紅磡最後的暑光 ﹗

奧志雷等級4 2019-05-17

129 瀏覽

隔離已經四間三餸飯，老闆您又玩埋一份，點搞呀？雖然味道質素係最高最好，不過係最貴既一間呢！竟然有機會永久取消出前一丁？那我以後食咩好呀？就連雞牛豬扒、蒸餸都有機會全部取消，早餐又跟隔隣齊齊賣炒粉麵同三文治，如何競爭？可能以後都無全紅磡煮得最好食既出前一丁喇，合記只供應凍冰冰的炒麵、莜麵、上海麵、米粉、河粉、腸粉。凍檸樂，實在太醉，再來回魂 coke 特效解藥。熱齋啡，用既滾水太熱，使到咖啡變酸，熱到入唔到口，放陣先飲。應該用返奶茶既溫度就差不多，剛剛燙嘴又飲到落肚。熱奶茶，順喉香醇，貫徹始終不變的幼滑香濃奶茶，加包半糖最合我口味。豉油皇炒莜麵，清爽豉油香，剛剛好不過咸不混濁不油膩，乾身嚥韌，加兩滴辣油更滋味。豉油皇炒河粉腸粉幼麵莜麵，老闆極客氣比個四併早餐我試。凍就係凍左少少，而且全部豉油皇味道，好采都好好味，食得過。河粉不油膩完整不散筲筲，可以一氣呵成處理掉，仲要係我最愛的特幼河粉啊 ﹗腸粉滑溜溜，最怕乾硬鞋烚烚食糕的感覺。幼麵莜麵同樣高質，富彈性不濕腍，可口大啖啜。餐腿蛋治，半份餐腿蛋治，嬸嬸我思意係要一塊麵包，唔要兩塊麵包呢，並不是連餐腿蛋都減半喎，笑死我，唔夠飽啦。軟軟的白麵包，有濃厚的麵粉香氣，三餸開心大啖食，咸香油香蛋香啖啖肉，滿足。洗大左訓身買六合彩唔中，捱住麵包先啦。雙太陽蛋出前一丁，老闆自己做埋水吧親自下廚話出前一丁返黎喇，有丁麵食喎，餐腿蛋您想食咩呢？要爽麵定腍麵呢？實在盛情難卻，我其實唔太肚餓，就試試雙太蛋丁要爽麵！雖然生產期有點長，慢工出細貨，煮得蠻不錯，雖然不像以前水吧叔叔猛火烹煮十足火喉，住家的味道都非常可口啊！湯濃郁，麵爽滑，入味熱騰騰，撈埋蛋漿無得頂！腸仔火腿太陽蛋出前一丁，麻油自己落？老闆全部落埋得喇。老闆：湯會否太咸呀？可以加滾水喎。雷：點會呢，我都食開重口味，見我仲要加辣椒醬啦。老闆：有意見真係要講喎，會多多改進。水吧叔叔已經無做，現由老闆親自操刀下廚。腸仔整作需時，食住腿太先，免得麵條浸得太腍，老闆有留意喎，真細心。火腿有煎過特別香口，有 heart，真心要讚。大部份茶記都是馬虎求其掉塊凍冰冰火腿係湯麵上面就算出貨，諗起都可怕 ﹗麵條爽滑，已吸收足夠湯汁程亮麗淺啡色閃閃發光，每啖都充滿濃湯味道，不像那些滾水白烚麵，再撈湯粉，湯還湯、麵還麵，極度討厭如此煮麵的啊 ﹗壓軸出場的腸仔，爆熱噴煙地出場，微脹滾熱辣，一咬飛汁，正到震呀 ﹗我自己煎腸仔都鍾意慢煎到發脹先食，肉質特別爽彈，肉汁特別兇湧架 ﹗淨食丁麵正，蛋醬撈麵正，辣醬撈麵都正。雙餐肉太陽蛋出前一丁，即煎餐肉特別鬆軟滑溜，厚厚不過薄，不會乾乾似紙皮，油香非凡。慢煮麵爽湯濃，撈蛋漿齊齊啜大大力，開心叫好。雙腿太陽蛋出前一丁，火腿略有煎過，特別美味帶焦香，迫出火腿原始味道，誠意可加。爽彈麵條綑著蛋汁蛋白大啖索正到震，停不了地吸啜，連湯帶蛋齊齊捲到舌上打滾再直搗五贜，暢快得無與輪比。雙太陽蛋沙嗲牛肉出前一丁，甜甜的沙嗲汁撈撈湯更可口，鮮牛微韌散發牛肉味道，原汁原味不用鬆肉粉已合格。雙太陽蛋五香肉丁出前一丁，丁麵腍劈劈又粉口既？唔係轉左一早烚定放係度架麻？難食。五香肉丁好多粒呢，瘦肉多而肥肥少，有肉食真好。有新到辣椒油，無味既？五香肉丁辣汁更辣。腸仔太陽蛋沙嗲牛肉出前一丁，點解要咁做？多年來都即叫即煮，依家入口死屍的味道，發賬粉口腍劈劈，無麵味淡茂茂！下次再係咁就要說再見，我要食新鮮丁麵！好想好想食辣，辣能給您一點開心的感覺﹗狂落辣椒油，淨油無渣而且微辣，最安全唔洗驚。腸仔太陽蛋雪菜肉絲出前一丁，我要新鮮出前一丁呀！再次給我粉腍無味出前一丁，唔食煮定既死屍呀，好難食！幫襯您六年，唔好改、唔好懶好麻？雙太陽蛋豬扒出前一丁，食左幾次死屍丁麵，今次直接跟嬸嬸強調我要食新鮮出前一丁啊 ﹗果然返來了，天淵之別，天使與地獄﹗爽彈麵條，濃郁湯汁非常好，丁麵掛上蛋漿瘋狂地吸啜，好食到忘我不能自控。豬扒嗅香草沒有了，略硬有趙頭，淡淡醃味不過份。青紅蘿蔔湯，無添加夠純情，熱辣辣好好飲，住家的味道。魚香茄子麻婆豆腐生炒排骨飯，每款都還暖暖地喎。魚香茄子，茄子軟軟棉棉滑溜溜，不硬不苦索盡辣汁肉汁，非常美味泊得住大埔鹿鳴居喎，而且食得到咸魚粒，散發陣陣酥香，唔撈飯食點得架，格外美味 ﹗麻婆豆腐，溫柔的味道只香不辣有點油膩，硬豆腐不喜歡，幸好帶著濃濃豆香，淡紅咸香汁液夾著肉鬆豆腐躺在白飯上品嚐，仍是蠻可口的。生炒排骨，不太乾不太鞋剛剛達到底線，外微脆裡面嚥韌，茄汁濃酸淡甜夠開胃，真心炸得出色。三餸售價 $31 蚊送例湯或汽水，凍飲加 $7 蚊。豉汁排骨滷水雞翼蒜蓉菜芯飯，三餸連飯都全部凍冰冰。凍蒜蓉菜芯，多汁多水有菜甜味，有嫩有爽。凍豉汁排骨，醃味咸濁，質地鞋韌，斬得太細粒食得唔舒服。凍滷水雞翼，肉乾帶鞋，味道混濁陰沉，斬到碎濕濕極討厭﹗骨碎多，入口骨杉杉，所有肉汁已經流失。繼續閱讀