華麗宮廷風成都麻辣火鍋店 最新牛氣衝天食勻六大牛肉!
愛辣同愛牛之人有口福啦!位於北角嘅「九龍坎麻辣火鍋」最近推出「牛氣衝天」拼盤,一次過可以試到唔同種類嘅牛肉。餐廳之前就以正宗成都麻辣火鍋同多元化嘅配料選擇而獲得唔少好評,加上中式宮廷風裝修,實力與顏值兼具!

華麗氣派 古代宮廷風裝修
餐廳佔地6,000平方呎,枱同枱之間都有足夠空間,想私隱度再高啲更有多間VIP房,三五知己共聚更盡興。裝修擺設都走中式宮廷風,古色古香、氣派十足,好似從現代都市穿越咗去古代咁!
餐廳以中式宮廷為裝修主題,古色古香又有氣派

正宗成都風味!手炒牛油紅鍋
火鍋嘅靈魂絕對係湯底,餐廳主打嘅招牌牛油紅鍋顧名思義係用牛油起鍋,加入人手炒香嘅自家麻辣膽而成。麻辣膽選用從大陸各地搜羅最靚嘅香料,例如古代皇帝御用嘅漢源貢椒,亦有辣椒、豆瓣、陳皮、桂皮、茴香等27款材料,其中5款更係「秘而不宣」嘅重要食材,正正就係呢5款材料先可以彰顯正宗成都風味,令其麻、辣、香只此一家。食落香麻濃郁帶後勁,辛香層次豐富,唔死辣唔嗆喉。唔太食得辣嘅朋友都唔使擔心,有四個階段嘅辣度任揀。
經典鴛鴦鍋(招牌牛油紅鍋+任選蕃茄/菌湯/高湯鍋)

牛魔王必食 牛氣衝天拼盤
對香港人嚟講,打邊爐點少得靚牛肉呢?餐廳推出嘅牛氣衝天就最啱各位牛魔王,或者心大心細咩都想試嘅你。圓盤放滿六款精選牛肉:日本A5、澳洲M9、美國牛頸脊、美國牛小排、美國雪花牛舌、美國和牛。當中以日本A5和牛嘅油花最多,脂香豐厚。澳洲M9和牛嘅特色係肉味同脂香平衡,而美國牛則勝在牛味豐富。
牛氣衝天

超過80款火鍋配料 精選肉類+海鮮推介
配料選擇從牛、羊、海鮮,到四川常見嘅小郡肝、現炸酥肉等應有盡有。而且餐廳非常貼心,每款配料都寫上建議涮燙時間。喜愛牛脂香氣或者入口即溶口感嘅話大推A5和牛,A5係日本和牛當中最高嘅等級,油花分佈細密均勻,口感軟嫩柔滑、肉汁豐富!
A5和牛

羊肉亦係四川火鍋常見配料,呢度嘅高鈣羊肉紅白相間、肥瘦適中。輕灼10秒熟度啱啱好,羊肉味香但羶味唔過重,建議配招牌牛油紅鍋,風味更正宗。
高鈣羊肉

餐廳唔單止照顧牛魔王,亦有為愛海鮮嘅朋友推出海鮮3人餐。當中會有時令生猛海鮮,當日係鮮蝦、珊瑚蚌、鮑魚同日本廣島蠔。蝦同鮑魚都食得出非常新鮮,肉質扎實彈牙。日本廣島蠔亦有鮮甜蠔味。
海鮮3人餐

巴沙魚已預先去骨,食落啖啖肉唔使驚有骨特別爽。因為切得比較厚,建議灼2分鐘,更可以品嘗到厚實鮮嫩嘅肉質。
湄公河巴沙魚

成都特色火鍋料 必食新鮮毛肚
毛肚即係牛柏葉,輕灼10秒就食得,稍微入味而且最大保留其爽脆有嚼勁嘅口感。而且完全無任何內臟異味,抵讃!
精品鮮毛肚

新鮮雪白嘅鵝腸用冰鎮保留脆度,師傅亦已事先清除腸裡面嘅多餘肥膏。記得同樣輕灼10秒就食得,咁樣入口最為鮮滑爽脆。
冰球鵝腸

小君肝則為雞腎,用薑水、花椒粉、孜然、紅油等先醃至入味,再串成一串串方便食。肉質爽脆、香辣帶麻。
串串小君肝

蔬菜方面可以一試農家筍片王,竹筍切得厚薄適中,食落鮮嫩帶脆。人數唔多就可以點蔬菜拼盤,分量適中又可以食到唔同蔬菜。
農家筍片王

蔬菜拼盤

可以到自助調料吧,配搭出適合自己口味嘅醬料

裝修以大紅加上金色為主色調,卡座空間感充足


九龍坎麻辣火鍋
地址: 北角英皇道395號僑冠大廈地下28-31號舖
電話: 39564388
* 資料由客戶提供