【超厚豬扒】鐵板餐! 食到夜晚12點都得!
I'm loving you all day all night小編最愛食茶記,由早餐食到宵夜! 宵夜? 好懷念呀,以前約Friend食飯幾夜都得,周圍都有宵夜選擇。而家趕住夜晚10點前就食飽埋單,OT夜咗少少都搞唔掂呀……全港有6間分店嘅「元朗冰室」就營業至午夜12點,尖沙咀、太子、將軍澳、深水埗、長沙灣同土瓜灣都食到㗎!

冰室皇牌: 厚豬扒Double 上!
呢間冰室有好多招牌菜,而且全日不收加一。最大人氣係超厚豬扒!朝早11點後就有得食,豬扒厚身得嚟好鬆軟,入口唔會油膩反而仲Keep 到肉汁,係高質嘅冰室出品呀。肉控可以揀「Double厚豬扒飯」,有厚豬扒2塊跟秘製豉油,包你翻啅!
Double厚豬扒飯

多款厚豬扒系列 滿足雙重願望
唔想齋食招牌豬扒,厚豬扒系列仲有9款選擇,分別加配咗辣肉醬飯、蓮藕餅飯、咖喱飯、魔鬼醬脆豬包等。個人鍾意「厚豬扒配司華力腸飯」,唔會太多肉同醬咁膩,又可以滿足吓口感。
厚豬扒配司華力腸飯 (跟秘製豉油) 

食豬扒包點駛去澳門呀? 脆豬包Fans召集!
冰室一向吸引一班脆豬包Fans!呢道「招牌厚豬扒配魔鬼醬脆豬包」,脆豬包烘得啱啱好,外層勁脆口入面仲好鬆軟,加埋Juicy 厚豬扒、配菜同酸甜魔鬼醬,夏天熱到無胃口食呢個好正。
招牌厚豬扒配魔鬼醬脆豬包 

晚市鎮店寶: 必食超大份量鐵板餐!
嗞嗞…嗞嗞…熟識的鐵板聲音,熱辣辣! 每晚6點後必食嘅鐵板餐,全部大大份,可以揀「馳名厚豬扒」、「豐盛什扒」或「一級牛扒」,每個套餐均附送焗薯茸、牛肝菌湯、蒜香法包。三五知己或拍拖的必點好選擇,有時輕輕鬆鋸塊扒,冰室仲正過好多高級扒房,有Feel嘛!
鐵板扒餐 馳名厚豬扒

大滿足!原隻烤雞啖啖肉
除咗鐵板餐有啖啖肉,呢道原隻烤雞都係名副其實嘅大啖肉呀!仲有餐湯同蒜蓉包奉送。
原隻烤雞

即睇多款冰室下午茶!$5追加紅豆冰超抵
每日下午2:00至6:00就係下午茶時間,呢度嘅下午茶選擇好多,由經典炸雞脾、極品厚豬扒,以至西式Pizza、大滿足咖哩飯、豚肉叉燒丼等都有。

店家特別推介「玉子鰻魚飯丼」,厚肉嫩滑鰻魚足料外,亦有滿滿嘅日式配料撈飯好開胃。
玉子鰻魚飯丼 

嚟到冰室梗係必食西多啦!西多炸到脹卜卜,上枱時已淋上朱古力漿同煉奶,一拮起就食得好方便,HK$5 就可以追加經典紅豆冰,係童年嘅味道呀。
冰室一口西多士

想食得香口又唔膩,下午茶好推介「吉列脆魚柳」~炸漿厚度啱啱好,夠脆又唔會太乾,咬開魚柳仲好軟嫩,免費配薯條 或 冰室沙律。
吉列脆魚柳 

罕見冰室小食 肉嫩BB鴿
冰室出名小食選擇多,但有燒乳鴿就真係少見喇!「禾味燒BB鴿」真係用年幼BB鴿,所以肉質特嫩,外皮燒得輕脆,兩個人當作小食Share 好過到口癮。
禾味燒BB鴿
* 資料由客戶提供