眨吓眼嚟到4月啦,天氣回暖可以去郊區玩吓喇。懶得上山下海,可以去東涌揀間餐廳Chill吓,食完仲可以去海邊睇吓景,有時仲會睇到飛機起飛降落,小朋友一定鍾意。
東涌沿海就有呢間黎巴嫩菜“Maison Du Mezze”。有即開生蠔食之餘;仲有傳統黎巴嫩式木炭燒烤,用真·木炭爐燒製一系列肉扒、海鮮。
一班人嚟可以揀傳統黎巴嫩式木炭燒烤烤肉拼盤/海鮮拼盤,食肉獸在場就必食一公斤斧頭扒!! 炭火燒到外層焦脆,切開仲有滿滿肉汁好粉嫩㗎。
![](https://www.openrice.com/userphoto/CMSContent/0/8G/001O7430AFAF0DB3DE5B4Aj.jpg)
“Maison Du Mezze”充滿異國度假風。
![](https://www.openrice.com/userphoto/CMSContent/0/8G/001O758C503E08559B5D94j.jpg)
有即開生蠔、木炭烤肉及海鮮食。
即開新鮮生蠔 $258(6隻)、$498(12隻)
“Maison Du Mezze”嘅擺盤好靚,好啱嚟東涌郊遊影相嘅心情。全部即開生蠔都係法國飛機運到,蠔身滑溜,一啖滑入口有滿滿海水味。
![](https://www.openrice.com/userphoto/CMSContent/0/8G/001O76B21A47DB5C7EFE26j.jpg)
由法國直送,即開新鮮生蠔。
Hot Mezze | 炭烤魷魚(Grilled Squid)
呢度係由黎巴嫩人開設,所以味道、食法都好地道。當地人飯前會食啲Cold Mezze、Hot Mezze先。私心推介好Q彈嘅炭烤魷魚,配埋檸檬番荽醬幾開胃。
![](https://www.openrice.com/userphoto/CMSContent/0/8G/001O7725282A37178DA509j.jpg)
黎巴嫩人傳統會食前菜,推薦Q彈炭烤魷魚。
主菜 | 烤原條鯧魚 配慢煮香料飯(Fish Kabsa)
中東菜嘅香料飯一向好出名,用蒜頭、肉桂、丁香等多種香料煮製,單單食啖飯已經好豐富。今次配埋原條鯧魚,食嗰陣輕輕叉開條魚就可以連埋香料飯一齊食,味道鮮甜豐富。
烤鯧魚外皮都燒得幾焦脆,內裡魚肉Keep到細膩嫩滑。好鍾意佢好有魚味,食得出條魚夠新鮮。
![](https://www.openrice.com/userphoto/CMSContent/0/8G/001O78B46971407640BD94j.jpg)
好出名嘅中東香料飯,加埋烤鯧魚鮮甜豐富。
【傳統黎巴嫩式木炭燒烤】
素食者都可一嚐炭燒啖啖肉
黎巴嫩人真係好鍾意食燒烤,佢哋嘅炭燒肉串、燒海鮮真係必食!! “Maison Du Mezze”亦秉承傳統特設木炭爐,有炭燒一公斤斧頭扒、炭燒肉眼牛扒、炭燒澳洲羊扒、炭燒龍蝦外,素食者亦可揀選炭燒植物素肉,相當貼心。
![](https://www.openrice.com/userphoto/CMSContent/0/8G/001O795F5FCE70D89E0706j.jpg)
真·木炭燒烤,即燒龍蝦勁惹味!
![](https://www.openrice.com/userphoto/CMSContent/0/8G/001O7A89DF0BEE8C03DF54j.jpg)
炭烤海鮮拼盤有半隻龍蝦、2隻老虎蝦、4隻燒蠔、盲曹魚、八爪魚。
烤虎蝦(Grilled Tiger Prawns)
只想淺嚐海鮮,呢道烤虎蝦配檸檬大蒜醬都好好食!! 用叉一拮就成隻蝦肉出咗嚟啦。
![](https://www.openrice.com/userphoto/CMSContent/0/8G/001O7B56EEE19B6A2B8749j.jpg)
烤虎蝦唔使自己剥殼,輕輕一拮就成隻蝦出嚟啦。
烤肉拼盤(Maison Du Mezze Ultimate Mix Grill)
每次嚟都要食嘅烤肉拼盤!! 有烤雞肉串、烤羊肉串、烤雞肉卷、烤羊肉卷。炭火瞬間封住肉汁,一咬落去就聞到好重炭香,然後成個口都係好香嘅肉味㗎!!
![](https://www.openrice.com/userphoto/CMSContent/0/8G/001O7C6558B645824884C1j.jpg)
必食烤肉拼盤!炭香+肉汁一流。
Maison Du Mezze
地址: 東涌怡東路9號灣景薈地下G10號舖
電話: 23300131