影片
相關文章
今日來到西九高鐵站的美食廣場，網上新聞介紹有唔少野食，所以順路一試。自助買餐，十分方便。88蚊唔平唔貴。買完餐就拿機等震，未坐定已經震（因為少客），去取餐處拿餐，餐具自助。這是另一半選的海南雞飯，望落正常，食落非比尋常，飯是凍的，湯是微涼，另一半一試已經飽晒，只食了幾舊雞便算，雞肉唔錯，去骨，但已經救唔番，美食廣場只有兩三枱客，唔明點解做得咁差。相信無下次。而小弟食的焗飯在另一則食評，有興趣可以去睇睇。
繼續閱讀
又到返工食西九龍站food court嘅日子，今次夜晚6點食，食客唔多，食物等候時間唔算長，好過食lunch同人逼。今次食咗星洲喇沙湯米粉，由於有好幾個同事都話好好食成日食，終於可以試一試佢係咪真係咁好食。套餐$68,員工優惠85折後$57.8,包一杯熱飲，如果好食嘅話價錢都尚可以接受，以呢個food court平均價位嚟講都算係平。碗米粉賣相都幾吸引，啲餸都算俾得足，有芽菜、兩舊魚腐、兩粒魚蛋、兩隻蝦同半隻糖心蛋，面頭有少少芫茜，如果絕對謝絕芫茜味嘅朋友就記得要走芫茜，不過自己就覺得喇沙嘅味濃，有少少芫茜味中和下都幾香。本身唔鍾意食芽菜，如果唔想嘥係應該走芽菜嘅。未食已經聞到碗湯好香椰汁味，食落個湯好濃好香，不過米粉本身唔係好索湯，要每啖米粉都飲一啖湯先食到個喇沙味。本身亦都唔係話好鍾意食米粉，如果可以換做油麵/公仔麵/河粉/檬粉就可以索多啲湯，再好食啲。本身唔係太食得辣，食食下都會流鼻水，但可以接受嘅，不過要食得專心啲，如果唔係好容易濁親。隻蝦都算新鮮，爽得嚟唔係好似酒樓泵水泵到漲晒個啲。魚腐同魚蛋都幾彈牙。最值得一讚嘅係佢嘅溏心蛋，真係好溏心，索咗啲喇沙湯不得了，如果可以有一隻而唔係半隻會更加開心。唯一唔好嘅就真係太油，真係唔可以成日食，不過喇沙都好難唔油嘅，如果有心機可以撇走晒啲油先食。
繼續閱讀