻太多,三位男士們就每人食多半隻,似乎二人份量剛好係為情侶而設。因八寶乳鴿實在精彩細膩,反顯側旁o既慢煮鮑魚只能輪為配角。鮑魚滑就夠滑,不過個人覺得唔係咁夠腍,唔知係咪同慢煮法有關呢?!大廚出馬複賽冠軍之籠仔瑤柱鹹肉菜飯配龍井茶:得奬單尾o既賣相果然出眾,竹造籠仔及黑色o既小茶杯同具傳統中國風味。籠仔瑤柱鹹肉菜飯飯粒晶瑩濕潤,撈入o既菜粒量足,故越食越爽,飯面o既瑤柱乾脆香口,口感極為豐盛。小弟愚見,如果可以將鹹肉換成更為矜貴o既金華火腿,效果應可提升不少。三色甜品:甜品同頭盤一樣以拼盤上枱,套餐o既設計相當完整,建議由最淺色o既蛋白杏仁泡沫食起,食完中間件流沙金球,最後先食件薑汁千層糕。甜品蛋白杏仁泡沫明顯混入咗分子元素,師傅先以蛋白做出墊底o既蛋白凍,然後再將杏仁茶打成泡沫揤喺面。蛋白凍清涼甜滑,杏仁泡沫輕盈滋潤,進化咗o既組合新穎獨特,比傳統杏仁茶似乎有過之而無不及。金黃色o既流沙金球乾巧鬆軟,中間o既奶皇餡心熱力十足,且軟滑流心,甜美可口。薑汁千層糕外觀層次分明,入口亦夠煙韌彈牙,微辣o既薑汁有消滯之效,用作結尾當真最為適合。「大廚出馬」讓陳國強師傅由廚房走到幕前,令觀眾親証其超卓之廚藝。機緣巧合下,好少睇電視o既XO仔卻留意到報紙上o既報導,得知名廚贏取多項冠軍奬後,最近更榮升做老闆,以中菜為本,加入西方烹煮技巧及分子料理思維,開設咗新店「嚐悅」。肥肥家族最愛試新野,急不及待就即刻訂位,週一晚去品嚐「大廚出馬冠軍宴」。六道菜o既冠軍宴豐富美味,色香味俱全,真令人嘆為觀止;每位$880依個價錢有齊鮑魚、魚翅、蟹或龍蝦,個人覺得絕對抵食。「嚐悅」環境同菜式一樣潮氣洋溢,酒店級服務亦值得一再讚賞!飯後陳師傅仲毫無架子地續一跟食客握手傾談,問及大家o既飯後感想,態度極之誠懇,專業得令小弟感動,在此順祝陳老闆生意興隆,業務蒸蒸日上! 繼續閱讀
(以上食評乃用戶個人意見 , 並不代表OpenRice之觀點。)