Argentina 21 Days Dry Aged Grass Fed T-BONE
今個情人節，如果你準備為身邊嘅牛控煎塊心型牛扒，不如mark低呢間阿根廷菜扒房“La Parrilla Steakhouse”，帶佢食極厚切熟成牛扒可能仲正呀！
深色木、磚牆打造濃厚外國氣氛。
呢度嘅深色木系、磚牆、吊扇打造出濃厚外國氣氛，一整排大玻璃窗更映透紅磚大館，相當浪漫。作為專業扒房，更有自家熟成櫃，每款牛扒至少熟成7-14日，牛扒特別軟嫩同重肉味㗎！
一整排大窗映透大館靚景。
Wow! 必食招牌「極厚切阿根廷肉眼扒」
扒房開店以嚟，最主打就係阿根廷肉眼扒(Rib Eye)，因為當地牛扒較少肥膏，就算好厚切都完全唔韌。
Argentina 21 Days Dry Aged Grass Fed PRIME RIBS
如果你鍾意油香豐腴口感，最近店家就新引入澳洲和牛。油花分佈均勻，牛脂甜香同時重肉味，睇吓和牛扒幾大件！
Australian m9 wagyu 21 Days Dry Aged Ribeye
Australian m9 wagyu 21 Days Dry Aged Ribeye
為什麼La Parrilla 咁高人氣?
“La Parrilla Steakhouse”半開放式廚房有扒爐，不時見到火焰餘光再傳嚟牛香，火力相當足夠鎖住肉汁。如果想知間扒房牛扒好唔好食，睇吓佢哋嘅扒爐已經略知一二。難怪這裡火速成為城中熱店!
阿根廷Rib Eye，跟配6種唔同風味嘅 傳統阿根廷醬料, 當中包括 Chimichurri, Criolla, Tomatillo… etc)
大廚就提議4成熟最好食，等到我哋嘅牛扒上枱時，果然煎至外層金黃色、內裡好粉嫩，入口爆肉汁仲好酥脆𠻹。
睇吓粉紅色肉幾靚！
【情人節套餐】5-course Valentine’s Day Set Menu
情人節當然唔只食牛扒啦，今年情人節套餐有生蠔、鵝肝、朱古力心太軟等等。
前菜
加拿大海膽 Sea Urchin Ceviche
今次大廚選用加拿大海膽，海膽濃味適中，帶鮮甜。上方魚子醬則飽滿柔軟，鹹度適中唔會好搶，配埋海膽一齊食啱啱好。
香煎鵝肝
鵝肝煎得焦香，入口細膩綿密，濃香味道可以留於口中久久不散。大廚配上啤梨蘋果醬，而個人偏好配略帶果香嘅紅酒，更加突出鵝肝豐腴味道。
主菜3選1 (阿根廷T-Bone / 慢煮羊膝 / 當天鮮魚)
阿根廷T-Bone
情人節主菜有阿根廷T-Bone，足足500g好大件！T骨位嘅骨邊肉特別濃郁，鍾意肉味濃嘅話一定唔好放過呀。
慢煮羊膝
估唔到羊膝都幾出色，如果二人都係食肉獸可以揀一牛一羊試晒兩款。大廚特選羊膝位，肉質特別軟腍。將羊肉捲住香草再慢煮十二小時，香草味之間略帶微微羊膻，幾有層次。
當天鮮魚
選用當天新鮮鮮魚，煮法唔使太複雜已經好好食。大廚輕輕煎香，魚皮略脆，魚肉仲好雪白嫩滑。最驚喜反而係酸酸辣辣嘅配料醬汁，辣得好快好醒神。
甜品
甜品係女生一定鍾意嘅心太軟，即叫即整。蛋糕外層輕脆，一切開即湧出朱古力漿。
【人氣單點推介】佐酒必點 芝士拼盤 X 阿根廷餃子Empanadas
呢度都有唔少佐酒料理值得追加，微醺約會更加浪漫呀。
芝士拼盤
晚餐序幕可揀個芝士拼盤，飲吓紅白酒傾計熱身先。呢度嘅芝士拼盤會有4款時令芝士，日日唔同㗎。
阿根廷餃子Empanadas
如果你哋鍾意香脆濃味，可一試阿根廷地道料理—Empanadas。新鮮出爐嘅金黃餃子，外皮厚脆，內裡有滿滿餡料。有阿根廷牛肉、烤雞、焦糖化洋蔥配芝士3種口味。
身為芝士控就最鍾意芝士味，成隻餃子都係包滿芝士好鹹香，咬開仲會拉絲；阿根廷牛肉就驚喜地幾多肉汁，配埋咁脆嘅餃子皮一齊食幾有衝撃感。
牛肉他他
如果牛扒肉味唔夠滿足你，牛肉他他就有生牛肉配蒜泥蛋黃醬(Aioli)、魚子、香蔥等，真係食到牛肉原始味，輕辛香料都好開胃。
生醃海鮮 (Ceviche)
將海鮮融合多款香料，酸中微辛極富層次。呢度分別有鱸魚、蝦、吞拿魚、帶子4款前菜選擇，每款海鮮味都好清新突出。
白醬雞肉意大利麵 (Chicken Alfredo)
如果習慣要食啲飯麵先滿足，好推薦追加呢道意大利麵。忌廉幾濃郁creamy，每啖意粉都好掛汁。雞扒亦燒得幾有炭香，配埋套餐嘅牛扒、羊肉，可以食勻3種肉喇。
Churros
嚟到阿根廷餐廳，一定要食埋當地經典甜品Churros。即叫即炸，外層灑滿肉桂糖，又甜又香脆。
La Parrilla Steakhouse
地址: 中環雲咸街77號嘉兆商業大廈1樓
電話: 26378555