【終於約Friend食飯】尖沙咀主打飲酒海鮮 Outdoor位有氣氛
好耐無同朋友夜晚食飯傾計喇!久違咁耐嘅晚餐,梗係想搵個舒服地方飲吓酒、食好嘢啦,尖沙咀呢間樓上餐廳Poseidon 就有個戶外大平台,可以Chill 住睇夜景食飯;室內亦有舒服卡位、高凳位、煙霧特效座位。

餐廳有駐場調酒師,多款啤酒、紅白酒、雞尾酒可以飲成晚。最正係大廚會定期引入Seasonal 靚食材推新菜式,記住飲酒都要留肚食好嘢呀。
同場有卡位、高凳同戶外位揀。

煙霧特效座位好有氣氛。

人氣招牌菜 海鮮拼盤
呢度一向主打靚食材,食靚嘢點少得海鮮,所以呢個「海鮮拼盤」一直好有人氣!今次新Menu 繼續有新鮮即開生蠔、雞尾凍蝦、翡翠螺、青口、蝦,新引入超鮮甜花甲,任沾泰式辣醬、紅酒醋、雞尾酒醬3款醬汁,有2人份或4人份揀。

想食得盡興啲,都可以追加特級鱘魚魚子醬、波士頓龍蝦,會同其他海鮮一齊放喺貝殼大碟上枱,影相一流。
貝殼大碟上枱超靚。

海鮮拼盤有新鮮即開生蠔。

新加入花甲厚肉鮮甜,海鮮控一定鍾意。

冬末想食熱嘢~烤龍蝦海鮮拼盤
微涼冬末,想食啲熱嘢佐酒可以揀「烤龍蝦海鮮拼盤」。大廚透露大部分海鮮都係每朝11點拎新鮮貨,所以就算海鮮用多種香料同Cajun Sauce 烤製都遮唔住鮮味。拼盤有新鮮龍蝦半隻、虎蝦、魷魚、三文魚、扇貝、青口、蜆,配埋蒜蓉包沾汁食最正。

吸滿海鮮精華!原隻麵包蟹海膽意大利飯
「烤龍蝦海鮮拼盤」中有啲海鮮要先蒸至半熟,蒸海鮮嘅精華就用埋嚟煮呢道意大利飯。原隻麵包蟹肉、意大利飯、海鮮汁一齊煮開,飯粒煙韌,每啖都有絲絲蟹肉。

當意大利飯熱辣辣釀入蟹蓋後,大廚會即刻放上刺身級海膽,鍾意海膽原始口感味道嘅話可以一啖啖慢慢食,鍾意意大利飯嘅奶油口感則可撈飯食。

肥美厚肉 3款口味焗生蠔
焗生蠔有蟹肉芝士、菠菜芝士同煙肉芝士3款口味揀。主要用No.2西班牙、韓國生蠔,比法國生蠔更肥美厚肉,略帶甜味,好啱用嚟烤焗。


坊間罕見 酥炸麒麟魚漢堡
呢度另一招牌菜係馬頭魚,係罕有連魚鱗都食得嘅魚。如果對呢個魚名覺得陌生係正常,因為坊間較少餐廳識煮馬頭魚,好易會令魚鱗變腍唔好食。

所以個人好推薦留肚一試馬頭魚,大廚用自家秘訣將馬頭魚魚鱗炸得一支支豎起,入口極香脆!馬頭魚菜式有「酥炸麒麟魚漢堡」、「酥炸麒麟馬頭魚」同「一口酥炸麒麟馬頭魚」。
當作主菜食可揀「酥炸麒麟魚漢堡」。

想試真啲馬頭魚,可揀大件上枱嘅「酥炸麒麟馬頭魚」。

佐酒小食則有「一口酥炸麒麟馬頭魚」,唔使次次食薯條佐酒咁悶。

炭燒美國頂級安格斯斧頭扒
除咗一系列海鮮,呢度亦有美國Prime 級別安格斯斧頭扒,用得Prime 就知肉味夠濃,可配埋自家製紅酒黑醋汁解膩。

走地雞!蜜糖燒雞半隻
主菜方面有牛亦有雞,呢道「蜜糖燒雞半隻」係用較大既走地春雞,多肉得嚟肉質又彈牙。大廚會用香料醃製24小時,雞肉夠晒入味。另外,為咗令燒雞更有蜜糖香,春雞入爐低溫烤至7成熟時會先塗一層蜜糖;焗至9成同全熟時再分別塗蜜糖,3層蜜糖烤焗夠晒香!

鱘魚黑魚子煙三文魚他他
前菜選擇方面就有「鱘魚黑魚子煙三文魚他他」,最底醬汁係經典法汁,味道清淡帶輕微芥末味,平衡多種配料味道—卜卜脆嘅黑魚子、軟綿三文魚同清爽紅菜頭,將幾種味道口感一次過入口最正。

一系列佐酒小食 777 Potato Fries Platter
主要想同朋友飲酒傾計,亦有多款佐酒小食揀。雖然話係「小食」,但份量都好豐富,嗌2款小食4個人Share 都好滿足。呢道「777 Potato Fries Platter」有齊旋風藉條、脆薯條、洋蔥圈、芝士焗肉醬薯皮。幾款口味都有,一班朋友Share 都唔使驚有人唔啱食啦。

德國腸拼盤
佐酒小食仲有「德國腸拼盤」,最鍾意配埋酸椰菜食解膩又開胃。

享受日光 悠閒Weekend Brunch 食Bagels
周末想放空抖吓,星期六、日11:30至17:30 嚟呢度坐戶外食個Weekend Brunch 都好舒服。份量選擇多,仲可以優惠價追加啤酒、紅白酒,CP值高。可以HK$98 直接食個All Day Breakfast;又或以2 Course HK$1683 Course HK$1884 Course HK$208 價錢從「Egg & English Mussin」、「沙律」、「熱湯」、「Avocado & Bagels」、「主菜」或「甜品」中揀選你要嘅類別。言下之意,若你揀4 Course 就可以Order 4個類別啦!

而且每類都有唔同口味選擇,以「Avocado & Bagels」為例就有6款口味—「腰果配牛油果」、「蝦配牛油果」、「朱古力配火龍果」或「花生醬配香蕉」等。手工Bagels 煙韌微酸帶麥香,絕對會食上癮。
每個類別都有多款口味揀,單係「Avocado & Bagels」就有齊鹹甜選擇。

「朱古力配火龍果Bagels」當埋甜品食都得。

飲酒好地方 多款Cocktail!
Cocktail 一直好受女生歡迎,呢度就有多款Cocktail 畀大家慢慢揀,Girls' Talk 成晚都唔悶呀。  
(左) 「Black Pearl」以Rum 酒作基調,味道偏酸甜。
(中) 「Seaside Breeze」以Vodka 作基調,熱情果口味。
(右) 「Senorita」以Vodka 作基調,充滿紅桑莓味道。

Poseidon Restaurant & Bar
地址: 尖沙咀亞士厘道24-38號天星大廈4樓
電話: 25118299
* 資料由客戶提供