鍾意同老友摸杯底嘅你,mark實銅鑼灣新開嘅Sidekick Bar啦,店名「Sidekick」係老友嘅意思,因為店家希望同每位客人成為老朋友。酒吧主打由專業調酒師創作嘅獨特雞尾酒,以及惹味嘅佐酒料理;加上優雅木系裝潢、飛鏢遊戲區等元素,時尚得嚟又有娛樂氣氛,啱晒年輕人聚會、開party,而家新張期內訂座有8折優惠𠻹。
![](https://www.openrice.com/userphoto/CMSContent/0/8C/001NGEBE75AC4E6D17D340j.jpg)
裝潢帶點英式酒吧感覺,幾有格調~
特調雞尾酒
店經理係香港調酒比賽冠軍,曾於香格里拉酒店同帝苑酒店工作,經驗豐富,想知邊杯酒啱你口味,可以安心交畀佢推介。
Yesterday
「昨日之日不可追」好似有啲感慨,但正正係呢杯「Yesterday」嘅創作靈感!以威士忌做基底,配搭Aperol、Rosso vermouth,好似過去無數個昨日咁,有苦有甜;加入金桔浸泡,則象徵年輕時嘅青澀,年少輕狂甚至帶點遺憾;而橡木煙可以提升威士忌嘅木桶香氣,同時代表以上所說都會隨煙消散。
![](https://www.openrice.com/userphoto/CMSContent/0/8C/001NGFF55F0BFFB668CD45j.jpg)
Yesterday(特價$70 / 原價$88)酒味濃郁,香氣層次豐富
Fresco、Savage
如果聚會集慣飲幾杯,推介Fresco做第一杯酒,以金酒為主調,加入接骨木花、溫室青瓜,味道清新。而Savage係呢度嘅招牌Tiki Cocktail,以蘭姆酒做基底,加入鳳梨、肉桂、新鮮鼠尾草等材料,配埋雕像造型酒杯,由味道到視覺都充滿熱帶風情。
![](https://www.openrice.com/userphoto/CMSContent/0/8D/001NGG4705297055A996F3j.jpg)
左起嘅Fresco、Savage(特價$70 / 原價$88)風格清新
Sidekick Punch、Sidekick iced Tea
果香十足嘅Fruit Punch,係呢杯Sidekick Punch嘅創作靈感,白蘭姆為基底,加入選用法國進口水果,包括紅樹莓、鳳梨、熱情果等,容易入口。而Sidekick iced Tea基底有Vodka、Pimm’s No.1等,入口有清新嘅蘋果味同茶澀味,尾韻則有橙皮同青檸嘅微酸味,好似清新又有層次嘅水果茶。
![](https://www.openrice.com/userphoto/CMSContent/0/8D/001NGH53BC96AF6B06BEECj.jpg)
左起嘅Sidekick Punch(特價$70 / 原價$88)、Sidekick iced Tea(右:特價$230 / 原價$288/2L)充滿果香氣息
西式佐小食+主食
煙燻西鯡魚多士
餐牌款式暫時較精簡,但勝在口味多元化,西、印、日同港式口味都有。其中煙燻西鯡魚多士精選俄羅斯西鯡魚,配搭酸青瓜、洋蔥同新鮮番茄,再灑上少少鹽提味好醒胃。
![](https://www.openrice.com/userphoto/CMSContent/0/8D/001NGI156461D3BE454E50j.jpg)
小食推介之一:煙燻西鯡魚多士(特價$62 / 原價$78)
印尼雞肉串燒
傳統印尼風味雞肉串燒,將嫩滑嘅雞髀肉切粒加入新鮮香草醃製,即叫即燒香噴噴,搭配秘製沙嗲醬鹹度適中,佐酒一流。
![](https://www.openrice.com/userphoto/CMSContent/0/8D/001NGJ78DBCA7780938991j.jpg)
小食推介之一:印尼雞肉串燒(特價$62 / 原價$78)
烤豬肋骨
啖啖肉嘅烤豬肋骨製作需時,所以師傅預先將豬肋骨醃製,再低溫慢煮至肉質軟腍,客人點餐後再塗上醬汁即燒,保證食到微微焦香嘅滋味。
![](https://www.openrice.com/userphoto/CMSContent/0/8D/001NGK6F3A512A56EA81A6j.jpg)
肉食控之選:烤豬肋骨(特價$230 /原價$288)
千層麵
如果你想飽肚,咁就試試千層麵啦~手工麵充滿咬口,每層加入混合牛肉同豬肉嘅餡料,配搭水牛芝士同秘製番茄汁,香而不膩又開胃。
![](https://www.openrice.com/userphoto/CMSContent/0/8D/001NGL641A701BAAEC87B3j.jpg)
經典西式料理:千層麵(特價$102/ 原價$128)
Sidekick Bar
地址: 銅鑼灣耀華街38號The Zing!8樓
電話: 95592259