【韓日Eat at Seoulmate】 Staycation
數數手指,差唔多半年無去過韓國、日本喇,雖有言「一醉解千愁」,但呢種鄉愁並唔係飲酒可以一解,而係一個字—「食」!銅鑼灣Seoulmate 一直主打新派韓國菜,為咗令香港人「一食解鄉愁」,特別推出韓日Staycation限定Menu,將韓日料理融合設計多款新菜式。

炸雞x蕃茄濃湯 x 芝士x 稻庭烏冬
韓國菜不得不提韓式炸雞,店家將日本稻庭烏冬加入炸雞,Crossover香脆炸雞x煙韌稻庭烏冬2種韓日獨特口感,食落幾有新鮮感。

呢度嘅炸雞係無骨雞件,可以好爽咁大大啖咬落去,顯得金黃色雞皮特別脆口,驚熱氣又可以連埋烏冬撈少少蕃茄汁食。呢道炸雞有湯烏冬「芝士蕃茄濃湯」同撈烏冬「芝士蕃茄濃汁」揀。個人比較鍾意撈烏冬,就算將炸雞大大力撈落蕃茄汁度都唔會腍,芝士蕃茄濃湯可以撈炸雞,又可以撈烏冬,多重口感,集香脆丶煙韌丶濃郁香甜於一身。
炸雞配芝士蕃茄濃汁撈烏冬 (只限午市供應)

炸雞配芝士蕃茄濃湯稻庭烏冬 (只限午市供應)

都幾大吓吉列豬扒配鐵板滑蛋粟米芝士
要講經典地道日本菜,一定有滑蛋吉列豬扒飯份,一啖肉汁豐富嘅脆炸豬扒、一啖滑滑焗蛋兩極口感加埋一齊真係好正。今次話明係韓日Crossover,當然加入韓菜必有元素—芝士,仲有粟米粒,將滑蛋升級為拉絲滑蛋,將豬扒捲捲捲~捲上拉絲食,直接升級咗!

最搶眼嘅一定係有大又厚嘅吉列豬扒,沾上麵包糠炸到金黃色,係脆到有聲嘅厚脆皮~滑蛋則加咗忌廉,口感更滑身。
升級版拉絲滑蛋,可以用新食法將吉列豬扒捲住食。

店家創作料理 韓國水冷麵 +保健五味子+本日梅子素麵 
水冷麵,不論夏天或冬天都深受韓國人歡迎,而韓國人BBQ 後都會飲杯酸酸甜甜、冰冰涼涼嘅五味子清熱解膩,係一種健康果子。店家特別將呢種韓國呢兩種傳統元素加入日本梅子素麵,令素麵酸甜得嚟又健康。

同時放上日本梅子,鍾意酸嘅話食啖素麵,再細細啖咬粒梅子真係好舒爽。其實素麵本身已有淡淡嘅梅子香味,口感爽口又少少煙韌,配料以柚子醬油浸過嘅原粒北海道刺身級帶子、蟹子、蟹柳絲、青瓜絲等。食完炸雞、吉列豬扒之後,再食返個清熱解膩水冷麵,即刻可以叫多兩個甜品!
北海道刺身帶子配五味子水冷梅子素麵

軟綿QQ泡菜大阪燒
如果你鍾意軟綿QQ口感,一定會鍾意日本大阪燒~店家依照傳統大阪燒做法,底面烤得微脆、內餡Keep 到軟綿。配料就有泡菜、煙肉、椰菜、鮮淮山,淋上自家製泡菜汁同鰹魚醬,令味道微辣有鹹香。

平時大阪燒都會用綠椰菜,大廚就一反傳統轉用紫椰菜,減少椰菜出水情況,令大阪燒質感更軟身香口。
泡菜大阪燒

魚骨魚腩位最香~青梅燒三文魚腩
韓國人喜歡用青梅烹飪;日本人則多用梅子。兩者分別在於浸透時間,青梅浸透時間相對較短,所以味道比較清爽同香,好適合為魚肉引味,微酸又唔會搶到魚鮮味。呢道青梅燒三文魚腩,正正就用青梅引味,突出三文魚腩魚油香。而且三文魚腩選用魚鮫位,近骨位魚肉油香味更濃。
青梅燒三文魚腩

人氣打卡位 限定超大梳乎厘班戟
Seoulmate 甜品一直都係人氣打卡位,呢款新推限定「軟心芝士梳乎厘班戟」一定要相機食先,好少見咁大盤梳乎厘,份量足夠2至3個人Share。難得咁大份量,蛋香依然濃郁,內餡則有軟心芝士,略帶少少鹹香。

因為係梳乎厘 x 班戟,口感比一般梳乎厘較實在啲啲,比較偏向軟綿蛋糕質感,配埋自家製焦糖脆脆雙重口感,咁大盤唔覺唔覺就食晒。
軟心芝士梳乎厘班戟 (限量供應)

高級朱古力味道+空氣感梳乎厘
如果你係真正空氣感梳乎厘Fans,則可以揀72%特濃朱古力梳乎厘。見到用上72%朱古力,就知朱古力味唔會死甜,而係微甜帶朱古力獨有嘅香濃苦甘味,味道更有質感。

梳乎厘焗上20分鐘,不多不少,啱啱好唔會過熟焗出空氣感,配埋雲呢拿雪糕食一流。
72%特濃朱古力梳乎厘 (限量供應)

韓國大熱 法國牛油酥皮窩夫 (Croffle)
Seoulmate將近期韓國大熱流行嘅Croffle帶嚟香港,Croffle 集合牛角酥 (Croissant)和窩夫 (Waffle) 於一身 ,用上法國牛油酥皮製成窩夫,牛油味特香,而且口感比一般窩夫鬆脆香化。

Croffle 即叫即做,新鮮出爐。配有兩款口味: 「焦糖脆脆草莓酥皮窩夫」同「焦糖脆脆Baileys 榛子朱古力酥皮窩夫」。
焦糖脆脆草莓 酥皮窩夫

焦糖脆脆Baileys 榛子朱古力 酥皮窩夫

Colorful 心思飲品~
飲品方面都相當有心思,有真正純天然紫薯蓉整嘅「焦糖脆脆紫薯拿鐵」,味道比坊間用沖劑沖調嘅更濃郁之餘,仲食到啖啖紫薯蓉;亦有用韓國米酒調製嘅「柚子米酒梳打」,加埋韓國柚子淡淡酸甜又帶米酒香;最後有解渴解膩嘅「洛神花黑加倫子忌廉梳打」,配埋雲呢拿雪糕好清涼,飯後飲特別舒暢。
(左起) 焦糖脆脆紫薯拿鐵、柚子米酒梳打、洛神花黑加倫子忌廉梳打

另外,Seoulmate 仲啱啱推出左新嘅午市優惠套餐。


Seoulmate Cafe
地址: 銅鑼灣駱克道491-499號京都廣場4樓
電話: 21046788
* 資料由客戶提供