去澳門旅遊又點少得夜生活呢？除咗留喺酒店或賭場玩樂，去開到深夜兼發掘當地人都推介嘅美味宵夜都可以係行程之一！今次同大家精選4間開到深夜嘅名店，無論係想食澳門經典美食水蟹粥，惹味無比嘅牛雜又抑或係食完甜入心嘅糖水店都齊備！
作為澳門特色美食，難得同一班親朋好友過大海點可以唔食！講緊遠近馳名嘅一哥水蟹粥，搜尋器一Search澳門+宵夜兩個關鍵字必定有佢大名！佢哋每日由夜晚六點開到凌晨兩點半，每檯必叫嘅鮮甜綿滑水蟹粥有多種份量選擇，大窩4隻蟹、中窩3隻、小窩2隻，亦可以選擇加帶子、花甲、生劏田雞。另外呢度嘅小菜同小食都有唔少人推介，當中又以乾炒牛河、椒鹽粟米同腸粉最多人提名。
連續多年榮獲米芝蓮必比登推介、開業逾20年嘅老記粥麵隱身於住宅區中但仍然吸引到唔少人慕名而來嘅原因係咩？答案係呢度供應嘅傳統粥品、麵食同廣東小炒質素穩定且價格合理，深夜嚟呢度食碗暖入心嘅水蟹粥、田雞腿煲或現點現煲的豉汁風鱔煲仔飯特別滿足！
當地人都成日心思思想食嘅宵夜係咩？係威記牛什小食！呢間牛雜店創於1948年，由噴水池牛雜車仔檔後人第三代後人主理，現時位於永樂戲院附近，只設外賣，其受歡迎嘅程度係幾乎晚晚都有人排隊！牛雜可自選款式或直接按份量叫，佢哋成功將味濃嘅靈魂醬汁炆煮到牛舌、牛腩、牛筋、大腸、蘿蔔等食材十分入味，肚餓嘅仲可以加麵底，食得辣嘅記得加埋咖哩汁！
相比起串燒、夜粥呢類鹹食或主食，更喜歡臨瞓前食一點甜？澳門半島與氹仔都有分店、間間都開到凌晨1點嘅糖朝盛世幫到手！佢哋嘅甜品以芒果同榴槤為主角，經典嘅楊枝金撈、獲獎作品原隻粒粒芒果椰皇子、爆料榴槤班戟一定唔會令果控們失望。另外佢哋亦有中式糖水、手工芋圓等選擇，堂食店亦有意大利麵、三文治同小食，無論係幾多人齊齊坐低都一定有嘢啱食！