你可能唔知今期韓國興食忌廉撈烏冬，但你一定知本土大熱嘅阿華田飲品呀甜品呀。如果可以先食一碗忌廉芝士烏冬，再加埋阿華田忌廉窩夫就完勝啦!
大熱韓國忌廉烏冬 進化版在港首登場
泡菜味忌廉芝士！
銅鑼灣呢間Seoulmate Café新推出嘅2款忌廉撈烏冬又點會得忌廉咁簡單，唔單止係忌廉，仲要係忌廉芝士。呢款「泡菜蕃茄忌廉芝士烏冬配煎三文魚」，上面嘅忌廉芝士加埋泡菜汁一齊打成，所以有粉橙色效果，亦有淡淡的泡菜香味，然後仲好花心機將忌廉芝士唧係用泡菜蕃茄炒嘅烏冬上面，驟眼睇落好似蛋糕咁靚。再撈埋泡菜蕃茄烏冬，味道酸酸辣辣，又有忌廉芝士嘅濃郁，十分醒胃，烏冬滑滑溜溜，比起普通忌廉烏冬豐富得多呀！
自家制嘅忌廉芝士加入泡菜汁打混，制作需時，所以限量供應㗎，要食就趁早喇！
忌廉芝士上面嘅香煎三文魚都好有驚喜，煎到魚皮脆卜卜之餘，咬開仲有微微三文魚油滲出，夠晒魚香肉嫩。
香蒜洋蔥味忌廉芝士！
第二款口味就係「香蒜洋蔥忌廉芝士烏冬配煎三文魚」，呢款就將香蒜、洋蔥打混入忌廉芝士，忌廉芝士唧係以香蒜丶洋蔥同蜆肉炒嘅烏冬上面，撈理一齊食，鍾意蒜香洋蔥嘅話揀呢款就啱喇，尼款都配有香煎三文魚㗎。
滑溜香蒜洋蔥忌廉芝士撈烏冬同煎三文魚一齊食，真係有種幸福感！
秘制韓式甜辣醬 焗厚肉豬肋骨
專登嚟食韓國fusion嘢，齋食烏冬梗係唔夠喉啦，呢度仲有多款fusion韓食。想食得滿足，編輯就推介呢道「韓式甜辣醬烤豬肋骨」，豬肋骨係用韓式秘制醬汁醃到甜甜辣辣，再用焗爐焗到入晒味。而且只係微辣，好多女仔都食到㗎。
烤豬肋骨仲配有2款清新韓式前菜，可以一邊食肉、一邊解膩。
韓式炸雞 都可以Fusion四川
想多啲新鮮感嘅話，一定要提呢道炸雞。驟眼睇只係韓式炸雞，其實大廚加咗四川元素－花椒油、花椒粉、花椒粒、乾辣椒等埋鍋炒，食落有韓式炸雞嘅脆口肉嫩，但後續會有四川嗰種麻麻辣辣味道，可以話係韓國、四川Fusion菜呀！
夏天Go Fresh 特選韓式甜酸汁
想食得清清哋，就可以試「炸軟殼蟹浸游酸甜西柚沙律」，加咗西柚同韓式甜酸汁，酸酸啱晒夏天食，夠醒胃。
「阿華田窩夫大戰燒阿華田棉花糖」
呢排阿華田曝光率好高，成日Crossover唔同甜品、嘢飲，今次Seoulmate Cafe嘅麻糬窩夫都配上自家制阿華田忌廉，棉花糖灑上阿華田粉然後烤脆，加埋阿華田餅同雪糕，阿華田粉絲一定唔可以錯過呀！
韓國K爆米餅遇上朱古力
K爆米餅其實係韓國傳統小食，將米粒爆脆再壓成餅，口感鬆脆唔膩。今次將米餅淋上厚厚嘅朱古力醬，味道濃郁唔偏甜，配埋焦糖香蕉同雲呢嗱雪糕食就有多重口感。
韓國荷蘭寶寶班戟配士多啤梨
荷蘭寶寶班戟係一道韓國流行嘅甜品，最吸引就係充滿蛋香嘅班戟，咬落軟綿綿又有少少煙韌，係即叫即焗熱辣辣先有呢個效果㗎！食嘅時候，記著配埋士多啤梨、朱古力醬同雪糕呀。
仲有多款首創嘅特製飲品，編輯就鍾意伯爵茶黑糖啫喱夠咬口。
（左起）
伯爵茶黑糖啫喱黑焦糖忌廉：伯爵茶柔和清新，加上粒粒黑糖啫喱同上層黑糖忌廉同燒焦黑糖，味道豐富。
紫薯拿鐵黑糖忌廉：上面係用韓國黑糖打成嘅忌廉，下面係紫薯拿鐵，會飲到軟滑紫薯蓉，當飯後甜品都得！
抹茶紅豆拿鐵芝士奶蓋：上層係自家製芝士奶蓋，比一般奶蓋更幼滑、有芝士同奶香。
（左起）桑格莉亞 (Sangria)白葡桃酒：白酒加入葡萄同桃汁，係清甜版嘅Sangria。
熱情桑格莉亞 (Sangria)雜果酒：以經典的Sangria為基調，加入熱情果和雜果果肉。
Seoulmate Cafe
地址: 銅鑼灣駱克道491-499號京都廣場4樓
電話: 21046788