超美玫瑰仙氣甜品! 情人節食盡5道打卡菜
“Lab Eat” 擅於設計唯美料理,今年推出情人節5道菜套餐,由頭盤生蠔開始已經好精緻,甜品更配上冷凍玫瑰散出仙氣,成個用餐體驗都好有儀式感呀。

2月份正值尖沙咀店重新設計裝潢,準備以全新面貌同大家見面㗎,值得期待。所以暫時只得旺角店可以食到情人節套餐,記得盡早訂位呀。
旺角店以木系、藍色為主調,約會氣氛輕鬆。

情人節晚餐$1,888/2人

頭盤
法國生蠔及黃金魚子醬
作為第一道菜,即開法國生蠔擺盤已經好吸睛。生蠔冰盤配以高腳架放上2款魚子醬—鮮味濃郁嘅黑魚子醬、較重海水味嘅黃金魚子醬。魚子醬各有特色,撞上生蠔有唔同驚喜。
即開法國生蠔好肥美。

配上2款魚子醬撞出驚喜。

頭盤
北海道牡丹蝦刺身薄片及海膽泡沫·火烤北海道帶子薄切配白松露油
生蠔過後,頭盤環節陸續有嚟~日本直送牡丹蝦盡顯大廚刀功,將牡丹蝦切至紙咁薄,更易品嚐到蝦肉鮮甜。下方配上牡丹蝦頭燒香再熬製嘅蝦油,加埋海膽泡沫鮮甜有層次。
北海道牡丹蝦刺身薄片,好考大廚刀功。

另一前菜採用日本新鮮帆立貝,切片後以日本火炙逼出鮮甜貝味。最後配上蛋黃醬、意大利白松露油,入口甘甜,後續滲出惹味菌香。
火烤北海道帶子,加咗蛋黃醬勁開胃。

熱湯
北海道玉米濃湯·西西里島海鮮番茄湯
北海道玉米濃湯以粟米芯、雞肉熬出上湯精華,再用牛油將粟米炒至焦香,最後放入上湯熬足兩個鐘後打蓉而成。熱湯工夫繁多,只為煮出香甜飽滿味道,唔使特別調味已經好好飲。
北海道玉米濃湯,用盡北海道粟米熬製好香甜。

另一款海鮮湯就以3種蝦熬製,先燒後煮逼出蝦味。配上西西里島特產番茄,味道比一般番茄湯更濃郁,好突出到海鮮鮮味。
估唔到熱湯有咁多海鮮!

主菜
半熟西班牙帝皇紅蝦及法式薯蓉·美國頂級牛柳及意大利冬季黑松露
海鮮主菜有極品西班牙巨型紅蝦,蝦味出名極濃郁!以高溫將紅蝦煮至4成熟啱啱好。菜式配菜都好有心思,特別將甜蕃薯切得薄如紙,再捲入鴨油薯仔一同炸香,口感香脆又有鴨油好惹味,同時伴有煙燻美國蘆筍解解膩。
西班牙帝皇紅蝦好大隻,連配菜都好有心思。

另外一主菜就將美國極級牛柳炭燒切片,一上枱就見到牛柳粉紅軟嫩,蘸上牛尾熬製嘅黑松露醬汁,肉味更濃!伴碟嘅薯蓉都唔簡單,係燒牛骨髓撈入薯蓉,入口綿滑又會慢慢滲出牛味好驚艷。

最後更有低溫慢煮意大利大蘑菇,完全保留到大蘑菇原始菌香,估唔到一道主菜有咁多心機位。
美國極級牛柳好粉嫩,醬汁係自家用牛尾熬製㗎。

甜品
伯爵紅茶玫瑰花·金朱古力球及番石榴雪葩
“Lab Eat”甜品一向好IGable,情人節甜品依然靚得夢幻。伯爵紅茶玫瑰花就利用英國名貴伯爵茶,製作玫瑰花造型奶凍,配上風乾紅莓酸酸甜甜好夾。
玫瑰花造型奶凍好精緻。

比利時朱古力金球上枱時好神秘,仲會有冷凍玫瑰散出仙氣~原來朱古力球入面,係自家製番石榴雪葩嚟㗎。
冷凍玫瑰花散出仙氣。

金朱古力球入面係番石榴雪葩。

【特調雞尾酒】
調酒師為浪漫日子設計2款雞尾酒。“Romantic Cross” 以荷蘭雞蛋酒做基調,配上新鮮士多啤梨果蓉、幼滑鮮忌廉、日本牛奶,創造出儼如飲得嘅士多啤梨慕絲蛋糕,甜而不膩、容易入口。

另一杯“Chivalry” 則以日本純米大吟釀為基酒,配上自家陳釀橘子風味果汁、梳打水,再配以蛋白做出綿密口感。入口有獨特果香同氣泡感覺。
(右)“Romantic Cross”、(左)“Chivalry”

LAB EAT Restaurant & Bar (T.O.P This is Our Place)
地址: 旺角彌敦道700號T.O.P. This is Our Place 5樓502號舖
電話: 23525699
* 資料由客戶提供