今個2月農曆新年、情人節接住嚟,唔想又係盆菜又係心型牛扒? 呢間黎巴嫩菜“RUE DU LIBAN”推出新年套餐&情人節套餐,兩款套餐都食到佢哋招牌嘅大大盤煙燻烤肉!! 仲會放滿黎巴嫩地道小碟(Cold Mezze/Hot Mezze) 影相好靚㗎。
“RUE DU LIBAN”法文意指黎巴嫩街道。店如其名,真係好似去咗外國咁。大門深藍外牆懸垂花花,唯美花花主題延伸至店內,嚟慶祝節日絕對有儀式感。

“RUE DU LIBAN”法文意指黎巴嫩街道,藍色小店有種外國氣氛。

店內懸掛滿花花,相當浪漫怡人。
【農曆新年套餐】
小店由黎巴嫩人Imran Khaleel開設,並邀請埃及總廚Maged Makram煮出地道風味。今個新年,Imran想香港人感受到家鄉熱鬧氣氛推出豐盛新年套餐,並笑言大家新年飯咩都唔使諗,只要約親朋好友嚟飲酒食嘢enjoy就得喇,Imran同廚師團隊會準備最好嘅料理啦。
新年套餐更免費跟配Chateau Musar紅/白酒一支,唔使額外嗌酒已經好吸引。黎巴嫩小碟(Cold Mezze/Hot Mezze)足足有5款之外,主菜3選1都係大大份㗎。
“RUE DU LIBAN”農曆新年套餐$2,000/4人
(免費跟配Chateau Musar紅/白酒一支)
Cold Mezze 鷹嘴豆蓉(Hummus)/燻茄子蓉(Moutabal)/辣味羊乳酪(Spicy Feta Cheese)
Salad 阿拉伯沙律(Fattoush Salad)
Hot Mezze 炸鷹嘴豆(Falafel)/炒雞肝(Chicken Liver)/中東芝士餡餅(Cheese Sambousek)
Mains(3選1) 4人烤肉拼盤(Mix Grill for 4) 或 香烤羊肩(Lamb Shoulder) 或 烤海鮮拼盤(Mix Seafood Grill)
以上跟配: 香料雞飯(Chicken Fatteh)/彼得包(Pita Bread)
甜品 中東甜品Kunefe/米布甸(Rice Pudding) |

新年套餐好有節日氣氛,並會免費跟配Chateau Musar紅/白酒一支。
黎巴嫩地道Meeze
黎巴嫩人食飯前會先食前菜小碟,冷盤(Cold Mezze)多數係豆類蔬菜蓉,新年套餐有鷹嘴豆蓉、燻茄子蓉、辣味羊乳酪。特別鍾意軟綿綿鷹嘴豆蓉,大廚依傳統將鷹嘴豆手打成蓉,原始豆香會留於口中。

農曆新年套餐有3款冷盤(Cold Mezze)。
另外熱盤(Hot Mezze)有炸鷹嘴豆、炒雞肝、中東芝士餡餅。炸鷹嘴豆係好出名嘅中東小食,外層炸到硬脆,一咬開卜一聲就有軟綿綿鷹嘴豆蓉。
而中東芝士餡餅就好精緻,當地人會將圓形麵皮對摺捏花成半月。外層脆卜卜,內餡係鹹香芝士。

(左上及下)炸鷹嘴豆、炒雞肝
(右)中東芝士餡餅
冷盤(Cold Mezze)同熱盤(Hot Mezze)之間,會有阿拉伯沙律清清味蕾。自行於新鮮沙律菜、番茄、石榴擠上檸檬汁,微酸開胃。

阿拉伯沙律
主菜3選1
呢度主菜完全係外國人份量,烤肉同海鮮都係大大份!! 私心推薦4人烤肉拼盤,仙氣烤爐出場好有煙燻香味,堆滿即烤羊肉、牛肉、雞肉等!!

4人烤肉拼盤仙氣登場。
每到大時大節,食海鮮更加喜慶洋洋~呢道烤海鮮拼盤有即烤青口、蝦、魷魚、燒魚等。全部新鮮惹味,一齊豐盛過新年。

烤海鮮拼盤。大時大節食海鮮更有氣氛。
新年只想專注啖啖肉,可以一試總廚Maged Makram用秘密家傳食譜煮出嘅香烤羊肩。羊肩肉以香草、香料醃製後,再慢煮至完美嫩度,一咬落去柔軟多肉汁,風味十足。

總廚Maged Makram用秘密家傳食譜煮出嘅香烤羊肩。
最後有2款甜品,第一次食中東甜品Kunefe真係有驚喜,平時香港食甜品多數軟綿綿,反而Kunefe係外層係脆脆地嘅酥皮碎碎,再加埋果仁、乳酪、糖漿撞出層次。
另外米布甸則滑嘟嘟,濃郁奶香作結好有幸福感。

(左)中東甜品Kunefe、(右)米布甸
【情人節套餐】
“RUE DU LIBAN”一直係浪漫花花主題,就算唔係情人節都好有粉紅泡泡氣氛。趁情人節約另一半嚟拍拖,喺香港偷暇感受吓異國情調,或者會成為你哋重要回憶地方之一呢。
“RUE DU LIBAN”情人節套餐$488/人
(每位可選Cocktail一杯)
Starter 新鮮三文魚配牛油果及茄子醬 (Fresh Salmon with Avocado & Eggplant Dip)
Cold Mezze 鷹嘴豆蓉(Hummus)/紅椒核桃醬(Mohammara)/希臘乳酪(Labneh)
Hot Mezze 炸鷹嘴豆(Falafel)/中東芝士餡餅(Cheese Sambusek)
Mains(2選1) 2人烤肉拼盤(Mini Mix Grill for 2) 或 烤澳洲鱸魚(Barramundi Harra)
Sides Vermicelli Rice/彼得包(Pita Bread)
Dessert(2選1) 果仁千層酥(Baklava) 或 Kunefe
Drinks 每位可選Cocktail一杯 |

情人節套餐每位可選Cocktail一杯,店內花花環境好有約會氣氛。
第一道菜係心型新鮮三文魚配牛油果及茄子醬,上層係滿滿新鮮三文魚;下層嘅牛油果都好creamy,由頂至底一啖食晒最滿足。

情人節套餐都有5款冷盤(Cold Mezze)、熱盤(Hot Mezze),用味蕾感受吓異國情人節,幾有新鮮感。

冷盤(Cold Mezze)有鷹嘴豆蓉、紅椒核桃醬、希臘乳酪。

熱盤(Hot Mezze)有炸鷹嘴豆、中東芝士餡餅。
主菜2選1就有二人版嘅烤肉拼盤,同樣係仙氣烤爐上枱,一聞到煙燻香就好想食肉喇~另一道主菜就係烤澳洲鱸魚,伴上黎巴嫩風味番茄蓉一齊食,輕酸突出魚鮮味。

烤肉拼盤

烤澳洲鱸魚
情人節套餐可以食到中東甜品Kunefe,同埋酥脆輕甜嘅果仁千層酥Baklava。

(左)中東甜品Kunefe、(右)果仁千層酥(Baklava)
【同場加映】總廚秘密家傳食譜
“RUE DU LIBAN”新出嘅香烤羊肩,係總廚Maged Makram用秘密家傳食譜,以香草、香料醃製羊肩肉,重現黎巴嫩風味。經慢煮後羊肉好柔軟,仲完美保留肉汁。

RUE DU LIBAN
地址: 尖沙咀山林道22-26號地下A號舖
電話: 23102922