一向玩開港式幽默嘅Mamaday，創辦人喺2018年台灣回流返港後，喺香港開設3間分店，當中2間尖沙咀分店Mamaday、GoodDay BadDay MamaDay；同埋銅鑼灣駱克道新址分店Wish You A Mamaday。
Mamaday舊址於去年12月停業後，今年6月終於喺銅鑼灣駱克道重開啦～區內分店只此一間，希望各位食客繼續支持呀！
新店繼續由老闆親自設計，實踐社會責任用多種環保材料打造。有溫馨木系小屋空間；又有掛滿歐式窗框嘅怪誕牆，甚至經典披頭四Abbey Road竟然行到上條柱？細心搵嘅話，真係每個角落都有驚喜。
【唔乾嘅乾式熟成】英國熟成28天西冷牛扒$268
Mamaday一向出名裝潢玩味、食物高質，新店更引入牛扒界天花板—乾式熟成牛扒Dry-aged Beef。
「乾」一字望落平凡，其實內裡大有「乾坤」。頂級西冷會靜置於恆溫0至3°C及85%濕度嘅熟成櫃中，並於紫外線殺菌器下經28日乾式處理。牛肉天然酥素會自行分解牛肉蛋白質、脂肪及碳水化合物令肉質更嫩滑，同時鎖住牛肉水分做到又嫩又juicy。食落牛味特濃，油花豐腴㗎。
乾式熟成牛扒Dry-aged Beef絕對唔乾，肉味特濃又軟嫩。
【鋸扒+芝士火鍋?】瑞士名物芝士火鍋$298
踏入12月，天氣終於開始凍喇～用瑞士名物芝士火鍋迎接冬天最有儀式感。芝士火鍋有滿滿意大利芝士，超級拉絲香濃！
配料份量亦大滿足，最搶眼一定係鋸扒份量嘅原塊美國安格斯西冷，加埋擺到滿嘅虎蝦、薯菜，拮住佢哋放入芝士鍋中瘋狂拉絲啦。
瑞士名物芝士火鍋，迎接冬天有儀式感。
意大利芝士好濃郁，充滿幸福感。
大份量配料，可以瘋狂拉絲啦。
【食回本意粉】超級污糟大大條墨魚汁意粉$158
黑過墨汁嘅墨魚汁意粉，係真·新鮮墨魚汁煮製，黑得嚟仲有鮮味㗎。配埋原條西新西蘭魷魚、香脆軟殼蟹，Q彈x香脆雙重口感。
超級污糟大大條墨魚汁意粉，用真·新鮮墨魚汁煮製，黑中帶鮮。
【銅鑼灣限定】香辣蟹肉白酒鮮蜆+2杯白酒$198
平時飲杯白酒起碼5、60蚊，今次銅鑼灣店限定食蜆再送2杯白酒，只係$198絕對超值。
特別揀選本地白蜆，新鮮清甜又有海水味。食蜆嗰陣，仲會食埋絲絲越南蟹肉，鮮得有層次配白酒一流。
銅鑼灣限定優惠！食蜆送2杯白酒，CP值極高。
焦糖脆脆窩夫$90
窩夫外脆內軟，連埋海鹽雪糕一齊食都keep到鬆脆!! 仲有自家製焦糖脆脆好卜脆香甜，女生一定鍾意。
焦糖脆脆窩夫，連埋海鹽雪糕一齊食都好鬆脆。
【創作飲品】
Kinder Coffee
Wish You A Mamaday飲品一向係打卡位。最玩味一定係童心爆滿嘅Kinder Coffee，用童年回憶Kinder榛子配搭咖啡，最後喺奶蓋放上Kinder朱古力，小朋友同大人都會鍾意。
童年回憶Kinder榛子，估唔到同咖啡咁夾
荔枝烏龍茶
水果茶選擇，就有呢杯荔枝烏龍茶。烏龍茶濃得恰到好處，每啖都飲到清新荔枝果蓉。好鍾意真·荔枝、肉桂條嘅點綴，真係食到好爽甜嘅荔枝，又聞到好香嘅肉桂味。
荔枝烏龍茶有啖啖荔枝果蓉，仲有肉桂香味。
The Sun Set
女仔想飲雞尾酒又唔鍾意濃酒味嘅話，呢杯The Sun Set就啱喇。用新鮮西柚、Tequila調配出漸變日落顏色，酒味略帶酸甜好易入口。
用新鮮西柚、Tequila調配出唯美日落顏色。
Magic Bloom
身為野格利口酒fans，呢杯Magic Bloom係必試系列。
為野格利口酒fans而設嘅Magic Bloom。
Wish You A Mamaday
地址: 銅鑼灣駱克道491-499號京都商業中心10樓
電話: 39967380
Mamaday
地址: 尖沙咀加連威老道29號信基商業中心2樓
電話: 23456856
GoodDay BadDay MamaDay
地址: 尖沙咀加連威老道27-27A號嘉榮大廈地舖及1樓
電話: 94241449