香港真係臥虎藏龍之地，原來杜拜、阿布扎比皇宮廚師—Balram Yadav，最近喺尖沙咀開設自己嘅印度餐廳“Spice Bazaar”啊。Balram Yadav擁有超過30年印度菜經驗，亦曾於印度五大酒店集團；以及香港人氣印度餐廳“Leela Restaurant”工作，擅於用多種香料煮製香港人鍾意嘅印度菜。
“Spice Bazaar”CP值好高!! 午市套餐只係$98起，提供素食 / 非素食套餐選擇，由前菜、主菜、印度烤餅再食到甜品𠻹。為慶祝新開業，3月24日前晚市單點有8折優惠，即睇詳情~
“Spice Bazaar”新開業優惠！
即日起至3月24日，晚市單點餐牌8折 (優惠不適用於2月14日) |
Balram Yadav曾任杜拜、阿布扎比皇宮廚師。最近於尖沙咀開設自己嘅印度餐廳“Spice Bazaar”。
一出𨋢就見到法國畫家Eric手繪壁畫，呈現印度文化。
“Spice Bazaar”環境精緻，提供室內及露台座位。
嚟到“Spice Bazaar”，你會發覺印度料理唔會好辣，反而每啖都好有層次，香料味會慢慢滲出嚟。Balram Yada提道menu唔算好多選擇，令佢更專注料理嘅質素同新鮮度!! 不過開飯仔細心睇過，其實menu有40幾款揀—前菜、燒烤、咖喱、咖喱(素)、印度香飯、印度烤餅都有齊，一定揀到自己心水。
“Spice Bazaar”最吸引係有印度傳統烤爐Tandoor!! 高達400°C嘅圓柱形大窯爐，keep住新鮮出爐印度烤餅、海鮮、肉扒、羊架。呢度嘅印度烤餅多達7款口味，好似蒜蓉牛油烤餅、紅烤餅(Laal Naan)、印度香脆烤餅、松露芝士烤餅等都好值得試。
Balram Yada擅於用多種香料煮出層次，唔會死辣。
店內設有印度傳統烤爐Tandoor，高達400°C 新鮮出爐印度烤餅、海鮮、肉扒、羊架。
印度烤餅多達7款口味，好似蒜蓉牛油烤餅、紅烤餅(Laal Naan)、印度香脆烤餅、松露芝士烤餅等都好值得試。
印度料理嘅吸引力，唔多唔少嚟自味道層次變化。因此Balram Yadav唔受地域局限，於印度各地引入食材、香料。你可能會食到南印度食材又或北印度香草，總之就係一場充滿驚喜嘅印度盛宴。
晚市必食料理
“Spice Bazaar”晚市有40幾款單點料理，即刻睇吓有咩食～
【Starter 前菜】
脆餅籃(V) (Papad Basket) $38
呢度全店料理手工製，就算望落普通嘅印度小食脆片(Papadum)，都係自家用豆粉炸到脆卜卜，上枱嗰陣仲好熱㗎。
洋蔥甜菜沙律(Onion & Beetroot Salad) $58
平時我哋多數用印度烤餅配咖喱食，原來當地人另一食法係配洋蔥沙律㗎，嚟到可以試吓地道風味。
人氣 印度鹽酥雞65(Chicken65) $108
花多眼亂唔知揀咩好，推薦試吓“Spice Bazaar”招牌—印度鹽酥雞65。呢道南印度料理有好多唔同煮法，主廚Balram Yadav係用海德拉巴(Hyderabadi) 風格，以多種香料醃製雞肉再高溫焗到酥脆。
極好炸雞(Majestic Chicken) $108
另一款再脆啲嘅炸雞，係用乳酪將雞肉條醃到嫩滑，加埋咖喱葉好有風味。
人氣 碎羊肉及碎蛋印度麵包(Keema Anda Pav) $128
麵包控一定會鍾意嘅鬆軟牛油麵包!! 食嗰陣自己將新西蘭羊肉碎蛋夾入麵包，而且麵包邊又脆脆哋好好味啊。
當我哋食到一半，先發覺伴碟嘅脆條係食得㗎(笑)，侍應仲介紹返係自家製即炸，所以好脆又無味精味。
鷹嘴豆咖喱及炸印度麵包(V)(Chole Bhature) $98
素食者喺“Spice Bazaar”都好享受到印度菜風味!! 因為印度本身就有好多素食，當地人會用各種香料將蔬菜、豆類煮得好好食。好似呢道鷹嘴豆咖喱，口感綿密配埋個炸印度包好快清碟。
【Tandoor燒烤】
“Spice Bazaar”有印度傳統烤爐Tandoor，高達400°C 新鮮出爐真係好正!!
燒烤椰菜花(Tandoori Gobi) $108
真係無諗過燒烤椰菜花咁好食！椰菜花加咗希臘乳酪、香料烤焗，重點係要蘸埋芒果甜酸醬(Mango Chutney) 啊。個醬用芒果、薑調製，但薑味唔強恰好平衡芒果甜味，好鍾意呢種溫和嘅甜酸味道。
酸辣醬自家製芝士(V)(Chutney Paneer Tikka) $148
平時好少見立方體嘅芝士，其實係自家製印度茅屋乳酪(Cottage Cheese)，加咗啲印度香料入Tandoor烤焗。出面少少焦脆，入面口感好柔軟，配埋薄荷醬幾有新鮮感。
黑胡椒雞肉(Murgh Kali Mirch Tikka) $158
平時烤雞肉就食得多，但好少會加咁多香草、香料同黑胡椒。用香料撞出嘅辣味好微妙，唔會一嚟就好辣衝撃味蕾，反而係慢慢滲出嚟，幾特別。
胡椒烤雞(半隻)(1/2 Roasted Pepper Chicken) $158
本地黃雞嘅雞髀、雞胸位，肉質幾嫩又重雞味。用自製香料醃製再烤到金黃酥脆，撕開仲爆緊肉汁，私心推薦必食啊!!
彩椒烤羊肉(Gilafi Seekh Kebab) $168
第一眼有啲估唔到烤羊肉係咁，原來係將新西蘭羊絞肉混入各種香料再烤製。肉卷外形，可以令肉餡於Tandoor入面全面受熱，咬落去仲好有肉汁。
香料羊排(Masala Lamb Chop) $218
用印度Masala醃新西蘭羊架長達14個鐘，羊肉真係入晒味。加上由Tandoor新鮮出爐，肉味混合炭香好好食!!
【Curry Selection(V) 咖喱精選(素)】
自家製奶酪菠菜青咖喱(Palak Paneer) $108
可能香港人對呢道咖喱有啲陌生，但其實係印度經典素食嚟㗎。咖喱混合滿滿自家製茅屋乳酪(Cottage Cheese) 同菠菜，單食都幾重菜味，建議配印度烤餅食啱啱好。
【Curry Selection(Non-Veg) 咖喱精選(非素食)】
牛油雞紅咖喱(Butter Chicken) $158
舊德里風格嘅牛油雞，用咗大量牛油、番茄、香料煮製，味道濃郁又唔會太刺激，同印度烤餅好夾㗎，係大人小朋友都會鍾意嘅料理。
Spice bazaar