【鼎泰豐前師傅助陣】打造上海菜新潮流 小籠包+麥提莎有驚喜!
「十十」由元朗小店,開到嚟旺角進駐商場!元朗店主打四川菜,大受食客街坊歡迎。旺角新店則主打四川、上海菜,並由一班鼎泰豐前師傅助陣手製小籠包、生煎包、鍋貼等。

老闆透露好多年輕人未聽過上海粢飯,叫筆者細細個就食粢飯早餐情何以堪,原來不知不覺上海菜已被視為老舊。所以「十十」新店以日本簡約主調,打造文青風。
「十十」旺角店以日本簡約為主調。
木系配以植物點綴,好有文青氣氛。
菜式方面亦於傳統手藝加入Fusion 元素,單係小籠包就有5款口味,有原味小籠包、酸菜魚湯小籠包、沙沙小籠包等等。
鼎泰豐前師傅手製小籠包,並創作多款口味。

手工小籠包 必試首創口味
最估唔到首創口味有沙沙小籠包,師傅包入原粒麥提莎、紅豆沙,半溶流沙口感勁過癮,爆湯一刻鹹甜相撞有驚喜,當甜品都得。
「十十」元朗店人氣菜式之一係酸菜魚,師傅以此為靈感包入小籠包,可能平時食小籠包會沾醋,所以估唔到酸菜同小籠包都好夾,後續又會滲出魚鮮味。
店家仲提供埋Q版放大鏡,小籠包瞬間擺出可愛表情俾大家影相打卡,影完相記住即刻食呀!

脆口爆汁 鮮肉生煎包&鮮肉鍋貼
上海菜點少得生煎包、鍋貼,每試一款包點都被鼎泰豐前師傅手藝驚艷到,外皮軟綿唔會太厚或太濕,入口真係滲出肉汁先係一流。個人最鍾意生煎包、鍋貼底部嗰層脆皮,呢度即叫即整所以脆卜卜,嚟到起碼都要試一款。
鮮肉鍋貼外皮唔會過厚,口感軟綿。
鮮肉生煎包即叫即整,底部仲脆卜卜。

元朗店人氣名物 老壇酸菜魚
元朗分店嘅老壇酸菜魚一直廣受熟客歡迎,日賣過百。因為店家只用新鮮鱸魚,原條鮮劏起骨,食落特別有鮮味。個人覺得酸菜湯底唔算加好多熱油爆香,湯底較清爽,食較掛湯嘅萵筍、芽菜配料時更舒服。
老壇酸菜魚用新鮮鱸魚,特別有鮮味。
同場仲有水煮牛肉,比較香辣重油香。

親手拉絲 自選乾鍋
想同幾個朋友坐低慢慢食吓辣,除咗水煮系列外仲有自選乾鍋!4款口味選擇,配料好似車仔麵咁任揀,最後加埋辣椒、薯條、芝士炒香熱辣辣上枱。鍋底會有火酒膏Keep 住溫度,食到半途又可以自己炒吓整芝士拉絲好療癒,啱晒傾計慢食。
自選乾鍋有多款配料揀,加埋辣椒、薯條、芝士食好正。

四川風味 烤羊排
其實呢個烤羊排幾有驚喜,估唔到外層烤得咁金黃惹味,恰如四川菜重香料做法。而且羊肉先滷後焗更入味,所以肉味絕不比外皮輸蝕,羊肉夠香少羶,幾值得一試。
羊排先滷後焗好惹味。

【3款午市套餐】一嚐新式上海粢飯
唔知你對上海粢飯陌唔陌生呢?無論你食過未,都會對呢度嘅粢飯有驚喜。傳統會將煙韌糯米包入酸菜、油炸鬼等,呢度就創作咗酸菜泡椒伊比利豚腩肉、紅燒肉醬油漬蛋、麻辣牛肉京蔥等口味,軟糯口感再加蛋或加辣都幾衝撃。

坊間粢飯以外賣為主,呢度就可以同朋友坐低慢慢食,揀午市套餐「粢飯餐」仲有埋2款前菜、鍋貼、熱鹹豆漿 或 生蛋撞熱漿(甜豆漿加蛋),咁多嘢食100蚊有找。
「粢飯餐」CP值高,坐低慢食粢飯。

同場仲有2款午市套餐—「便當餐」、「麵餐」同樣份量豐富抵食。「便當餐」有湯羹、2款前菜、鍋貼、主菜配菜飯/烏冬、黑糖豆漿,主菜有麻婆醬拌木魚豆腐、酸菜泡椒忌廉汁金黃魚塊、京蔥大醬伊比利大酥肉等。

「便當餐」酸菜泡椒忌廉汁金黃魚塊,份量豐富。
「便當餐」京蔥大醬伊比利大酥肉。

「麵餐」有前菜、主菜、黑糖豆漿,共有8款麵食—老壇酸菜魚米線、排骨擔擔麵、上海嫩雞煨麵等。如果選擇困難症發作,個人推薦溫泉蛋擔擔拌讚岐烏冬、麻辣特濃鮮茄菠菜牛肉拌麵。溫泉蛋擔擔拌讚岐烏冬,篤開流心蛋後即流出蛋漿,撈勻烏冬食軟綿開胃。
溫泉蛋擔擔拌讚岐烏冬
另外麻辣特濃鮮茄菠菜牛肉拌麵,估唔到番茄咁濃、啖啖番茄肉。一問之下,原來店家用大量新鮮番茄、茄膏調製醬汁,酸酸甜甜女仔一定鍾意。
麻辣特濃鮮茄菠菜牛肉拌麵

新派豆漿!黑糖珍珠豆漿
只要+$12 仲可以升級黑糖珍珠豆漿。有機無糖豆漿好健康,加埋自家炒製嘅黑糖珍珠,攪拌後令黑糖慢慢滲出,輕甜恰好。
黑糖珍珠豆漿健康微甜。

十十川滬料理
地址: 旺角亞皆老街8號朗豪坊4樓7號舖
電話: 28901966
* 資料由客戶提供