異國風情人節晚餐! 黎巴嫩菜食M5和牛
想有個異國氣氛嘅情人節約會,呢間“Shahrazad Lebanese”放滿彩色咕𠱸、阿拉伯花紋裝飾,係香港少有黎巴嫩人開設嘅家鄉菜,味道正宗又有驚喜。

室內大梳化位色彩繽紛,影相好靚~想浪漫啲亦可以揀半露天座位,望住紅磚牆大館又係另一種氛圍。
室內大梳化位色彩繽紛,以阿拉伯花紋為主。

半戶外座位眺望紅磚大館,係另一種浪漫氛圍。

【情人節套餐】黎巴嫩人主理 全外國食材!
套餐有前菜、熱湯、主菜2選1同甜品。外籍大廚只引入外國高質食材,保持料理風味。因為黎巴嫩人好著重食材天然味道,特別係牛肉、海鮮都好香濃,後續又有多層次香料味。
情人節套餐$588

前菜·Kibbeh Nayeh
好有阿拉伯風味嘅牛肉他他,將牛肉碎、西芹沙律加檸檬橄欖油醬,以清爽配料突出原始肉味。

熱湯·Shorbat Tamatem
熱湯係煙燻番茄海鮮湯,番茄味濃輕酸,飲完一啖會有種煙燻香慢慢喺口中散發好特別。另外估唔到熱湯會有咁大隻蝦,用黎蘸湯飲更加鮮味。

主菜2選1·Samak bil Toum/Lahma with Batata
Samak bil Toum係香煎無鬚鱈魚,相比一般鱈魚魚油更豐富、魚肉肥美,輕輕煎香已經好好食!配埋蒜蓉牛油醬好香濃。

情人節始終想鋸吓扒,可以揀Lahma with Batata有M5和牛里脊肉。牛背位好重油香,配埋自家牛骨煮製嘅牛肉汁更突出牛味。

甜品·Znoud el Sit
上菜時估唔到呢道係甜品,原來係薄脆酥皮包住新鮮忌廉。一咬開酥皮即刻爆出忌廉,味道簡單甜蜜。

【半自助Brunch】
下晝想食得豐富啲,呢度Brunch時段有半自助餐。自助區有多款黎巴嫩Mezze前菜、沙律;並有自選蛋料理、熱食、甜品,另有多款料理追加㗎。

Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242
* 資料由客戶提供